1. Die LUR van Plaaslike Regering en Behuising, mnr. R.Q. Dyantyi, in samewerking met die Departement van die Premier, onderneem 'n bewusmakingsveldtog oor openbare deelname aan geïntegreerde ontwikkelingsbeplanning ('n geïntegreerde ontwikkelingsplan weerspieël die gemeenskap se behoeftes). Die veldtog duur van 21 Februarie tot 31 Maart 2007.
2. As deel van die bewusmakingsveldtog gaan lede van die gemeenskap versoek word om vraelyste in te vul en daarna dié vorms te plaas in houers wat by plaaslike klinieke, skole, maatskaplike dienspunte en polisiekantore geplaas sal word.
3. Die fokuspunt van die veldtog is om deelnemende demokrasie op plaaslike vlak te verbeter deur gemeenskappe aan te moedig om aan die proses vir geïntegreerde ontwikkelingsbeplanning deel te neem. Om dit te bereik sal leerders, as deel van hulle burgerlike opvoeding, aangemoedig word om hulle ouers en familielede oor te haal om aan die veldtog deel te neem.
4. Die Departement van Plaaslike Regering en Behuising soek na 'n vennootskap met skole en leerders om gemeenskapsbewustheid te versterk en om groter verantwoordelikheid daarvoor te neem om munisipaliteite aanspreeklik te hou vir gehaltediens. 'n Ander voordeel van dié veldtog is dat dit 'n geleentheid bied vir leerders om hulleself uit te druk as burgers met spesiale behoeftes waaraan die munisipaliteite ernstige aandag moet skenk.
5. Gemeenskapsontwikkelingswerkers sal met skoolhoofde saamwerk en vanaf 21 Februarie 2007 vraelyste aan leerders verskaf om huis toe te neem vir hulle ouers om in te vul en dit dan in die houer by die skool te plaas.
6. Ons doen 'n beroep op skole om leerders aan te moedig om soveel as moontlik van die ingevulde vraelyste terug te bring. Die skool wat die meeste voltooide vraelyste bymekaarmaak sal spesiale erkenning geniet, en 'n prys van die Departement van Plaaslike Regering en Behuising ontvang.
7. Die kontakpersoon vir hierdie veldtog is mnr Heinrich Magerman, waarnemende Direkteur: Openbare Deelname by 021-483-2865 of 082-301-2884. Indien u meer duidelikheid verlang aangaande hierdie belangrike projek, kan u hom gerus skakel.
8. Die WKOD ondersteun hierdie projek en sal dit baie waardeer indien skole en beheerliggame kan saamwerk om van hierdie veldtog 'n sukses te maak.


GETEKEN: J.H. LYNERS
HOOF: ONDERWYS
DATUM: 2007:02:27