Namens die Wes-Kaap Onderwysdepartement wil ek graag van hierdie geleentheid gebruik maak om die matriekklas van 2007 voorspoed toe te wens met die Senior Sertifikaat-eksamen.

Vanjaar is 'n geskiedkundige geleentheid, aangesien dit die laaste jaar is waarin die Senior Sertifikaat-eksamen soos ons dit ken, geskryf sal word. Ons besef terdeë dat dit 'n spannende tyd was hierdie. Baie van julle het onder moeilike omstandighede gestudeer en daar moes baie ingesit word om daarvan 'n suksesvolle jaar vir alle graad 12-leerders in al ons skole te maak. Dit sal ook 'n emosionele tyd wees vir baie van julle, waar julle van julle skool en baie van julle vriende sal moet afskeid neem.

Nietemin wil ons julle aanmoedig om gefokus te bly, terwyl julle julle studieprogramme voltooi. Hierdie eksamen sal die belangrikste eksamen in julle skoolloopbaan wees. Dit sal 'n sleutelrol vervul in die bepaling van julle vooruitsigte vir verdere studie en vir die werkwêreld.

Ons beste wense vergesel julle waar julle 'n nuwe hoofstuk in julle lewens begin. Ons is trots op julle dat julle dit so ver gebring het. Dit weerspieël julle karaktervastheid en vasberadenheid om sukses te behaal. Ons het volle vertroue dat julle dit sal kan doen.

Ons wil by julle daarop aandring dat julle voortbou op die onderwys wat julle sover ontvang het en bydra tot die uitbouing van ons wonderlike provinsie en land.

Aan diegene van julle wat nie hierdie keer sukses sal behaal nie, moenie moed opgee nie. As 'n provinsie bied ons vele geleenthede vir julle om julle skoolopleiding te voltooi en verder te studeer. Spesiale reëlings is getref vir vanjaar se matrieks om die Senior Sertifikaat te kan voltooi tussen nou en 2011, indien nodig.

Terwyl julle matriek skryf, kan julle reken op die volle ondersteuning van die provinsiale regering, die Wes-Kaap Onderwysdepartement, skole, ouers, families en gemeenskappe. Ek wens julle alles van die beste toe.

Vriendelike groete