| 1. |
Die sewende jaarlikse Nasionale Skole Skynhofkompetisie vir senior leerders (graad 10–11) in Suid-Afrika sal tussen Junie en Augustus 2018 plaasvind. Hierdie kompetisie voorsien `n unieke geleentheid vir leerders om hulle navorsings-, skryf- en voorspraakvaardighede te ontwikkel soos hulle poog om die grondwetlike kwessies waarmee ons land tans gekonfronteer word onder die knie te kry. Die grondwetlike uitdaging of probleemverklaring is gewoonlik hedendaags, maar uniek en stof tot nadenke. Dit is uitdagend, maar bied die geleentheid vir van die mees unieke insigte vanaf die jeug. |
| 2. |
Die Skynhof sal aangebied word met die aktiewe deelname van regsfakulteite van verskeie universiteite, die regering (spesifiek die Departement van Justisie en Grondwetlike Ontwikkeling (DoJ&GO) en die Departement van Basiese Onderwys (DBO)), die georganiseerde regsprofessie, howe en die media. Die Universiteit van Pretoria, Venda, Kaapstad en Wes-Kaap is verantwoordelik vir die voorbereiding van leerders. |
| 3. |
Die taalmedium van hierdie geleentheid sal Engels wees, maar deelnemers sal toegelaat word om enige amptelike tale in die finale ronde te gebruik. |
| 4. |
Alle sekondêre skole in Suid-Afrika word genooi om in te skryf. Hoogstens vyf spanne per skool kan registreer. Elke span sal uit twee leerders bestaan. 'n Fiktiewe (of "hipotetiese") probleem wat 'n grondwetlike kwessie of kwessies insluit, sal opgestel word. Die eerste ronde sal in geskrewe vorm wees. Daar sal van leerders verwag word om twee kort opstelle te skryf, wat die opponerende kante van die saak applikant en respondent), soos gebaseer in die wet van die Republiek van Suid-Afrika, op `n oortuigende wyse uiteensit. Ten einde alle spanne 'n regverdige geleentheid in die kompetisie te bied, sal materiaal oor die Suid-Afrikaanse Grondwet op die internet beskikbaar gestel word en skole sal op versoek 'n harde kopie ontvang. |
| 5. |
Die Wes-Kaap Onderwysdepartement (WKOD) is verantwoordelik vir die provinsiale mondeling. Dit sal in Augustus 2018 in die Kaapse Hooggeregshof plaasvind. Vier skole van die Wes-Kaap sal dan genooi word om aan die nasionale mondelinge rondes by die Johannesburgse Hooggeregshof teen spanne van die ander agt provinsies deel te neem. Hier sal hulle teen mekaar argumenteer om die nasionale wenners te bepaal. |
| 6. |
Die WKOD nooi hiermee alle skole om aan hierdie opwindende kompetisie deel te neem. Voltooi asseblief die registrasievorms en stuur dit per e-pos teen 22 Junie 2018 na die skoolverrykingskoördineerder in u distrik. 'n Lys met e-posadresse is aangeheg. U kan dit ook na Dennis.Pillay@westerncape.gov.za stuur. Voltooi asseblief 'n afsonderlike registrasievorm vir elke span. |
| 7. |
Skole wat registreer, sal met werksessies en begeleiding deur kundiges in die veld bygestaan word. 'n Paar pryse wat die eerste jaar van regstudie by enige Suid-Afrikaanse universitet ondersteun waar hulle toelating verkry, sal aan uitsonderlike deelnemers toegeken word. Vir verdere inligting oor die Skynhof, sien www.up.ac.za/law of kontak u skoolverrykingskoördineerder. |
| 8. |
Bring asseblief hierdie minuut onder die aandag van alle graad 10–11-onderwysers en -leerders. |
GETEKEN: TS MATSELISO
ADJUNK-DIREKDIREK-GENERAAL: INRIGTINGSONTWIKKELING - EN KOÖRDINERING
DATUM: 2018:05:29
|
 |