1. Inkqubo yokuqeshwa komqeshwa wenkonzo karhulumente obambeleyo kwisikhundla esiphezulu esingenamntu esihlawulelwayo nengcaciso ngokuhlawulwa kwesibonelelo sokubambela kwiimeko ezilolu hlobo, yayaziswe kwiiSetyhula 0003/2013, 0010/2010, 0142/2003 no-0103/2002. Le ngcaciso imfutshane yeyokongezelela kwimiqathango yezi setyhula zangaphambili.

2. Makungqinelwane ngqo nale nkqubo ilandelayo, ngokwemigqaliselo yeSahluko 1, kwiCandelo (Part) VII, kumhlathi B5 weMimiselo yeNkonzo kaRhulumente ka-2016, iSigqibo 9 sika-2001 neSigqibo 1 sika-2002 se-Public Service Coordinating Bargaining Council (PSCBC) ngokumalunga neentlawulo zokubambela xa kutyunjwa abaqeshwa benkonzo karhulumente amabaqeshwe njengababambeleyo kwisikhundla esiphezulu esingenamntu esihlawulelwayo:

  1. Kuphela ngumqeshwa oqeshwe isigxina liSebe leMfundo leNtshona Koloni (ISebe iWCED) ongaqeshwa njengobambeleyo kwisithuba esiphezulu esingenamntu esihlawulelwayo. Nakuphi na ukuqeshwa ngemvumelwano (contract appointment) makwenziwe kwisithuba esikwinqanaba eliphezulu.
  2. Ithuba lokuqeshwa malibe lelingakhange liqhawuke yaye libe ngaphezu kweeveki ezintandathu, kodwa lingadluli kwiinyanga eziyi-12.
  3. Makwenziwe isicelo esitsha sethuba elingaphezu kweenyanga eziyi-12. Isicelo esilolu hlobo asiyi kuthathwa njengokwandiswa kwexesha yaye siya kuthathwa njengesicelo /njengemvumelwano/njengethuba lokubambela elitsha.
  4. Intloko yecandelo mayazise umqeshwa ngencwadi ebhaliweyo ngokuqeshwa kwakhe njengobambeleyo kwisikhundla esiphezulu, esingenamntu, esihlawulelwayo yaye umqeshwa makakwamkele okanye akukhabe ukuqeshwa kwakhe ngencwadi ebhaliweyo.
  5. Isibonelelo sokubambela siya kuhlawulwa, ngokuxhomekeka ekubeni isithuba asinamntu yaye siyahlawulelwa. (Akuyi kuhlawulwa sibonelelo sokubambela kubasebenzi ababambeleyo kwisithuba eso ngenxa yokuba umqeshwa osesikhundleni osisigxina esekhefini.)
  6. Isibonelelo sokubambela ngumahluko phakathi kwenotshi yomvuzo womqeshwa awufumana ngelo xesha nenotshi yomvuzo womntu oqalayo kwisithuba esiphezulu esingenamntu esihlawulelwayo.
  7. Ukuba umqeshwa ukwinotshi yomvuzo (kuqukwa inotshi eyenzelwa yena buqu (personal notch))engaphezulu kwenotshi yomvuzo womntu oqalayo kwisithuba esiphezulu esingenamntu esihlawulelwayo aqeshwe kuso, isibonelelo sokubambela siya kuba ngumahluko phakathi kwenotshi yomvuzo wakhe ngelo xesha nenotshi yomvuzo ophezulu ochaphazelekayo kwisithuba esiphezulu esingenamntu esihlawulelwayo, ngokuxhomekeke ekubeni ukhona umahluko.
  8. Isibonelelo sokubambela asixhuzulwa mali yomhlalaphantsi.
  9. Isibonelelo sokubambela siya kuhlawulwa qho ngenyanga, ngokuxhomekeke ekubeni intlawulo yokuqala yenziwa kwinyanga elandela ukugqitywa kweeveki ezintandathu ezikhankanywe kumhlathi 2(b) apha ngentla.
3. Inkqubo yokutyumba abagqatswa:

  1. Inqununu mayibatyumbe abagqatswa.
  2. Umphathi wesekethe makangqinisise ukuba iyangqinelana na nemigqaliselo inkqubo yokutyunjwa yaye makaqinisekise ukuba afikile onke na amaxwebhu phambi kokusivuma nokusithumela isicelo kuMlawuli weCandelo lokuGaya nokuKhetha aBasebenzi.
  3. Apho kukho ngaphezu komgqatswa omnye, inqununu mayazise ngesithuba kwalapha ngaphakathi yaye mayisebenzise inkqubo yokhetho engakhethi cala.
  4. Umgaqo-nkqubo weSebe iWCED ukwalungiselela nokuba abasebenzi abangaphezu kwemfuneko okanye abanye abaqeshwa abanamabanga emfundo afanelekileyo kwicandelo, banikwe ithuba lokubambela ngokubolekisanayo (on a rotational basis).
4. Le fom yesicelo iqhotyoshelwe apha yesibonelelo sokubambela mayingeniswe kuMlawuli weCandelo lokuGaya nokuKhetha aBasebenzi ukwenzela ukuba kulungiswe intlawulo. Izizathu ezibhaliweyo ezivokothekileyo nezikucacisa ngokupheleleyo oku, mazihanjiswe kunye naziphi na iimeko ezitenxileyo kule migqaliselo imiselweyo.

5. Ukuqeshwa kwabo bonke abaqeshwa ababambeleyo kuxhomekeke kwimvume yoMlawuli oyiNtloko weCandelo loLawulo lweMicimbi yaBasebenzi ngoBuchule. Makwenziwe zonke iinzame zokufumana imvume phambi kokuqalisa komqeshwa kwisithuba sokubambela.

6. Abaqeshwa mabaqaphele ukuba ukuqeshwa kwabo njengababambeleyo akubaniki lungelo okanye balindela ukuba baqeshwe isigxina ngokukhawuleza sakuba isithuba eso sipapashiwe.

7. Kucelwa wazise ngokuqulethwe yile ngcaciso imfutshane kubo bonke abaqeshwa abachaphazelekayo ukuze bakuthathele ingqalelo.


ISAYINWE: NGU-L ELY
USEKELA MLAWULI-JIKELELE WEENKONZO ZEZIKO
UMHLA: 2018:07:06

"Nomination for an acting appointment"  (ubukhulu: 97 KB)