1. Hierdie minuut moet saamgelees word met die Nasionale Beleid oor die Afneem, Administrasie en Bestuur van die Nasionale Senior Sertifikaat-eksamen wat as Staatskennisgewings 372 en 373 in Staatskoerant, Vol. 587 No. 37652, gedateer 16 Mei 2014 gepubliseer is, en die Kurrikulum- en assesseringsbeleidsverklarings (KABV’s) en die Regulasies oor die Program- en Bevorderingsvereistes van die Nasionale Kurrikulumverklaring.

2. Skoolgebaseerde Assessering (SGA), Praktiese Assesseringstake (PAT’e) en Taalmondelingpuntestate
2.1 Die gegenereerde puntestate vir die SGA-, PAT’e- en die Taalmondelingassesserings sal teen 14 September 2018 by skole afgelewer word.
2.2 By ontvangs van die puntestate, moet prinsipale seker maak dat al die nodige vakpuntestate vir hulle skole, wat die kandidate volgens vak weerspieël, ontvang is.
2.3 Die volgende vakpuntestate sal nie aan skole gestuur word nie, maar sal direk by die Senior Kurrikulumbeplanners by Hoofkantoor afgelewer word:

TEGNIESE VAKKE PRAKTIESE VAKKE
Elektriese Tegnologie:
Digitale Stelsels
Elektronika
Kragstelsels

Meganiese Tegnologie:
Motorkunde
Pas en Masjinering
Sweis en Metaalwerk

Siviele Tegnologie:
Siviele Dienste
Konstruksie
Houtwerk

Dansstudies
Ontwerp
Dramatiese Kunste
Visuele Kunste
Musiek
Trinity Musiek
Unisa Musiek
2.4 Let asseblief daarop dat slegs een afskrif van elke puntestaat vir voltooiing voorsien sal word. Dit is dus baie belangrik dat die skool en vakadviseurs afskrifte van die puntestate na moderering maak en vir rekorddoeleindes by die skool en distrik bewaar.
2.5 Skole moet seker maak dat die puntestate voltooi word en op die dag van die moderering aan vakadviseurs beskikbaar gestel word. Vakonderwysers moet slegs die ongemodereerde punt in die "Punt"-kolom invul.
2.6 Slegs na die finale moderering van elke vak, moet vakadviseurs gemodereerde punte korrek na die "Mod"-kolom van die SGA-puntestate oordra.
2.7 Indien die skool die gegenereerde puntestate ontvang slegs nadat die modereringsproses voltooi is, moet die nodige reelings met vakadviseurs vir die voltooiing en aftekening van die puntestate getref word.

3. Toekenning van SGA-, PAT- en Taalmondelingpunte
3.1 'n Punt moet toegeken word aan elke kandidaat wie se eksamennommer op die puntestaat verskyn.
3.2 Dit geld ook vir kandidate wat:

  • geskors of tydelik uit die skool geskors is;
  • aansoek gedoen het om 'n verandering van sentrum;
  • vir 'n langdurige tydperk gedurende die jaar afwesig was;
  • op die dag van die moderering afwesig was;
  • vir 'n vak by 'n ander skool of sentrum, bv. 'n kunssentrum, geregistreer is; of
  • as herhalers/deeltydse kandidate geregistreer is.
4. Uitstaande SGA-, PAT- en Taalmondelingpunte (kandidate wat afwesig was en diegene wat geen SGA-, PAT- en Taalmondelingpunte het nie)
4.1 Indien 'n leerder in gebreke bly om 'n komponent of komponente van die SGA, PAT of Taalmondeling deur die loop van die jaar aan te bied en geldige redes daarvoor gee, moet die leerder nog 'n geleentheid kry om in die toegewysde take geassesseer te word, of die leerder moet die uitstaande werk voor die aanvang van die finale jaareindeksamen (teen 22 Oktober 2018) voorlê. As dit nie moontlik is nie, moet die punt vir daardie komponent of komponente van die SGA, PAT en/of Taalmondeling nie oorweeg word nie. In hierdie besondere geval moet die maksimum punt herbereken word, gebaseer op die oorblywende aantal take (soos na verwys in b).

Tabel 1: Geldige rede (SGA, PAT- en Taalmondelingkomponente van vak met leerder se punte):

  Kompo-nent 1 Kompo-nent 2 Kompo-nent 3 Kompo-nent 4 Kompo-nent 5 Kompo-nent 6 Kompo-nent 7
Maksimum punte 5 5 30 20 40 40 40
Leerder 4 Het nie aangebied nie (geldige rede gegee) 16 Het nie aangebied nie (geldige rede gegee) 20 15 12

SBA mark = (4+16+20+15+12)/(5+30+40+40+40)
= 67/155
= 43%
4.1.1 'n "Geldige rede" in hierdie konteks sluit die volgende in:

  1. siekte, gestaaf deur 'n geldige mediese sertifikaat wat deur 'n geregistreerde mediese praktisyn uitgereik is;
  2. humanitere redes, wat die afsterwe van 'n naaste familielid insluit en deur 'n doodsertifikaat gestaaf word;
  3. verskyning van die leerder in 'n hofsaak, wat deur skriftelike bewyse gestaaf moet word; of
  4. enige ander rede wat as geldig deur die hoof van die assesseringsliggaam of sy of haar verteenwoordiger aanvaar kan word.
4.1.2 Die bewys van sodanige geldige redes moet tydens die modereringsessie saam met bewys van leerderprestasie ingesluit word.
4.2 Indien 'n leerder in gebreke bly om 'n komponent of komponente van die SGA, PAT en Taalmondeling sonder 'n geldige rede aan te bied, moet die leerder die uitstaande werk voor die aanvang van die finale jaareindeksamen (teen Maandag, 22 Oktober 2018) voorlê.

As dit nie moontlik is nie, moet aan die leerder 'n nulpunt ("0") vir daardie komponent of komponente van die SGA, PAT en Taalmondeling toegeken word. In hierdie besondere geval moet die maksimum punt, soos hieronder aangedui (verwys na Tabel 2), bereken word.

Tabel 2: Geen geldige rede nie (SGA-, PAT- en Taalmondelingkomponente van vak met leerder se punte):

  Kompo-nent 1 Kompo-nent 2 Kompo-nent 3 Kompo-nent 4 Kompo-nent 5 Kompo-nent 6 Kompo-nent 7
Maksimum Punte 5 5 30 20 40 40 40
Leerder 4 Het nie aangebied nie (geen geldige rede gegee nie) 16 Het nie aangebied nie (geen geldige rede gegee nie) 20 15 12

SBA mark = 4+0+16+0+20+15+12)/(5+5+30+20+40+40+40)
= 67/180
= 37%
4.3 Indien aan alle komponente 'n nulpunt ("0") toegeken word, sal die leerder 'n onvolledige punt ontvang en moet as afwesig aangeteken word.
4.4 Die volgende scenario's moet ten opsigte van die voltooiing van die puntestate beklemtoon word:
4.4.1 In gevalle waar 'n kandidaat geen take voltooi het nie, maar wel 'n geldige rede daarvoor gegee het, voeg "999" op die puntestaat in. Bewys van geldige rede(s) moet by die modereringsessie aan die vakadviseurs gegee word en na die Direktoraat: Eksamenadministrasie deurgestuur word.

Implikasies van "999":

  • Die kandidaat sal 'n onvoltooide uitslag ontvang, selfs al is die ander eksamenvraestelle geskryf.

  • Die kandidaat sal drie maande na die vrystelling van die uitslae gegee word om SGA- en/of PAT-/Taalmondelingpunte voor te lê. Hierdie uitslae moet teen nie later as 29 Maart 2019 deur die vakadviseurs aan die Direktoraat: Eksamenadministrasie voorgelê word. Versuim om die uitstaande SGA-, PAT- en/of Taalmondelingpunte binne die vasgestelde drie maande na die vrystelling van die uitslae voor te lê, sal daartoe lei dat die kandidaat die hele vak moet herhaal.
4.4.2 In gevalle waar die kandidaat geen take voltooi het en geen geldige rede daarvoor gegee het nie, voeg "444" op die puntestaat in. So 'n kandidaat sal 'n onvolledige uitslag ontvang en moet die hele vak herhaal, insluitende die SGA, PAT of Taalmondeling in die daaropvolgende NSS-jaareindeksamen. Die kandidaat mag nie die aanvullende eksamen in Mei/Junie 2019 aflê nie.
4.4.3 Alle vakkorreksies sal as onreëlmatighede hanteer word. Voeg "888" in die puntekolom en lê 'n motivering en bewys (graad 11 of graad 12 se kwartaal 1 skoolrapport) saam met die voltooide Bylaag A-vorm voor. Die besluit oor die uitslag van die leerder sal deur die Hoof van Onderwys geneem word. Geen vakveranderinge sal toegelaat word nie.

5. Kandidate met spraak- en/of gehoorgebreke
Kandidate met spraak- en/of gehoorgebreke moet, in plaas van die mondelingpunt, 'n pro rata-punt kry, wat gebaseer is op die punte wat hulle in hulle skriftelike werk vir die Junie- en September-eksamens in 2018 behaal het.

6. Prinsipale se aanspreeklikheid vir die voltooiing van puntestate
Prinsipale moet seker maak dat alle NSS-kandidate in hulle skole die vereiste SGA-, PAT- en Taalmondelingpunte toegeken is. Prinsipale moet die puntestaat onderteken nadat dit deur die onderwyser voltooi is, om te verseker dat hulle aan die instruksie van hierdie minuut voldoen.

7. Vakadviseurs se aanspreeklikheid vir die moderering van puntestate
Vakadviseurs neem volle verantwoordelikheid vir die modereringsproses van die SGA-, PAT- en Taalmondelingkomponente, en verseker dat daar aan die moderering, die voltooiing van puntestate en die uitstaande punte voldoen word.

Puntestate of Bylaag A-vorms sal nie deur die Direktoraat: Eksamenadministrasie aanvaar word nie, tensy dit deur die onderwyser, prinsipaal en vakadviseur onderteken is.


8. Keerdatum
Assesserings- en eksamenkoordineerders moet toesien dat die voltooide puntestate die Direktoraat: Eksamenadministrasie teen 29 Oktober 2018 bereik.

9. Uitstaande SGA-, PAT- en Taalmondelingpunte
Prinsipale word versoek om nie kandidate met uitstaande SGA-, PAT- of Taalmondelingpunte direk na die Wes-Kaap Onderwysdepartement (WKOD) te verwys ná die vrystelling van die uitslae nie. Die korrekte prosedure om die WKOD oor uitstaande SGA-, PAT- of Taalmondelingpunte te nader, is deur die vakadviseur by die betrokke distrikskantoor.

10. Prinsipale word versoek om 'n afskrif van hierdie minuut aan graad 12-koordineerders en -onderwysers te voorsien.


GETEKEN: PAD BEETS
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2018:08:20

"Government Gazette, No 37652"  (grootte: 221 KB)
Bylaag A  (grootte: 51 KB)