Prys uitdeeling by Durbanville Hoërskool.

Toespraak deur Minister Donald Grant, Minister van Onderwys, Wes Kaap

Dr Brand, Distrik Direkteur van die WKOD
Mnr Germishuys
Dr Theron, Voorsitter van die Beheerliggaam
Lede van die Beheerliggaam
Geagte gaste
Personeel
Ouers en leerders van Durbanville Hoërskool

Dankie vir u vriendelike uitnodiging om saam met u te wees by hierdie belangrike geleentheid, asook vir die hartlike woorde van verwelkoming.

Van al die uitnodigings vir 'n toespraak wat ek aanvaar, is funksies soos hierdie vir my die grootste uitdaging omdat daar so 'n verskeidenheid van hoorders in een plek is - personeel, vriende van die skool, ouers en leerders.

Om met almal te wil gesprek voer beteken dat jy op die ou end nêrens gaan nie. Sonder enige verskoning, is my benadering altyd om met die jongmense te praat wie se ontwikkeling en prestasies hier gevier word. Buitendien - as daar een ding is wat ek as ouer en nou voltyds in die wêreld van die onderwys, geleer het - dan is dit dat in skole alles gaan oor jongmense en HULLE ontwikkeling.

Heel aan die begin wil ek al die leerders wie se harde werk, kwaliteit en prestasies vanaand hier erken is van harte gelukwens.

Ek verkeer onder geen illusie oor die hoeveelheid volgehoue harde werk en moeite wat deur die meeste mense gedoen moet word om ware sukses te behaal nie.

In sy onderskeie boeke oor die tema "hoe goeie gehalte herlei word na uitmuntende gehalte", kom Jim Collins in sy ontleding van wat sukses bring, tot die volgende gevolgtrekking:

"Voortreflikheid is nie 'n produk van omstandighede nie; voortreflikheid, so blyk dit, is grootliks 'n kwessie van doelbewuste keuse en dissipline."

Selde in die lewe eindig ons waar ons wil wees net per ongeluk. Ons rus onsself toe, ons beplan en ons sit skouer aan die wiel.

So, wel gedaan aan al die pryswenners. Julle verdien beslis hierdie erkenning.

Terwyl ons individuele leerders se sukses vier, vier ons ook hierdie skool se sukses.

Ek is al te lank met skole besig om nie te besef dat die positiewe beeld van hierdie skool en sy gemeenskap nie net die som van al die prestasies is van diegene wat vanaand erken word nie.

Net so belangrik is die duisende klein alledaagse suksesse wat deur julle almal in hierdie skool behaal word - die eenmalige, die informele - dog vir die persoon wat dit bereik - ewe belangrik. Ook aan julle almal, welgedaan.

Ons moet ook daaraan herinner word dat om in 'n taak te misluk of 'n rugby- of netbalwedstryd te verloor, nie van ons mislukkings of verloorders maak nie. Indien dit wel die geval sou gewees het, sou baie mense eenvoudig net nie die dinge probeer doen het, wat hulle wel doen nie. Ons sal mos nie altyd suksesvol wees nie.

Maar ons moet almal uitdagings aanpak omdat dit vir ons belangrik is. Om te probeer kos dikwels moed en verg van ons om bo onsself en ons beperkings uit te styg en in hierdie poging is daar 'n spesiale soort sukses opgesluit. Ons is nie mislukkings omdat ons somtyds misluk nie. Goeie skole, soos Durbanville HS, bied aan jongmense 'n beskermde omgewing waarin nuwe en moeilike uitdagings aangedurf kan word sonder om 'n permanente prys te betaal.

Ek is seker dat elke leerder wat Durbanville HS verlaat, die lewe buite hierdie skool met groter selfvertroue sal benader juis as gevolg hiervan.

Ek wil dus graag, en ek glo ek doen dit namens julle ook, vir die Skoolhoof, mnr Germishuys, en die hele personeel van hierdie skool hartlik bedank vir hulle lewensbelangrike rol in alles hier.

(Kom ons gee vir hulle almal 'n goeie applous, asseblief.)

Aan ons graad 12's...van hier gaan julle uit in wat mense graag die werklike wêreld noem.

Die wêreld wat julle sal binnegaan, is 'n kombinasie van die nuwe tegnologieë, die verwydering van hindernisse en die ontploffing van kennis. Dit is 'n wêreld van toenemende geleenthede maar ook een van groter kompetisie. Kom ons kyk kortliks na 'n paar hiervan:

• daar word bereken dat ongeveer 20% van die jongmense in 'n gemiddelde skoolsaal soos hierdie in werke sal beland wat nog nie op hierdie oomblik bestaan nie. Nie werke waarvan ons nie bewus is nie, maar werke wat nog nie bestaan nie. Dit laat allerhande soorte vrae ontstaan vir skole en onderwysers oor hoe hulle jongmense voorberei om te kan aanpas, kennis in verskillende kontekste toe te pas en verskillende vorms van werk te hanteer.

• Daar sal meer geleenthede en keuses wees. Dit op sigself is 'n uitdaging. Jong mense wat vandag die skool verlaat in Suid-Afrika is ten minste vry om te reis en op enige ander plek werk te soek. Maar hulle doen dit ook in 'n omgewing waaruit ekonomiese en ander beskerming verwyder is. Dus sal daar ook meer kompetisie wees.

Maar wat van die klas van 2012 wat hier voor my sit vandag? Sal hulle die mas opkom? Wat weet ons van hulle?

• Hulle is ware digitale inboorlinge en noem hulle onderwysers digitale toeriste. Hulle lewe in 'n wêreld waar daar nie 'n dag verbygegaan het sonder internet- en mobiele tegnologie nie. Baie van ons in hierdie saal het 'n groot deel van ons lewe gewoon in 'n Suid-Afrika wat nog nie eers oor televisie beskik het nie.

• Hulle floreer op willekeurige toegang en kan verskeie take gemaklik verrig. Die gesig van jongmense voor 'n rekenaar met selfoon in een hand, iPod in die oor terwyl hulle hulle Wiskunde huiswerk doen dryf my geslag teen die mure uit! Maar hulle kry dit reg. Maar erger nog, hulle kry 90% vir Wiskunde!

• Hulle werk die beste as hulle netwerk en floreer op kitsantwoorde en belonings. Dit is deel van die elektroniesespeletjieskultuur.

• In hulle beroepe sal hulle verhewe finansiële doelwitte en persoonlike doelwitte hê en sal nie hulle werkgewer as hulle beroep beskou nie. Hulle sal eerder vir 'n organisasie werk omdat dit aan hulle behoeftes voldoen.

Hierdie eienskappe word aangevul deur goeie skole soos Durbanville HS, wat vaardighede onderrig soos kommunikasievaardighede, kritiese denke en probleemoplossing, stelseldenke en aanpasbaarheid.

Ek het volle vertroue dan die graad 12-klas van 2012 van Durbanville HS sal weggaan met hierdie vaardighede en beslis goed toegerus sal wees.

My allerbeste wense vir die NSS en julle toekomstige pogings wat nog voorlê.

Heel aan die einde wil ek tog 'n minuut neem om almal van u in hierdie saal te bedank vir die uitmuntende diens wat u lewer deur u ondersteuning van hierdie groot skool.

As ouers, as personeellede, as bestuurders en as vriende lewer u 'n onskatbare bydrae. U speel 'n geweldige groot rol in die bevestiging dat hierdie skool behoorlik gefinansier word, geleë is in 'n breë gemeenskap wat 'n stabiele waardegrondslag verskaf en verantwoordelik gehou word vir sy standaarde.

As mense, laat ons dinge gebeur. Dit is nooit genoeg om te glo dat dinge maar net sal gebeur nie.

Hiervoor dank ek u en sien ek daarna uit om te sien dat daar konstante groei by hierdie skool sal wees - 'n skool wat voortdurend floreer in diens van die lede en jeug van die Durbanville se breë gemeenskap.

Vir navrae, skakel Bronagh Casey:  021 467 2377 or bronagh.casey@westerncape.gov.za.

Media enquiries:
Bronagh Casey
Spokesperson for the Minister of Education, Donald Grant
Western Cape Education Department
Tel: 021 467 2377
Fax: 072 724 1422