1. ISebe leMfundo esiSiseko likazwelonke (iDBE) linqwenela ukutsalela ingqwalaselo yakho kwiinkqubo nakwisikhokelo emasithotyelwe xa kuqhutywa iimviwo zokugqibela zepraktikhali ze-Computer Applications Technology (CAT) ne-Information Technology (IT).

2. Le ngcaciso imfutshane mayifundwe ne-Annexure G ye-Regulations pertaining to the Conduct, Administration and Management of the National Senior Certificate (efakelwe izilungiso), epapashwe kwiGazethi kaRhulumente No. 37651 yowe-16 Meyi 2014.

3. Ootitshala nezikolo mabangqinisise ukuba ii-software tools abazisebenzisayo ukufundisa i-CAT ne-IT zihambelana mbo nekhontenti kunye nezakhono ezidweliswe kwiNkcazelo yoMgaqo-nkqubo weKharityhulam noVavanyo (CAPS) ye-CAT ne-IT. Akasayi kulungelelaniswa amaphepha emibuzo ukuze angqinelane nezixhobo zesoftware ezingayithobeliyo i-CAPS.

4. Uviwo lweCAT ngoNovemba 2018 lubonelela ngezi phakheji ze-software zilandelayo:

  1. Iinguqulelo ezintathu zamvanje ze-Microsoft Office ziya kuvumeleka — i-MS Office 2010, i-MS Office 2013 kwane-MS Office 2016 (nekwaziwa ngokuba yi-MS Office 365)
  2. I-HTML editor, umz. i-Notepad ++ yokwenziwa kwamakhasi ewebhu
5. Uviwo lwe-IT ngoNovemba 2018 lunika abafundi iifayili eziya kusetyenziswa ezinezi phakheji ze-software zilandelayo:

  1. i-Delphi 2010 nangaphezulu
  2. i-MS Access 2010 nangaphezulu
6. Zonke izikolo ezifundisa i-CAT kunye/okanye i-IT ziya kwenziwa uphicotho-zincwadi ngabacebisi bezifundo.

7. Ubuninzi ziiseshoni ezimbini ezivumelekileyo ngosuku loviwo. Kucetyiswa la maxesha asikiweyo alandelayo ukwenzela ezi seshoni ngokulandelanayo:

  1. ISESHONI ENYE
INKCAZO IXESHA ELABIWEYO IXESHA
Bahleli kwilabhoretri yeekhompyutha   08:30–08:35
Ukukhupha ii-access cards, inkqubo yokuloga ekhompyutheni nokunika ifolda elinye igama Yimizuzu elishumi elinesihlanu 08:35–08:50
Ixesha lokufunda iphepha lemibuzo Yimizuzu elishumi 08:50–09:00
IPhepha 1 (Ipraktikhali) Ziiyure ezintathu 09:00–12:00
Gqibezela ukutshekisha, ukufumana kwakhona iifolda (retrieve folders), seyivela kwii-CD/kwii-DVD Yimizuzu eyi-120 (koxhomekeka kwinani labafundi) 12:00–14:00
  1. IISESHONI EZIMBINI
INKCAZO IXESHA ELABIWEYO IXESHA: UBUDE BESESHONI YOKUQALA IXESHA: UBUDE BESESHONI YESIBINI
Bahleli kwilabhoretri yeekhompyutha   07:30–07:35 13:00–13:05
Ukukhupha ii-access cards, inkqubo yokuloga ekhompyutheni nokunika ifolda elinye igama Yimizuzu elishumi elinesihlanu 07:35–07:50 13:05–13:20
Lixesha lokufunda iphepha lemibuzo Yimizuzu elishumi 07:50–08:00 13:20–13:30
IPhepha 1 (iPraktikhali) Ziiyure ezintathu 08:00–11:00 13:30–16:30
Gqibezela ukutshekisha, ukufumana kwakhona iifolda (retrieve folders), seyivela kwii-CD/kwii-DVD Yimizuzu eyi-120 (koxhomekeka kwinani labafundi) 11:00–13:00 16:30–18:30

8. Apho kukho iiseshoni ezimbini, abaviwa nabazali babo kufuneka baziswe ngencwadi ebhaliweyo ngala malungiselelo. Abaviwa beseshoni yesibini mabaripote kwiyure phambi kokuphela kweseshoni yokuqala.

9. Akuvumelekanga ukuba abaviwa baphume kwigumbi lokubhalela uviwo kude kube kugqitywe zonke iinkqubo zolawulo ezibhekisele ekuqhutyweni koviwo lwepraktikhali.

10. Ngomhla wokubhalwa koviwo, umgadi wabaviwa oyintloko makaqinisekise ukuba imiyalelo ngokubanzi ekwiphepha lemibuzo le-CAT P1 ifundelwa abaviwa phambi kokunika abaviwa imizuzu elishumi yabo yexesha lokufunda iphepha lemibuzo.

11. Kukhunjuzwa izikolo ngezi ndima nangemisebenzi eluxanduva ngokubanzi yabagadi babaviwa abaziintloko, ootitshala kunye nabaviwa:
11.1 Phambi kokuqala koviwo lwepraktikhali, umgadi wabaviwa oyintloko makaqinisekise ukuba bonke abaviwa:

  1. bazinikiwe ii-access cards yaye babekwa kwiikhompyutha ngokungacwangciswanga (randomly) bakuba bengenile kwigumbi lokubhalela uviwo;
  2. bachazelwa inkqubo yokuloga ekhompyutheni nokunika elinye igama iifolda zoviwo zabo;
  3. babhala iinombolo zabo zoviwo kwii-access cards aze umgadi wabaviwa asteplishele i-access card kwicala elingentla ngasekhohlo kuxwebhu lweenkcukacha zomviwa (candidate’s information sheet); yaye
  4. bayakhunjuzwa ukuba bawuseyive umsebenzi wabo qho nangokuchanekileyo.
11.2 Ngethuba loviwo lwepraktikhali umgadi wabaviwa oyintloko makaqinisekise ukuba:

  1. ukongeza kumgadi wabaviwa, makubekho utitshala onamava weCAT okanye we-IT ngazo zonke iiseshoni zepraktikhali, ukwenzela ukuba abe nokunika uncedo xa kuyimfuneko;
  2. makuthotyelwe zonke iimfuno ezimiselweyo zokugada abaviwa;
  3. zonke iinkqubo zokhuseleko zenziwa phantsi kweliso lomgadi wabaviwa oyintloko; kunye
  4. nokulandelwa kwemigaqo echanekileyo kwimeko apho kunokwenzeka ukuba umke umbane.
11.3 Emva koviwo lwepraktikhali, umgadi wabaviwa oyintloko makaqinisekise ukuba:

  1. abaviwa batshekisha ukuba ingaba zonke iifayili zabo ziseyiviwe na kwiifolda zoviwo yaye zileyibhelishwe ngamanani oviwo achanekileyo azo;
  2. abaviwa bazalisa uxwebhu lwengcaciso yaye baqinisekise ukuba ingcaciso leyo iyangqinelana neefolda zoviwo;
  3. utitshala ufumana kwakhona (retrieves) zonke iifolda zabaviwa ngokusebenzisa i-network okanye i-flash drive ukukhuphela zonke iifolda zabaviwa kwikhompyutha enguvimba (central computer) okanye kwiserver enye, yaye kutshekishwe ukuba iifayili zomviwa ngamnye ezikwifolda yabo ziyangqinelana nengcaciso ekuxwebhu lwengcaciso yabo;
  4. utitshala useyiva zonke iifolda zabaviwa kwii-CD/kwii-DVD eziya kungeniswa ukuba mazimakishwe yaye enze ii-CD/ii-DVD ezimbini zokulalelisa (back-up) ngaxeshanye, enye yazo kufuneka igcinwe ngokunqatyisiweyo kwiziko lokubhalela uviwo enye ingeniswe kwicandelwana leemviwo (examination section);
11.4 Utitshala weCAT/IT makatshekishe ukuba zonke iifolda zabaviwa, ezileyibhelishwe ngamanani oviwo wabaviwa abachaphazelekayo, ziseyivelwe kwii-CD/kwii-DVD kwanokuba iifayili neefolda zingavuleka zonke, phambi kokuba ii-CD/ii-DVD zipakishwe zize zinikwe umgadi wabaviwa oyintloko.
11.5 Ukuba iifolda okanye iifayili zabaviwa zilahlekile, utitshala makazame ukufumana kwakhona (recover) ezo folda okanye iifayili ezilahlekileyo phambi kokuba enze ii-CD/ii-DVD.
11.6 Inani leefolda zabaviwa eziseyivwe kwii-CD/kwii-DVD malingqinelane nenani labaviwa elidweliswe kwimakhishithi.
11.7 Abaviwa be-IT abaprinta ikhowudi yabo mabatshekishe ukuba ikhowudi yawo onke amacandelo iprintiwe kwaza emva koko kwafakwa iiprintawuthi zabo ngolandelelwano oluchanekileyo phambi kokuba zingeniswe ezi zinto kubagadi babaviwa.
11.8 Iifayili zabaviwa akufunekanga ukuba ziseyivwe kwii-flash disks njengoko umkhulu kakhulu umngcipheko wokuba iifayili zonke zinokucima ngenxa yee-viruses ezikwii-flash disks.
11.9 Makungeniswe ingxelo epheleleyo ngazo naziphi na iingxaki zobugcisa (technical problems) okanye izitenxo ekungenzeka ukuba zenzekile ngethuba loviwo kwiCandelo loLawulo lweeMviwo (Directorate: Examinations Administration).
11.10 Utitshala we-CAT/we-IT, ekunye nabagadi babaviwa, mabazalise yaye basayine uluhlu lokutshekisha (isiHlomelo A: Computer Applications Technology and Information Technology 2018 Checklist) balungenise kwiCandelo loLawulo lweeMviwo.

12. Nayiphi na imibuzo engeenkqubo zoviwo lwepraktikhali okanye ezingxamisekileyo mazithunyelwe kuMnu I Francis ngefoni 021 467 2549 okanye ngedilesi ye-imeyili Ighsaan.Francis@westerncape.gov.za.

13. Kucelwa uqinisekise ukuba ikopi yale ngcaciso imfutshane inikwa bonke ootitshala be-CAT ne-IT kunye nabagadi babaviwa ukuze bayithathele ingqalelo.


ISAYINWE: NGU-PAD BEETS
USEKELA MLAWULI-JIKELELE WOLAWULO LWEKHARITYHULAM NOVAVANYO
UMHLA: 2018:10:03

"Annexure A"  (ubukhulu: 78 KB)