| 1. |
Die Wes-Kaap Onderwysdepartement (WKOD) sal 'n grondlynassessering in Februarie en Maart 2008 doen van alle graad 4-leerders by 522 primêre, intermediêre en gekombineerde skole in Nasionale Kwintiele 1, 2 en 3. Hierdie assessering sal deur die hele land afgeneem word met behulp van gestandaardiseerde toetsinstrumente wat deur die Departement van Onderwys verskaf is.
|
| 2. |
Die bedoeling van die grondlynassessering is om die huidige vlak van geletterdheid en gesyferdheid in die geïdentifiseerde skole te meet sodat die impak van toekomstige WKOD-intervensies in hierdie skole ge-evalueer kan word. Dit is 'n kritieke komponent van die Program vir Gehalteverbetering, Ontwikkeling, Ondersteuning en Opheffing (GLOOO) om ondersteuning te verskaf en die gehalte van onderwys in hierdie skole te verbeter.
|
| 3. |
Aanvanklik sou die grondlynassessering se teikengroep aan die einde van die 2007 akademiese jaar graad 3-leerders gewees het. Aangesien die Sistemiese Evaluering van graad 3 in September vanjaar gedoen is, is daar besluit om hierdie grondlynassessering vir vroeg in 2008 te skeduleer. Die presiese datums vir die individuele assessering van skole sal vroeg in die nuwe jaar bekendgemaak word.
|
| 4. |
Leerders sal geassesseer word ooreenkomstig die graad 3-leeruitkomste en assesseringstandaarde vir Geletterdheid en Gesyferdheid. Graad 4-opvoeders word dus versoek om die leeruitkomste en assesseringstandaarde vir graad 3 se Geletterdheid en Gesyferdheid met hulle graad 4-leerders te hersien, sodat die assesseringsuitkomste 'n goeie weergawe van leerderprestasie sal wees.
|
| 5. |
Prinsipale word versoek om die inhoud van hierdie minuut onder die aandag van alle personeellede en ouers te bring.
|
GETEKEN: L.J. ROSE
HOOF: ONDERWYS
DATUM: 2007:11:27
|