| 1. |
Die Wes-Kaap Onderwysdepartement (WKOD) het groot erns daarmee om vakante opvoedersposte in ‘n permanent hoedanigheid te vul. Die permanente aanstelling van personeel met die gepaardgaande voordele sal uiteraard 'n reuse bydrae lewer tot die bevordering van stabiliteit in die onderwysprofessie. |
| 2. |
Dit is egter met groot teleurstelling dat die WKOD bekend moet maak dat alhoewel 3582 vakante poste in die konsepvakaturelys verskyn, daar net meer as 700 advertensies deur prinsipale voltooi is. Verder was slegs 311 van die aantal advertensies wat ingesleutel is, geldige advertensies ten opsigte van opvoedersposte. Die res was óf duplikaatadvertensies óf advertensies ten opsigte van Staatsdiensposte, bv. Administrasieklerke, Voormanne, Skoonmakers, ens. Hierdie optrede is ‘n aanduiding van ‘n gebrek aan die verbintenis met betrekking tot die advertering van permanente poste en word met ernstige bekommernis bejëen. Verwys asseblief ook na DPE-minuut 0008/2004 gedateer 3 Desember 2004. |
| 3. |
In die lig van bogenoemde, het die WKOD besluit om die uitreiking van Vakaturelys 2/2005 tot 5 Augustus 2005 uit te stel ten einde prinsipale ‘n verdere geleentheid te bied om die uitstaande advertensies te voltooi. Prinsipale word versoek om die uitstaande advertensies voor Donderdag, 4 Augustus 2005 te voltooi in te sleutel. Hulle kan die besonderhede via die WKOD webbladsy by http://wced.wcape.gov.za (sien A - Z index, Draft Vacancy List) insleutel. Verwys asseblief na Personeelbestuurminuut (KS-Opvoeders) 0010/2005 gedateer 18 Julie 2005. |
| 4. |
Kringbestuurders en Senior Kringbestuurders is voorsien van die lys van name van die skole wat nog advertensies moet indien (insleutel). Hulle is versoek om te verseker dat die uitstaande advertensies ingedien (ingesleutel) word. |
| 5. |
Die WKOD beskou die nie-indiening van advertensies vir vakante poste in ‘n ernstige lig en sal ongelukkig oorweging daaraan moet skenk om verdere stappe te neem teen prinsipale wat voortgaan om ons versoeke te verontagsaam om die advertensies soos vereis, in te dien (in te sleutel). |
| 6. |
Bring asseblief die inhoud van hierdie minuut onder die aandag van alle opvoeders in u inrigting/kantoor/direktoraat. Prinsipale moet ook seker maak dat ‘n afskrif van hierdie minuut aan die voorsitter van die skoolbeheerliggaam oorhandig word vir kennisname deur daardie liggaam. |
GETEKEN: JH HURTER
HOOF: ONDERWYS
DATUM: 2005:08:02
|