1. Die Staatsdiens Koõrdinerende Bedingingsraad het op 18 November 2003 (SDKBR- Resolusie 7 van 2003) `n ooreenkoms aangegaan om voorsiening te maak vir die erkenning van diens in die nie-statutêre magte as pensioengewende diens vir die doeleindes van verlenging van diens as bydraende lid van die Regeringswerknemerspensioenfonds. Die ooreenkoms het op 31 Maart 2004, die datum van publikasie van die betrokke gewysigde reëls van die Regeringswerknemerspensioenfonds, in werking getree. Alle werknemers wat moontlik kwalifiseer as begunstigdes, word die geleentheid gebied om aansoek te doen om sodanige diensjare te laat erken as pensioengewende diens.
2. Persone wat moontlik sou kwalifiseer, is alle werknemers wat lede van die onderskeie voormalige nie-statutêre weermagdienste was wat voor of op 31 Maart 2002 in die Staatsdiens aangestel is. Die omvattende definisie van `n ''voormalige lid van `n nie statutêre weermagdiens'' word vervat in afdeling 1 van die Regeringswerknemerspensioenreëlswysigingswet van 2003 en sluit persone in wat intussen die Staatsdiens verlaat het (bv. as gevolg van aftrede, bedanking, ontslag, ens.), sowel as persone wat aangestel is maar nooit tot die RWPF toegelaat is nie.
3. Nie-statutêre weermagdiens kan ingevolge die volgende riglyne erken word:
3.1 Dit word eerstens gedefinieer as diens in die periode tussen die gesertifiseerde datum van aansluiting by die voormalige nie-statutêre weermag (maar uitgesluit nie-statutêre weermagdiens voor die ouderdom van 16) en die aanstellingsdatum in die Staatsdiens.
3.2 Dit sal soos volg op `n glyskaal erken word:
3.2.1 50% van die diens sal erken word vir voormalige lede met minder as 10 jaar diens in die nie-statutêre weermag, en
3.2.2 100% van die diens sal erken word vir voormalige lede met 10 en meer jare diens in die nie-statutêre weermag.
3.3 Van personeellede wat in aanmerking kom, sal vereis word om teen `n koers van 5% by te dra in ooreenstemming met die diens wat erken word. Vir personeellede vir wiedit onmoontlik is, of wat verkies om nie die werknemersbydrae te betaal nie, sal pensioengewende diens dienooreenkomstig verminder word.
3.4 Personeellede wat voordeel trek uit hierdie ooreenkoms, sal uitgesluit word van enige voordele betaalbaar ingevolge die Wet op Spesiale Pensioene van 1966. Enige en alle bedrae betaalbaar aan personeellede wat kwalifiseer vir `n spesiale pensioen of gedemobiliseerde voordeel onder die Demobiliseringswet van 1966 op die datum van erkenning van nie-statutêre weermagdiens, sal in aanmerking geneem word by die berekening van addisionele diens in hierdie verband, behalwe as lede verkies om die waarde van hierdie voordeel aan die fonds terug te betaal.
4. Indien enige personeellid van mening is dat hy of sy oor voormalige nie-statutêre weermagdiens beskik wat moontlik ingevolge voormelde reëls in ag geneem behoort te word vir toevoeging tot pensioengewende diens as lid van die Regeringsdienspensioenfonds, moet volle besonderhede van die termyn wat hy of sy in sodanige hoedanigheid gedien het aan die Personeelkantoor (Staatsdienspersoneel) te hoofkantoor per faks of telefonies voorsien word voor of op 30 Maart 2007.
5. Die inhoud van hierdie omsendminuut moet asseblief onder die aandag van al die personeellede onder u beheer gebring word.


GETEKEN: W.T. WILKINSON
HOOF: ONDERWYS
DATUM: 2007:03:28