Verklaring deur André Gaum, Minister van Onderwys in die Wes-Kaap

Ek verwelkom Minister Asmal se aankondiging dat hy wyer gaan konsulteer aangaande die uitbreiding van skyfskiet in skole.

Dit is vreemd dat hy nie met die Minister van Veiligheid en Sekuriteit oor só ‘n sensitiewe kwessie gekonsulteer het nie, aangesien dié Minister tog vir binnelandse veiligheid verantwoordelik is.

Alhoewel daar niks met skyfskiet in skole perse verkeerd is nie sal ek beslis nie die verspreiding van wapens na skole waar dit nie voldoende beveilig kan word nie, ondersteun nie. Enige optrede wat ‘n risiko vir die veiligheid van ons skole inhou, is onverantwoordelik.

Die beskikbaarstelling van wapens aan skole in gebiede waar geweld voorkom, is moeilikheid soek, aangesien dit van die skole ‘n regstreekse teiken sal maak. Te midde van die bende geweld wat ons nou weer so intens beleef en die onmenslike druk wat dit op ons skole plaas, kan ons nooit iets goedkeur wat skole nog te meer in teikens verander nie.

Dit sal daarom nie in die Wes-Kaap gebeur nie.