| 1. |
Die implementering van die GGBS is tans in sy eerste jaarlikse siklus en die meeste van die basislynevaluerings is afgehandel. Op hierdie tydstip is ons in die Ontwikkelingsfase.
|
| 2. |
Die Wes-Kaap Onderwysdepartement (WKOD) bied deurentyd indiensonderrig en -opleiding en ander verwante ontwikkelingsprogramme dwarsoor die provinsie aan. Die opleidings- en vaardigheidsontwikkelingsintervensies vir opvoeders berus grootliks op die inhandiging van ‘n skoolverbeteringsplan (SVP) aan die kringbestuurder.
|
| 3. |
Dit is van die grootste belang dat alle uitstaande SVP’s en basislynuitslae onmiddellik ingedien word en dat kringbestuurders en prinsipale versoek word om hierdie proses te prioritiseer. ‘n Vertraging in die proses sal die gespesialiseerde ontwikkelings- en ondersteuningstrategieë beïnvloed wat by die betrokke skool voorsien moet word. Dit moet ook beklemtoon word dat nie alle ontwikkelings- en ondersteuningstrategieë die verantwoordelikheid van die OBOS is nie. Die personeelontwikkelingspan (POS) by ‘n skool moet ook, waar die vermoë en vaardighede beskikbaar is, verantwoordelikheid aanvaar vir die ondersteuning en ontwikkeling van opvoeders.
|
| 4. |
POS’e word ook aangeraai om die breë beplanning van die summatiewe evaluering, wat vroeg in die vierde kwartaal ten einde loop, af te handel. Summatiewe evaluerings moet nie met die afneem van die Senior Sertifikaat-eksamen en algemene take vir assessering by skole inmeng nie, en deeglike beplanning moet in hierdie verband gedoen word. Opvoeders wat verantwoordelik is vir graad 9 en 12 moet geëvalueer word deur middel van leswaarneming voordat hulle leerders met hulle finale eksamen begin. GGBS-koördineerders in die OBOS’e kan in hierdie verband om hulp genader word.
|
| 5. |
Prinsipale word weer eens herinner dat daar ingevolge die vereistes van Resolusie 8 van 2003 (GGBS) van hulle verwag word om onderrig te gee. Die WKOD het in hierdie verband met die nasionale Departement van Onderwys (DvO) oorleg gepleeg aangesien heelwat navrae ontvang is met betrekking tot prinsipale wat onderrig moet gee. Die aangeleentheid word op nasionale vlak oorweeg.
|
| 6. |
Dit is belangrik dat alle skoolgebaseerde opvoeders in diens van die WKOD moet hou by bogenoemde resolusie wat die GGBS bereël. Indien die bestuursplan, soos aangeneem deur die Provinsiale Opleidingspan, nie geïmplementeer en gevolg word nie, kan dit lei tot ernstige dissiplinêre stappe. Kringbestuurders is verantwoordelik vir die monitering en implementering van die GGBS in hulle kringe en hulle moet ongerymdhede aan die direkteur van die OBOS rapporteer.
|
| 7. |
Met verwysing na die betalingsbevordering op 1 Julie 2005 wag ons op ‘n amptelike instruksie van die DvO, met wie die aangeleentheid bespreek word.
|
| 8. |
Ons wil graag weer eens die skole bedank wat hulle basislynevaluerings voltooi het en hulle SVP’s ingedien het ooreenkomstig die bestuursplan vir die GGBS. Hulle word gelukgewens met hulle toewyding aan die gebruik van die magtige instrumente van die GGBS ten einde hulle onderrig en leer te verbeter.
|
| 9. |
Bring asseblief die inhoud van hierdie dokument onder die aandag van alle betrokkenes.
|
GETEKEN: L.J. ROSE
HOOF: ONDERWYS
DATUM: 2005:08:01
|