1. |
In samewerking met die Pan-Suid-Afrikaanse Taalraad (Pansat), die Boekesentrum, die Departement van Kultuursake en Sport (DKES), die Stad Kaapstad, die Biblioteekdienste van DKES, die Afrikaanse Taalraad, die Publishers' Association of South Africa (PASA) en Onderwysbiblioteek- en Inligtingsdienste (EDULIS), sal die Wes-Kaap Onderwysdepartement (WKOD) weer 'n Veeltalige Skeppende Skryfwerkkompetisie vir graad 6 in 2018 aanbied. |
2. |
Die doel van die kompetisies is om die proses van skeppende skryfwerk by jong leerders te verskerp en om 'n liefde vir en belangstelling in die deel van ervarings deur die skryfproses te skep. |
3. |
Aangesien Skeppende Skryfwerk deel van die inhoud van die Kurrikulum- en Assesseringsbeleidsverklaring (KABV) uitmaak, mag onderwysers die punte wat in die kompetisie behaal word vir die eerste Formele Assesseringstaak (FAT) vir Kwartaal 1, wat 'n skoolgebaseerde assessering in Skeppende Skryfwerk is, gebruik. |
4. |
Die WKOD hoop dat hierdie geleentheid graad 6-taalonderwysers sal motiveer om hul leerders aan te moedig om aan hierdie proses deel te neem. |
5. |
Die kompetisies sal in leerders se huistaal afgeneem word. |
6. |
Die wenopstelle sal in 'n veeltalige storieboek, getiteld Uit die pen van die leerder, gepubliseer word. |
7. |
Werksessies sal deur die Taalvakadviseurs in distrikte gereël word om skole met die voorbereiding en verrigting van die kompetisie te ondersteun. |
8.1 |
'n Verskeidenheid vertellende en beskrywende onderwerpe is as Bylae A aangeheg. |
8.2 |
Leerders moet die rowwe en finale opstel/storie in 'n A5-oefeningboek volgens die vasgestelde kriteria in Bylae B skryf en onderwysers moet die geskrewe werk teen middel Maart 2018 volgens die nasienmatriks in Bylae B nasien. |
8.3 |
Onderwysers moet hul beste (d.w.s. net een) opstel/storie, wat hulle op distriksvlak wil inskryf, kies. |
8.4 |
Skole moet teen nie later nie as 23 Maart 2018 die rowwe en finale skeppende skryfwerk-stukke in 'n A5-oefeningboek by die Algemene Onderwys- en Opleidings- (AOO) koördineerder in die distrik indien. Die kontaklys vir AOO-koördineerders verskyn in die tabel hieronder. |
8.5 |
Die Distrikskeuringspan sal die drie (d.w.s. een per taal) beste opstelle/stories kortlys en dit na die Komitee oor Provinsiale Skeppende Skryfwerk stuur, wat die agtien beste opstelle/stories, d.w.s. vyf per taalgroep en drie vir Sesotho, sal kies. |
8.6 |
Die agtien beste opstelle/stories sal in 'n veeltalige storieboek gepubliseer word. |
8.7 |
Alle deelnemende skole sal 'n kopie van die veeltalige storieboek ontvang. |
8.8 |
Die leerder wat wen en sy/haar skool sal noemenswaardige pryse ontvang, wat by 'n provinsiale boekbekendstelling en galageleentheid in September 2018 oorhandig sal word. |
9. |
Hierby aangeheg in Bylae C is 'n rooster van die kompetisiedatums. |
10. |
Prinsipale word versoek om hul skole vroegtydig te registreer omdat dit die kompetisielogistiek sal lei. |
11. |
Die registrasievorm (Bylae D) moet teen Dinsdag, 02 Februarie 2018 by die toepaslike AOO-koördineerder ingedien word.
|
12. |
Prinsipale word vriendelik versoek om die inhoud van hierdie minuut onder die aandag van alle graad 6-taalonderwysers en -leerders te bring. |
GETEKEN: PAD BEETS
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2018:01:19
|
|