Home | Media Releases Index page


Mediavrystelling

30 Desember 2003


Wes-Kaap behaal driekuns met 2003 matriekuitslae

Verklaring deur André Gaum, Minister van Onderwys, Wes-Kaap

Die Wes-Kaap het ‘n slaagsyfer van 87,1% in die 2003 Senior-sertifikaateksamens behaal – ‘n nuwe rekord vir die Provinsie.

Dit is die derde jaar agtereenvolgens dat ons ‘n slaagsyfer van meer as 80% behaal – ‘n driekuns! Ons het sodoende die beste uitslae ooit vir die Wes-Kaap behaal.

Ons het ook vir die eerste keer deur die 87%-grens gebreek. Dit is ’n uitstekende prestasie deur die leerders van ons provinsie. Maar, terwyl ons die verbeterde slaagsyfer vier, vier ons ook die feit dat ons beide die getal suksesvolle kandidate, sowel as die gehalte van die uitslae verbeter het. Hierdie is die sleutelaanwysers van werklike vooruitgang.

Daar moet ook daarop gelet word dat nie minder nie as 56% van die hoërskole in die Wes-Kaap – 216 uit 'n totaal van 383 skole – in 2003 ‘n slaagsyfer van 90% of hoër behaal het.

Dit is ook aangenaam vir my om aan te kondig dat die werklike getal kandidate wat vanjaar geslaag het, verder toegeneem het – vanaf 32 985 in 2002 tot 33 769 in 2003 - ‘n toename van 784 suksesvolle kandidate.

Die Wes-Kaap ondervind reeds die afgelope drie jaar ‘n geleidelike dog konstante toename in die getal kandidate wat matriek slaag.

Hierdie werklike toename verteenwoordig ‘n groot bydrae tot die menslike hulpbron-ontwikkeling van die Wes-Kaap.

Ons is besig om algaande die werklike getal jongmense wat in hierdie provinsie na beter vooruitsigte in die lewe kan uitsien, in vergelyking met dit wat vorige geslagte ervaar het, te laat groei, veral ten opsigte van voorheen benadeelde gemeenskappe.

Ons verwys dikwels na die "reële" groei wat begrotings betref. Wat ons hier ervaar is ‘n reële groei in rente op ‘n ander soort kapitaal, naamlik die menslike kapitaal wat ons benodig om volhoubare ontwikkeling in die Wes-Kaap te verseker.

Om die kroon oor dit alles te span, kan ek aankondig dat die gehalte van ons uitslae verbeter het.

  • Die getal kandidate wat met matrikulasie-endossement geslaag het, het met 205 toegeneem, vanaf 10 118 in 2002 tot 10 323 in 2003.

  • Die getal kandidate wat met meriete geslaag het, het toegeneem vanaf 6 736 tot 7 005, ‘n toename van 269.

  • Die getal kandidate wat met onderskeiding geslaag het, het toegeneem vanaf 2120 tot 2170, ‘n toename van 50.

Die matriekuitslae van 2003 toon dat die mense van die Wes-Kaap goeie rede het om die toekoms met vertroue tegemoet te gaan.

Die toekoms van hierdie provinsie lę juis in die hande van ons kinders wat die kundigheid, vaardighede en waardes moet aanleer wat hulle nodig het om vervulde lewens te lei en om by te dra tot die ontwikkeling van ons provinsie en ons land.

Ons taak in die Wes-Kaapse Provinsiale Regering is om die “Kaap te laat groei”– iKapa Elihlumayo – en dit moet by die onderwys begin, veral as ons die menslike hulpbronne wat ons benodig om groei en vooruitgang vir almal te verseker, wil ontwikkel.

Ek is verheug om aan te kondig dat die 2003 Senior-sertifikaatuitslae ons toewyding aan die "Groeiende Kaap” en veral tot die menslike hulpbronne wat ons benodig hiervoor, weerspieël.

Die matriekslaagsyfer is beslis nie ons enigste suksesaanduider is nie – ons stel net soveel belang in die werklike getal kandidate wat slaag, asook die gehalte van die uitslae.

Dit is byvoorbeeld betreklik maklik om die slaagsyfer te verbeter deur die getal kandidate te verlaag wat aan die eksamen deelneem, of deur slegs diegene as kandidate te registreer wat waarskynlik sukses in die eksamen sal behaal.

Ons is egter nie geneë met sulke praktyke nie. Ons sal slegs tevrede wees met die uitslae as ons ‘n werklike toename in die getal kandidate ervaar wat vir die eksamen inskryf, en wat dit slaag.

Om bloot te slaag is ook nie voldoende nie – ons provinsie soek eerder meer kandidate wat goed slaag. Ons meet dus die gehalte van ons uitslae, onder andere, ook aan die getal kandidate wat met matrikulasie-endossement, meriete en onderskeiding slaag.

Ons in die onderwys in hierdie provinsie is tot uitnemendheid verbind, en ons sal hierdie uitnemendheid erken deur vanoggend ‘n wye verskeidenheid toekennings te maak.

Ons gebruik die begrippe ‘uitnemend’ of ‘uitmuntend’ nie ligtelik nie. Ons het die uitslae sorgvuldig bestudeer, en wil erkenning gee aan diegene wat na behore presteer het.

Daar is velerlei maniere om uitnemendheid te erken. Die senior-sertifikaatslaagsyfer is een daarvan. Maar ewe belangrik is die werklike getal kandidate wat slaag, asook die gehalte van die uitslae.

Net so belangrik is die mate waarin skole met verloop van tyd hulle goeie uitslae handhaaf. Goeie uitslae wat deurlopend voorkom, weerspieël goeie bestuur, goeie onderrig, goeie dissipline, en die vermoë om ‘n hunkering na leer te ontwikkel.

Volgehoue gehalte uitslae weerspieël ‘n voortgesette verbintenis tot uitnemendheid, en dit moet ook erken word.

Die omgewing waarin ‘n skool hom bevind en waarin onderrig moet plaasvind, is ook van kardinale belang. Ons verleen erkenning aan alle skole wat uitstaande uitslae behaal.

Ons moet egter ‘n spesiale plek gee aan daardie skole wat uitblink ten spyte van haglike sosio-ekonomiese omstandighede.

Hulle uitslae weerspieël ‘n grootse toewyding aan sukses teen alle verwagtinge in. Ons lig ons hoed vir hierdie skole en sal vanoggend aan etlike onder hulle erkenning verleen.

Die afgelope jaar het ons telkemale die deurvoertempo in ons skole aangespreek. Ons inskrywingsgetalle toon dat verreweg te veel kandidate die skool verlaat voordat hulle hul matriekjaar voltooi het.

Gelukkig het baie van ons skole hierdie saak deeglik ter harte geneem en spreek dit doeltreffend aan.

Ek is dus bly om vandag ‘n nuwe toekenning aan te kondig wat spesifiek pogings om die deurvoertempo te verbeter, erken. Mnr Swartz sal binnekort verdere besonderhede hieromtrent verskaf.

Ons departement, Die Wes Kaapse Onderwysdepartement is nie net daarop bedag om die deurvoertempo en werklike getal suksesvolle kandidate te verhoog nie. Ons is ook bekommerd omtrent die aantal werksgeleenthede en geleenthede vir verdere studie van ons kandidate, veral gegewe die huidige stand van die arbeidsmark.

Om hierdie rede sal ons voortgaan om met ons vennote in die regering en die arbeids- en die sake-sektor saam te werk, ten einde indiensnemingsmoontlikhede en toegang tot finansiële bystand vir verdere studie, verder te verhoog.

Ek wil graag ons ‘top twintig’ matrikulante van 2003, tesame met al ons skole en ander indiwidue wat vandag toekennings ontvang het, gelukwens.

Ek wil ‘n spesiale woord van dank rig aan ons onderwysers vir hulle volgehoue toewyding en bydrae tot die sukses van die matriekklas van 2003. Waar ons die matrikulante van 2003 gelukwens met hulle sukses, mag ons nie vergeet dat hierdie sukses ook die toewyding weerspieël van die onderwysers wat die afgelope twaalf jaar die pad saam met hulle geloop het nie.

Ons sien daarna uit om nog harder met ons skool-bestuurspanne, beheerliggame, unies en onderwysers saam te werk ten einde die gehalte van die onderwys in hierdie provinsie deurgaans te verbeter. Kom ons verseker dat ons altyd die hoë standaarde handhaaf waarop hierdie provinsie hom roem.

Ek wil graag ons senior amptenare en hulle spanne bedank en gelukwens met die hantering van vanjaar se matriekeksamenprosesse.

Dit sluit in die Onderwyshoof in die Wes-Kaap, mnr. Ron Swartz; die Adjunk Direkteur-Generaal: Onderwysbeplanning en –ontwikkeling, mnr. Brian Schreuder; ons Hoofdirekteur: Onderwysbeplanning, me. Penny Vinjevold; die Direkteur: Kurrikulumontwikkeling, me. Jenny Rault-Smith; en ons Direkteur: Eksamens, mnr. Andre Clausen.

Ek wil ook ons waardering uitspreek teenoor al ons vennote in die onderwys, in die regering en in die privaat sektor vir hulle bydra ter ondersteuning van ons groot taak om gehalte onderwys vir een en almal in hierdie provinsie te verseker.

Die fondament wat ons benodig om die welslae van onderwys in die Wes-Kaap te verseker, is nou gelę.

Laat ons nou saamwerk om die taak te voltooi, die Kaap te laat groei, en ‘n nog blinker toekoms vir ons almal te bewerkstellig.

Verwys toespraak

Navrae: Rudi Buys 082 577 6551


Uitgereik deur::
Die Direktoraat: Kommunikasie
Wes-Kaap Onderwysdepartement
Tel: (021) 467-2531
Faks: (021) 461-3694
E-pos: pattwell@pgwc.gov.za


 return to: Home | Media Releases Index page
©2003 WCED