Verklaring deur André Gaum, Minister van Onderwys in die Wes-Kaap

Ek het gister op Stellenbosch van meer as 400 leerders 'n petisie (wat ook deur onderwysers geteken is) oor godsdiensbeoefening in skole ontvang. Die petisie dring daarop aan dat godsdiensbeoefening op skool behou moet word.

Die petisie is regstreeks in stryd met die dokument van die nasionale departement van onderwys getiteld: "Beleid: Godsdiens in Opvoeding" wat poog om godsdiensbeoefening by skole te belet. Die Burger het vanoggend oor die dokument berig.

Die petisie is deur leerders van verskillende skole op Stellenbosch onderteken. Ek ondersteun die inhoud daarvan heelhartig.

Ek is daarvan oortuig dat derduisende onderwysers en leerders dwarsoor Suid-Afrika hierdie aandrang op die behoud van godsdiensbeoefening sal ondersteun en selfs bereid sal wees om, indien nodig, soortgelyke petisies te onderteken.

Ek is oortuig daarvan dat godsdiensbeoefening 'n kritieke rol het om in ons skole te speel, en deel die sentiment van die leerders en onderwysers wat die petisie onderteken het in hierdie verband.

Ons kan nie toelaat dat die eksplisiete reg op godsdiensbeoefening in staatsinstellings (soos vervat in ons land se grondwet en die SA Skolewet) op enige wyse ondergrawe word nie.

Ons moet enige poging in die verband sterk teenstaan.

Artikel 15 (2) van die grondwet bepaal: "Godsdienbeoefening kan by staats- of staatsondersteunde instellings geskied, mits

    (a) daardie beoefening reëls nakom wat deur die tersaaklike openbare gesag gemaak is;

    (b) dit op billike grondslag geskied; en

    (c) bywoning daarvan vry en vrywillig is.

Artikel 7 van die SA Skolewet bepaal dat onderhewig aan die grondwet en die toepaslike provinsiale wetgewing, godsdienstige gebruike wel by publieke skole mag plaasvind volgens reëls wat deur die beheerliggaam bepaal is en in soverre as wat sulke gebruike op 'n billike wyse plaasvind en deelname daaraan vrywillig is vir leerders en personeellede.

Die morele herlewing en -herbewapening van ons samelewing hang grootliks af van die rol van godsdiens in ons gemeenskappe en ons skole.

Godsdiens in skole kan ook 'n belangrike rol speel sover dit die versoening van en verdraagsaamheid onder mense betref.

Die handves van basiese regte soos vervat in ons grondwet beskerm taal-, kultuur- en godsdiensregte, en dit is binne die raamwerk van diversiteit 'n belangrike uitdaging vir die nasionale regering en provinsiale regerings om toenemend vordering te maak met die implementering van hierdie regte.

Om hierdie rede is godsdiensbeoefening by skole 'n uiters belangrike saak.

Godsdiensbeoefening in skole moet natuurlik op so 'n wyse plaasvind dat daar nie diskriminasie teen godsdiensgroepe plaasvind nie.

Die beoefening van 'n bepaalde godsdiens moet nie teen die sin en wil van die mense op hul afgedwing word nie en godsdiensvryheid moet beskerm word.

Die uitdaging lê daarin om in die praktyk maatreëls te vind wat billike beoefening van alle godsdienste wat in 'n bepaalde skool ter sprake is, moontlik maak.

Ek het alreeds in 'n persoonlike gesprek met Minister Asmal my kommer oor die betrokke dokument teenoor hom uitgespreek. Ons kon nie konsensus oor die betrokke kwessie bereik nie. Hy het egter aangedui dat hy die kwessie weer met my sal bespreek, wat ek uiteraard bereid is om te doen.

Ek hoop dat die verslag van die taakspan wat Minister Asmal oor godsdiens-beleid in skole adviseer, godsdiensbeoefening in skole sal ondersteun en dat Minister Kader Asmal, Nasionale minister van onderwys, sy departement se huidige dokument oor hierdie kwessie sal onttrek en 'n positiewe aanbeveling oor godsdiensbeoefening van die taakspan sal aanvaar.