1. Die prosedure vir die aanstelling van 'n inrigtingsgebaseerde opvoeder in 'n hoër vakante en befondsde pos in 'n waarnemende hoedanigheid, en inligting oor die betaling van 'n toelae vir 'n waarnemende hoedanigheid in sodanige gevalle, is in Omsendbrief 0031/2003 en 0045/2002 oorgedra. Hierdie minuut vul die bepalings van die vorige omsendbriewe aan.

2. Daar moet by die volgende prosedures, soos gestipuleer in Kollektiewe Ooreenkomste 8/2001, 8/2002 en 1/2008 van die Raad op Arbeidsverhoudinge in die Onderwys (RAVO) oor die betaling van toelaes vir waarnemende hoedanigheid gehou word wanneer inrigtingsgebaseerde opvoeders vir aanstelling in 'n waarnemende hoedanigheid in hoër vakante en befondsde poste genomineer word.
2.1 Algemene maatreëls

  1. Slegs 'n werknemer wat permanent deur die Wes-Kaap Onderwysdepartement (WKOD) aangestel is mag in 'n waarnemende hoedanigheid in 'n hoër vakante en befondsde pos of in 'n pos waar die permanente posbekleer afwesig is (onderworpe aan paragraaf 2.2 en 2.3 hieronder) aangestel word. Enige kontrakaanstelling moet dus op die hoër posvlak gedoen word.
  2. 'n Opvoeder wat aan die minimumvereistes in paragraaf 2(2) van Hoofstuk B van die Personeeladministrasiemaatreels voldoen, sal skriftelik deur die hoof/prinsipaal van die inrigting in 'n hoër vakante en befondsde pos in 'n waarnemende hoedanigheid aangestel word. Die opvoeder moet dus aan die minimumvereistes van die hoër pos voldoen ten einde te kwalifiseer om in daardie pos waar te neem en moet die aanstelling skriftelik aanvaar of van die hand wys.
  3. 'n Opvoeder sal al die verantwoordelikhede wat met die pos saamgaan vir die tydperk waarin hy/sy aangestel word, aanvaar.
  4. 'n Opvoeder mag slegs aangestel word om waar te neem in 'n hoër vakante en befondsde pos wat een vlak hoër as sy/haar huidige pos is. Enige afwykings moet ten volle gemotiveer en deur die kringbestuurder en distriksdirekteur aanbeveel word.
  5. 'n Toelae vir 'n waarnemende hoedanigheid is die verskil tussen die werknemer se huidige salariskerf (sonder voordele) en die aanvangskerf van die hoër vakante en befondsde pos (sonder voordele).
  6. Indien 'n werknemer op 'n salarisskaal ('n persoonlike kerf ingesluit) is wat hoër as die aanvangskerf van die hoër vakante en befondsde pos waarin hy of sy aangestel is, sal die toelae vir 'n waarnemende hoedanigheid 6 kerwe wees.
  7. 'n Toelae vir 'n waarnemende hoedanigheid is niepensioendraend.
  8. Indien die aanstelling in 'n waarnemende hoedanigheid by 'n inrigting of kantoor is wat geografies van die werknemer se huidige werkplek verwyderd is, sal die betaling van 'n toepaslike reis- en verblyftoelae ook oorweeg word.
2.2 Hoër vakante en befondsde poste
'n Toelae vir 'n waarnemende hoedanigheid sal slegs op die volgende voorwaardes aan 'n opvoeder betaal word:

  1. Die aanstelling in 'n waarnemende hoedanigheid is in 'n hoër vakante en befondsde pos.
  2. Die aanstellingstydperk is ononderbroke en langer as ses weke, maar tot 'n maksimum van 12 maande beperk.
  3. Die pos behoort binne 12 maande nadat dit vakant geword het, geadverteer en gevul te word.
  4. 'n Nuwe aansoek moet vir 'n tydperk wat 12 maande oorskry, gedoen word. Sodanige aansoek sal nie as 'n verlenging gereken word nie en sal as 'n nuwe aansoek/kontrak/waarnemende tydperk hanteer word.
  5. Vergoeding sal teruggedateer word na die datum waarop die opvoeder begin waarneem het, mits die eerste betaling plaasvind in die maand wat die voltooiing van die ses weke, waarna in paragraaf b) hierbo verwys word, volg.
2.3 Waarneming in 'n hoër vakante en befondsde pos waar die permanente posbekleer afwesig is

  1. Indien die waarnemingstydperk langer as 12 weke is, maar beperk is tot 'n maksimum van 12 maande, sal 'n toelae vir 'n waarnemende hoedanigheid slegs betaal word aan 'n opvoeder wat in 'n pos waarneem waar die permanente posbekleer as gevolg van die volgende afwesig is:
    1. Kraamverlof
    2. Siekverlof
    3. Skorsing
    4. Tydelike oorplasing
    5. Goedgekeurde spesiale verlof
  2. Vergoeding sal teruggedateer word na die datum waarop die opvoeder begin waarneem het, mits die eerste betaling plaasvind in die maand wat die voltooiing van die 12 weke, waarna in paragraaf a) hierbo verwys word, volg.
3. Die nominasieproses:

  1. Die hoof van die inrigting/prinsipaal moet die nominasie maak.
  2. Die hoof van die inrigting/prinsipaal moet verifieer dat die nominasie aan die voorskrifte voldoen en seker maak dat alle dokumentasie aangeheg word voordat die aansoek aanbeveel en na die kringbestuurder gestuur word.
  3. Die beheerliggaam sal versoek word om die WKOD aan te beveel dat die opvoeder, wat deur die hoof van die inrigting/prinsipaal genomineer is, aangestel word om in 'n hoër vakante en befondsde pos waar te neem.
  4. Waar daar meer as een kandidaat is, moet die prinsipaal en beheerliggaam die pos deur 'n objektiewe keuringsproses gaan.
  5. Die beleid van die WKOD maak ook daarvoor voorsiening dat botallige personeel of ander toepaslik gekwalifiseerde werknemers in die afdeling die geleentheid gebied word om op 'n roteringsbasis waar te neem.
4. Die aangehegte aansoekvorm vir 'n toelae vir 'n waarnemende hoedanigheid moet by die Direkteur: Werwing en Keuring vir die prosessering van betaling ingedien word. 'n Volledige skriftelike motivering moet enige afwyking van die voorskrifte saamgaan.

5. Die gesag om die aanstellings vir waarnemende hoedanighede vir inrigtingsgebaseerde opvoeders goed te keur, berus by 'n amptenaar op posvlak 6 (kringbestuurder) van die distrikskantoor waarin die inrigting geleë is. Alle pogings moet aangewend word om goedkeuring voor die aanvang van 'n waarnemende aanstelling te verkry.

6. Die pos waarin waargeneem word, behoort binne 12 maande nadat dit vakant geword het, geadverteer en gevul te word, behalwe waar die permanente posbekleër met kraamverlof, met siekverlof, geskors, tydelik oorgeplaas of met goedgekeurde spesiale verlof is. 'n Motivering moet met sodanige aansoeke saamgaan.

7. Werknemers moet daarop let dat hul waarnemende aanstelling nie die reg op 'n permanente aanstelling in die pos bied sodra dit geadverteer word nie.

8. Bring asseblief die inhoud van hierdie minuut onder die aandag van alle werknemers.


GETEKEN: L ELY
ADJUNK DIREKTEUR-GENERAAL: KORPORATIEWE DIENSTE
DATUM: 2018:07:06

"Nomination for an acting appointment"  (grootte: 101 KB)