Verklaring deur André Gaum, Minister van Onderwys in die Wes-Kaap

Skoolbeheerliggame behoort die reg te hê om onderwysers en skoolhoofde vir harde werk, toegewydheid en prestasie op ‘n billike wyse te beloon. Dit strook volledig met die beginsel wat ek onderskryf: Net soos daar gevolge vir volgehoue mislukking behoort te wees, moet harde werk en sukses beloon word.

Wetgewing wat skoolbeheerliggame wil kniehalter om onderwysers en skoolhoofde te beloon op ‘n wyse wat billik is teenoor hulle en ouers, plaas ekstra druk op provinsies wat reeds sukkel om goeie onderwysers te behou. My departement het trouens reeds in opdrag van my ‘n plan beraam om te voorkom dat ons so baie onderwysers verloor en om leerders aan te moedig om onderwysers te word.

Hierdie is nog ‘n voorbeeld van die nasionale onderwysdepartement wat van provinsies verwag om onrealistiese en kortsigtige besluite te implementeer. Die nuwe voorgestelde wetgewing is nie polisieerbaar nie en dus onafdwingbaar.

Daar is heelwat wigte en teëwigte wat reeds in die onderwysstelsel bestaan ten einde té hoë skoolgeld te voorkom. Sò byvoorbeeld kan ouers aansoek doen om kwytskelding of gedeeltelike kwytskelding van skoolgeld as hulle dit nie kan bekostig nie. Skole weet ook dat die risiko van nie-betaling van skoolgeld verhoog as skoolgeld styg.

Dit is inderdaad onaanvaarbaar as skole sulke hoë skoolgeld hef dat dit ouers as’t ware "uit die mark prys". Skerp vrae behoort te ontstaan wanneer twee skole dieselfde diens lewer maar hulle skoolgeld dramaties verskil. Ouers is egter deur middel van beheerliggame die beste geplaas om hieroor ‘n wakende oog te hou en nie die staat wat "big brother" probeer speel nie.

Ek wil egter ook ouers aanmoedig om betrokke te raak by beheerliggame en seker te maak dat hulle geld goed bestee word en nie vir onaanvaarbare luukses gebruik word nie.