| 1. |
Unyaka ka-2014 uphawula isikhumbuzo seminyaka eyi-20 sokuqatshelwa koSuku looTitshala lweHlabathi eMzantsi Afrika. Ukubhiyozela lo mgama sele uhanjiwe, iSebe leMfundo esiSiseko likazwelonke (iDBE) libambe isemina yootitshala apho amagosa emfundo ephondo namahlakani asekuhlaleni (social partners) ayichaze ngayo iminyaka engamashumi amabini edlulileyo yokuqatshelwa koSuku looTitshala lweHlabathi eMzantsi Afrika. |
| 2. |
Esinye seziphakamiso zesemina yayikukuba iDBE mayibambisane neNational Education Collaboration Trust (NECT) kunye neSouth African Council of Educators (SACE), imibutho yootitshala kwakunye namahlakani asekuhlaleni ukuphucula ingcamango yokuqatshelwa kootitshala. |
| 3. |
Oku kukhokelele ekumiselweni kweTeacher Appreciation and Support Programme (TASP) nguMphathiswa weMfundo esiSiseko kazwelonke ngo-2015. |
| 4. |
Ukususela ekumiselweni kweTASP ziziganeko ezibaluleke gqitha ezibini ezabhiyozelwayo: |
| 4.1 |
Ngo-2016, isikhumbuzo seminyaka eyi-40 sovukelo-mbuso lolutsha lwango-1976 eSoweto lwakhunjulwa, kwakunye nesikhumbuzo seminyaka eyi-60 yomngcelele wabafazi owawusiya kwiZakhiwo zoMdibaniso (Union Buildings). |
| 4.2 |
Ngo-2017, isemina yootitshala eyayinomxholo wayo owawusithi, "Teaching in freedom, empowering teachers", yabanjwa nge-05 Oktobha 2017 ukukhumbula iminyaka elikhulu ka-OR Tambo. |
| 5. |
Ngo-2018 isiganeko seTASP esiqhutywa nguzwelonke siya kuqukunjelwa ngomsitho omkhulu wowe-05 Oktobha 2018, ophawula ukubhiyozelwa kweminyaka elikhulu yokuzalwa kongasekhoyo uMnu Nelson Mandela, owayenguMongameli wokuqala wolawulo lwenkqubo yedemokhrasi yaseMzantsi Afrika. |
| 6. |
Umxholo we-2018 TASP uthi, "Teachers and teaching and the commemoration of the Nelson Mandela Centenary during the Fourth Industrial Revolution". |
| 7. |
Kucelwa ootitshala bathathe inxaxheba kwesi siganeko ngokuthumela iingcaciso-ntetho (presentations), ezibethelela iimbono zemfundo ezichaphazela imbono ngokubanzi yengcamango kaMnu Mandela yezemfundo kwanocaphulo oluyindumasi lukaMnu Mandela, "Education is the most powerful weapon which you can use to change the world." |
| 8. |
Ngenxa yoku kungentla, kucelwa ootitshala basilandele isikhokelo ekubonelelwe ngaso njengeso silungelelanisiweyo sisuka kwiikhrayitheriya zeVarkey Foundation esiphathelele kwinkqubo yokufunda nokufundisa yaseklasini, izinto ezenziwe ngutitshala ngempumelelo, ngaphakathi nangaphandle kwaseklasini, ekuncedeni abafundi babe ngabemi abayinxenye yoluntu lwamazwe asondeleleneyo (global citizen) nokuba ngumzekelo onguwo (role model). |
| 9. |
Kucelwa ootitshala bazilungiselele iingcaciso-ntetho ezisekelwe kwisikhokelo ekubonelelwe ngaso kwisiHlomelo. |
| 10. |
Kucelwa ootitshala kwakhona baqwalasele iikhrayitheriya ezimalunga nokufaneleka ukuthatha inxaxheba kwezi ngcaciso-ntetho kumaphepha 6 no-7 wesiHlomelo. |
| 11. |
Iphaneli yokugweba yeTASP iya kugweba iingcaciso-ntetho ukuchonga ezona ngcaciso-ntetho zisithoba zigqwesileyo. Ootitshala abangenise ezi ngcaciso-ntetho baya kucelwa bazokwenza iingcaciso-ntetho zabo kwisemina yomsitho omkhulu wange-05 Oktobha 2018. |
| 13. |
Umhla osikiweyo wokungeniswa kweengcaciso-ntetho yi-31 Agasti 2018. |
| 14. |
Emva kokuba udlulile umhla osikiweyo, amangeno aya kukhutshelwa (uploaded) apha: Zibuza.net app. |
| 15. |
Kukhuthazwa bonke ootitshala babhalise apha: Zibuza.net app eyayenzelwe ngokukodwa ukuqaphela ootitshala kwanokuphuhlisa izakhono zomsebenzi zabo. |
| 16. |
Ootitshala baya kukwazi ukuvotela eyona ngcaciso-ntetho igqwesileyo yaye benze amagqabantshintshi ngokuphathelele kwiingcaciso-ntetho ezo besebenzisa i- Zibuza.net app. |
| 17. |
Ukuvotela ezona ngcaciso-ntetho zigqwesileyo kuya kuvulwa nge-01 Septemba 2018 kuvalwe ngoSeptemba 2018 njengoko kuyalelweyo kwi-Zibuza.net app. |
| 18. |
Iqumrhu eliyiDr CL Smith Foundation liya kuncedisa ngokunjalo ootitshala abangenise iingcaciso-ntetho ekubeni bazuze amanqaku aphathelele kuphuhliso lwezakhono zomsebenzi asuka kwaSACE, njengoko oku kuya kuthathwa njengoDidi 1 (okulilinge oziziqalele wena ngokwakho) lomsebenzi wokuphuhlisa izakhono zomsebenzi. |
| 19. |
Kucelwa ootitshala babe nokuziqhelanisa nokulandelayo: |
| 19.1 |
IsiHlomelo A – isikhokelo kwikhasi 5, umhlathi 13 (a)-(f); |
| 19.2 |
IsiHlomelo A – Iikhrayitheriya zokuqinisekisa ukufaneleka ukungenela kumakhasi 6-7;
|
| 19.3 |
IsiHlomelo A – Imithetho yokhuphiswano ngokubanzi kumakhasi 8–9; kunye |
| 19.4 |
NesiHlomelo B – iikhrayitheriya zenkqubo yokugweba (ezicacisiweyo). |
| 20. |
Kucelwa uqaphele ukuba imihla ngokungqinelana nezi ziHlomelo ihlengahlengisiwe yaye kufuneka ifundwe ngokungqinelana nemihlathi 13 no-17 yale Ngcaciso eMfutshane. |
| 21. |
Ngayo nayiphi eminye imibuzo, kucelwa uqhagamshelane noMnu Gavin de Bruyn, kwiCandelo i-Cape Teaching and Leadership Institute (CTLI), ngokuthumela nge-imeyili apha: Gavin.Debruyn@westerncape.gov.za okanye ngefoni 021 900 5062/37. |
| 22. |
Kucelwa wazise okukule ngcaciso imfutshane bonke ootitshala ukuze bakuthathele ingqalelo. |
ISAYINWE: NGU-PAD BEETS
USEKELA MLAWULI-JIKELELE WOLAWULO LWEKHARITYHULAM NOVAVANYO
UMHLA: 2018:07:04
|
 |