Verklaring deur Ron Swartz, Wes-Kaapse Hoof van Onderwys

Die Wes-Kaap Onderwysdepartement (WKOD) gaan in Januarie 2004 'n nuwe skool open vir leerders van regoor die provinsie wat in matriek wil uitblink in Wiskunde en Wetenskap.

Die skool sal as die Kaapse Akademie vir Wiskunde, Wetenskap en Tegnologie bekend staan en is op die perseel van die gewese Constantia Seunskool. Die nuwe skool sal vir dogters sowel as seuns wees.

Die Akademie sal 'n belangrike rol speel deur 'n toename te veroorsaak in die aantal leerders in die Wes-Kaap wat matriek slaag met Wiskunde en Wetenskap op die hoër graad.

Die nuwe skool sal leerders van alle bevolkingsgroepe akkommodeer met spesiale klem op leerders van voorheen benadeelde gemeenskappe.

Die WKOD sal in 2004 begin om klasse aan te bied vir Graad-10-leerders. Die Akademie sal Graad 10 en 11 in 2005 en Graad 10, 11 en 12 in 2006 aanbied.

Die skool kan tans 210 leerders akkommodeer wat 60 koshuisgangers insluit. Die WKOD wil graag leerders regoor die provinsie lok wat dalk nog nie toegang tot gevorderde onderrig in Wiskunde en Wetenskap in hulle tuisdorpe het nie.

Die skool vorm deel van 'n breër strategie om leerderprestasie in Wiskunde en Wetenskap in die Wes-Kaap te verbeter.

Die Akademie bied die kans van 'n leeftyd vir leerders om die kennis en vaardighede te bekom wat hulle nodig het om goeie uitslae in Wiskunde en Wetenskap te behaal. Dit sal deure oopmaak tot verdere onderwys en beroepe waarvoor hierdie vakke 'n vereiste is.

Die skool sal hoofsaaklik fokus op die onderrig van Wiskunde, Wetenskap en Rekenaarwetenskap op die hoër graad, maar sal ook ander matriekvakke aanbied.

Die matriekvakke wat aangebied gaan word is, Engels, Afrikaans, Xhosa, Wiskunde, Natuur en Skeikunde, Rekenaarwetenskap, Biologie en Rekeningkunde.

Die skool sal ook 'n wye reeks buitemuurse aktiwiteite aanbied, soos Klubs vir Wetenskap en Astronomie, uitstappies na wetenskap-verwante sentrums, soos navorsingsinstitute en hoë-tegnologie-besighede.

Die akademie bied aan:

• Beurse vir behoeftige leerders
• Ervare, hoogs gekwalifiseerde personeel
• Die mees moderne fasiliteite
• Vervoer vir dagleerders tussen Heathfield- en Retreat-stasie en die Akademie
• Veilige, bestendige leeromstandighede in 'n pragtige omgewing
• Residensiële verblyf vir leerders
• Veilige, bestendige leeromstandighede in 'n pragtige omgewing
• Uitstekende sport- en ontspanningsgeriewe

Die Akademie sal, bykomend tot gespsialiseerde onderrig, 'n sentrum hê vir die ontwikkeling van goeie onderwyspraktyk, 'n indiensopleidingfasiliteit vir onderwysers en student-onderwysers, 'n sentrum vir kurrikulumontwikkeling, en 'n na-ure-ondersteuningsentrum vir onderwysers, leerders, en ouers.

Die skool sal ook 'n sentrum hê waar werkgewers toekomstige werknemers kan identifiseer en ondersteun deur middel van beurse by die skool en ander hoëronderwysinrigtings.

Ons werk saam met plaaslike en oorsese vennote om die nodige steun aan die Akademie te bied. Ons almal weet dat intervensies soos dié nodig is om die menslike bronne op te bou wat nodig is vir ekonomiese groei en ontwikkeling.

Ons moet almal dus met vennote op alle vlakke saamwerk om te verseker dat ons die geleenthede vir leer bied wat deure vir ons leerders kan oopmaak, veral dié van voorheen benadeelde gemeenskappe.

Verdere inligting en kontakbesonderhede is beskikbaar by hoërskole, die WKOD Onderwysbestuurs-en-ontwikkelingsentrums en die WKOD se webwerf ( hier ) of soek in die A-Z-indeks vir Cape Academy of Mathematics, Science and Technology by http://wced.wcape.gov.za .