1. Die Wes-Kaap Onderwysdepartement (WKOD) sal weer gedurende Oktober en November 2007 navorsing oor die vlakke van geletterdheid en gesyferdheid onder alle graad 6-leerders in die provinsie onderneem.
2. Prinsipale moet daarop let dat hierdie toetse WKOD-assesseringstoetse is en NIE die Sistemiese Evalueringstoetse van die nasionale Departement van Onderwys nie, wat 'n steekproef van graad 3-leerders aan die einde van hierdie jaar sal toets.
3. Prinsipale moet ook daarop let dat die Suid-Afrikaanse Konsortium vir die Monitering van Onderwysgehalte (SACMEQ) se toetse onder 'n steekproef van graad 6-leerders later hierdie jaar afgeneem sal word. Dit is 'n evaluering van graad 6 in sub-Sahara-Afrika. Die Direktoraat: Gehalteversekering sal meer inligting hieroor voorsien.
4. Die Graad 6-assessering het ten doel om prestasie te meet en om leerders se vordering met betrekking tot geletterdheid en gesyferdheid te bepaal. Hierdie assessering sal ook 'n remediërende funksie hê en sal die WKOD help met die beplanning van ondersteuning en ontwikkelingswerk by skole.
5. Die Graad 6-assesseringstoets sal gebaseer word op die standaarde soos uiteengesit in die WKOD se Teikenstandaarde vir Geletterdheid en Gesyferdheid en die Nasionale Kurrikulumverklaring (NKV).
6. Voorbereidings het begin en alle skole met graad 6-leerders sal mettertyd in kennis gestel word van die prosedure en ander administratiewe besonderhede.
7. In teenstelling met die vorige assessering waarin slegs 'n maksimumsteekproef van 40 leerders getoets is, sal die hele kohort van graad 6-leerders in 2007 getoets word.
8. Skole word versoek om hulle syfers vir graad 6 gereeld op SOBIS by te werk, omdat die Assesseringsleerderregister twee dae voor die toetsdag op SOBIS ingevul moet word en dan uitgedruk moet word.
9. Die Vraelys vir Prinsipale en die Vraelys vir Onderwysers vir alle Intermediêrefase-onderwysers sal ook op SOBIS geplaas word. Die vraelyste moet twee dae voor die toetsdag ingevul en uitgedruk word en aan die toetsadministrateur oorhandig word.
10. Die inhoud van hierdie minuut moet onder die aandag van alle betrokkenes en veral die graad 6-onderwysers gebring word.
11. Enige navrae rakende die inhoud van hierdie minuut moet gerig word aan dr RS Cornelissen by telefoonnommer 021 467 2286 of per e-pos by rcornelissen@pgwc.gov.za.

U samewerking sal waardeer word.



GETEKEN: P. PRESENT
HOOF: ONDERWYS
DATUM: 2007:05:29