Alle staatsdiens- (SD-) personeel en hulle lynbestuurders (adjunk-direkteurs-generaal, hoofdirekteure, direkteure, HUB's van VOO-kolleges, en prinsipale van skole) word daaraan herinner dat alle werknemers wat aangestel is onder die Staatsdienswet van 1994 jaarliks ingevolge die Personeelprestasiebestuur-en-ontwikkelingstelsel (PPBOS) volgens die voorskrifte van die Staatsdiensregulasies van 2001 geassesseer word.

Hierdie minuut verduidelik die vereistes vir die PPBOS 2009-2010-evalueringsiklus en verwittig alle SD-personeel van die dokumente wat ingedien moet word. Alle lynbestuurders word versoek om by die bepaalde keerdatums te bly.

Vir die 2009-2010-siklus sal die PPBOS-dokumente van personeellede op Salarisvlak 11 en 12 gehanteer word ooreenkomstig die werking en vereistes van die PBIS (PERMIS).

 A. KEERDATUMS
1. Die evalueringsiklus vir alle SD-personeel begin op 1 April van elke jaar en eindig op 31 Maart van die volgende jaar.
2. Lynbestuurders moet seker maak dat alle SD-personeel hulle finale prestasie-oorsigsessies vir die 2009-2010-siklus met hulle onmiddellike toesighouers of lynbestuurders afsluit.
3. Alle SD-personeel en hulle onmiddellike toesighouers of lynbestuurders moes reeds besluit het oor 'n datum vir hulle finale prestasie-assessering. Dit sal ook alle lynbestuurders in staat stel om die geloofwaardigheid van alle assesseringsdokumente van hulle werknemers te verifieer voordat die dokumente teen 28 Mei 2010 aan die Direktoraat: Interne-menslikekapitaalbestuur voorgelê word.
4. Lynbestuurders word daaraan herinner dat alle vereiste dokumente wat op die lys in hierdie minuut verskyn ingedien moet word en dat slegs die oorspronklike weergawes van die dokumente aanvaar sal word. Geen uitstaande dokumente sal na 28 Mei 2010 aanvaar word nie.

 B. BYLAES WAT VIR SALARISVLAK 1 - 10 INGEDIEN MOET WORD
1. Al die bylaes op die volgende lys moet ingedien word: (Elektroniese weergawes van hierdie dokumente is aangeheg.)
Bylae A: Individuele Prestasieplan (IPP)
Bylae B: Individuele Ontwikkelingsplan (IOP)
Bylae C: Prestasie-oorsiginstrument (Twee opgetekende prestasie-oorsigsessies word
vereis - Bylae C1 en C2)
Bylae D: Prestasie-assesseringsinstument
Bylae E: Prestasiesertifikaat
Bylae F: Motivering vir "Aanbevelenswaardige" of "Uitmuntende" assessering
Bylae G: Nominasie vir 'n kontantbonus
2. Dien asseblief Bylae A, B, C1 en C2 teen 26 Februarie 2010 in by die betrokke beampte wie se naam in paragraaf E2 hieronder verskyn.
3. Lynbestuurders en toesighouers moet seker maak dat alle afdelings van al die bylaes voltooi en deur die betrokke beamptes onderteken word.
4. Twee opgetekende oorsigsessies word vereis. Die Bylae C-vorm moet aandui dat die prestasie-oorsigsessies halfjaarliks opgeteken is (een in die eerste helfte en een in die tweede helfte van die evalueringsjaar). Twee Bylae C-vorms (Bylae C1 en C2) moet dus vir elke werknemer ingedien word.
5. In die verlede is verskeie weergawes van Bylae E gebruik. Vir hierdie evalueringsiklus sal slegs die aangehegte weergawe van Bylae E aanvaar word.
6. Alle bylaes wat by hierdie minuut aangeheg is, word beskou as amptelike dokumente en is die enigste dokumente wat aanvaar sal word.
7. In gevalle waar werknemers 'n algemene aanslag van laer as "Bevredigend" ontvang het, moet Bylae H voltooi word. Bylae H sal dan deel uitmaak van die vereiste lys dokumente vir indiening.

 C. DOKUMENTE WAT VIR SALARISVLAK 11 EN 12 INGEDIEN MOET WORD
1. Al die dokumente op die volgende lys moet ingedien word:
Prestasie-ooreenkoms
Prestasie-oorsigte vir al vier kwartale van die siklus
Finale aanslag
2. Dien asseblief die Prestasie-ooreenkoms en die drie Oorsigte vir die drie kwartale tot Desember 2009 teen 26 Februarie 2010 in by die betrokke beampte wie se naam in paragraaf E2 hieronder verskyn.
3. Lynbestuurders en toesighouers moet seker maak dat al die afdelings op PBIS voltooi en deur die werknemer en toesighouer onderteken is.

 D. NOMINASIE VAN SD-PERSONEEL VIR MONETÊRE TOEKENNINGS
1. Die getal SD-personeellede wat vir kontantbonusse genomineer mag word, word bepaal deur die goedgekeurde modereringstruktuur vir die PPBOS-siklus.
2. Toesighouers of lynbestuurders moet 20% (soos per die normale verspreidingskurwe) van hulle SD-personeeldiensstaat wat binne salarisvlak 1 tot 12 val, vir 'n kontantbonus nomineer.
3. Op skoolvlak moet die hele SD-personeelkomplement gebruik word vir die berekening van die 20% van werknemers wat vir 'n kontantbonus genomineer sal word. Slegs personeellede wat 'n algehele aanslag van óf "Aanbevelenswaardig" óf "Uitmuntend" ontvang het, afgesien van beroepskategorie, mag vir 'n kontantbonus genomineer word.
4. By VOO-kolleges word slegs die dokumente van Adjunk-HUB's ingedien by die beamptes wie se name in paragraaf E2 verskyn.
5. Die volgende is van toepassing slegs op kantoorgebaseerde SD-personeel:
5.1 Slegs 20% van die kantoorgebaseerde werknemers mag genomineer word vir 'n kontantbonus en slegs werknemers wat 'n algehele aanslag van "Aanbevelenswaardig" of "Uitmuntend" ontvang het, mag oorweeg word.
5.2 Die getal SD-personeel in 'n direktoraat wat binne salarisvlak 1 tot 12 val, moet gebruik word om die 20% van SD-werknemers wat vir 'n kontantbonus genomineer word, te bepaal. Die 20%-riglyn sal ook dien as 'n kontrolemaatreël vir lynbestuurders.)
6. Wanneer die getal personeellede wat vir 'n kontantbonus genomineer mag word, bereken word, moet die antwoord tot die naaste heelgetal afgerond word. Voorbeelde: Indien u berekening op 'n antwoord van 1.4 uitloop, mag u slegs een SD-personeellid nomineer. Indien u antwoord 2.5 is, mag u 3 SD-personeellede nomineer.
7. In gevalle waar daar slegs een personeellid op die diensstaat is, mag daardie lid vir 'n kontantbonus genomineer word as hy of sy 'n algehele aanslag van óf " Uitmuntend" óf "Aanbevelenswaardig" ontvang het.
8. Bylae G sal die lys bevat van SD-personeel wat deur die Sentrale Modereringskomitee (SMK) vir 'n kontantbonus oorweeg sal word. Hierdie dokument moet deur die lynbestuurder onderteken word. Die oorspronklike bylae moet by die assesseringsdokumente van die genomineeerde personeellede aangeheg word.
9. Versuim om die vereiste Bylae G in te dien, sal daartoe aanleiding gee dat die SMK van die WKOD na goeddunke toekennings vir die betrokke direktoraat of inrigting sal maak. Die samestelling van die SMK, asook sy rolle en funksies, sal in 'n later stadium verduidelik word.
10. Die aanslae vir personeellede op salarisvlak 11 en 12 sal ooreenkomstig die PBIS geskied.

 E. VERSAMELING VAN ASSESSERINGSDOKUMENTE
1. Die MH-praktisyns wat Hoofkantoor en die onderwysdistrikskantore dien, sal reëlings tref met alle lynbestuurders om die vereiste dokumente teen die keerdatums te versamel.
2. Die volgende beamptes sal verantwoordelik wees vir die koördinering van die versamelingsproses:

Hoofkantoor: Rudolph Joorst021 467 9298
Hoofkantoor: Colleen Abrahams021 467 2474
Onderwysdistrik Metro-Sentraal: Richard Horne021 467 2201
Onderwysdistrik Metro-Noord: Richard Horne021 467 2201
Onderwysdistrik Metro-Suid: Bevin Jacobs021 467 2469
Onderwysdistrik Metro-Oos: Bevin Jacobs021 467 2469
Onderwysdistrik Weskus: Mark van der Vendt021 467 2509
Onderwysdistrik Kaapse Wynland: Mark van der Vendt021 467 2474
Onderwysdistrik Eden en Sentrale Karoo: Leon Kouta021 467 2066
Onderwysdistrik Overberg: Leon Kouta021 467 2066
Bring asseblief die inhoud van hierdie minuut onder die aandag van alle staatsdienspersoneel onder u beheer.

GETEKEN: PA VINJEVOLD
HOOF: ONDERWYS
DATUM: 2010:01:04

Die volgende MS Word dokument hou met hierdie notule/omsendbrief verband.
MS Word word benodig om hierdie dokument te lees / druk.
Om die dokument te lees/bewaar, kliek op die naam hieronder.

Bylae A - G  (".doc" weergawe - grootte: 948 KB)   |   Bewaar en later "unzip"  ("zip" version - grootte: 698 KB)