Verklaring deur André Gaum, Minister van Onderwys in die Wes-Kaap

Beheerliggaamverkiesings sal tussen April en Oktober 2003 vir alle skole in die Wes-Kaap gehou word.

Ingevolge die Suid Afrikaanse Skolewet moet elke openbare skool ‘n skoolbeheerliggaam daarstel om die skoolgemeenskap te verteenwoordig en die skool te bestuur. Die beheerliggaam is, onder andere, vir die volgende verantwoordelik:

• Die bevordering van die belange en die ontwikkeling van die skool deur die verskaffing van kwaliteitopvoeding aan alle leerders
• Die aanvaarding van ‘n grondwet en die ontwikkeling van ‘n missiestelling vir die skool
• Die aanvaarding van ‘n gedragskode vir leerders
• Die administrasie en beheer van die skool se eiendom en geboue en terrein, insluitend koshuise
• Die opstel van ‘n jaarlikse begroting en die beheer oor uitgawes en inkomstes van die skool (skoolfonds, ens.)
• Die maak van aanbevelings aan die Onderwyshoof met betrekking tot die aanstelling van opvoeders en nie-opvoeders

Die verkiesing van skoolbeheerliggame bied aan skoolgemeenskappe die geleentheid om skole te omskep in inrigtings waarop hulle trots kan wees. Dit bied aan skoolgemeenskappe die geleentheid om hulle demokratiese reg uit te oefen om te stem vir verteenwoordigers van hulle keuse.

Ek doen daarom 'n beroep op alle skoolgemeenskappe en ander rolspelers om deel te neem aan die komende verkiesings van beheerliggame. Sonder almal se aktiewe betrokkenheid kan die visie van goeie opvoeding vir alle leerders in die Provinsie nie verwesenlik word nie.

Prinsipale van openbare skole sal elke leerder se ouers van ‘n kennisgewing voorsien met die datum, tyd, en plek van hulle skool se verkiesingsvergadering.