1. Die Gedragsowerheid van die Finansiële Sektor (FSCA), in samewerking met die Wes-Kaap Onderwysdepartement (WKOD), nooi skole uit om aan die 2018 Interprovinsiale Finansiële Geletterdheidstoespraakkompetisie deel te neem.

2. Die toespraakkompetisie bied aan graad 11-leerders, wat minstens een van die Besigheids-, Handels- en Bestuurs- (BHB-) vakke, soos Rekeningkunde, Besigheidstudies en/of Ekonomie neem, die geleentheid om deel te neem.

3. Daar word van deelnemers verwag om 'n voorlegging van ongeveer vyf minute oor een van verskeie finansiële geletterdheidsonderwerpe te lewer. Die onderwerpe is in die 2018 Toespraakkompetisieraamwerk Bylae A (paragraaf 10) uiteengesit. Navorsing oor en voorbereiding vir die voorlegging, sal leerders se finansiële geletterdheidsvaardighede versterk. Leerders moet hul toesprake in Engels kan lewer.

4. Die kompetisie strek oor vier rondes en die sperdatums sal tydens elke ronde aangedui word, d.w.s.:

  • Eerste ronde (skool) - moet teen 10 Augustus 2018 afgehandel wees
  • Tweede ronde (distrik) - moet teen 31 Augustus 2018 afgehandel wees
  • Derde ronde (provinsiaal) - moet teen 28 September 2018 afgehandel wees
  • Vierde ronde (interprovinsiaal) - is vir 12 Oktober 2018 beplan

Verwys asseblief na Bylae A (paragrawe 5 en 15) vir meer besonderhede.

5. Pryse:

  • Die drie beste interprovinsiale en provinsiale wenners se kontantpryse word bele en kontant sal nie uitbetaal word nie. Beleggings- en finansiële beplanningsadvies sal deur die Finansiële Beplanningsinstituut (FPI) van Suid-Afrika voorsien word.
  • Die drie beste interprovinsiale en provinsiale wenners sal elkeen onderskeidelik pryse ter waarde van R20 000, R10 000 en R5 000 ontvang.
  • Alle provinsiale finaliste sal 'n tablet met internetverbinding, 'n SIM-kaart en 'n eenmalige 500 MG-databondel ontvang.
  • Distriksdeelnemers sal sertifikate vir deelname en geskenkpakkies ontvang. Die drie beste distrikswenners sal medaljes ontvang en ook aan die provinsiale ronde deelneem.
  • Een onderwyser van elk van die beste drie provinsiale finaliste sal elkeen 'n sertifikaat vir deelname en 'n R1 000-geskenkbewys ontvang.
  • Die skool wat as gasheer vir die provinsiale uitdunne optree, sal 'n geraamde sertifikaat van waardering asook 'n R2 000 geskenkbewys ontvang.

Verwys asseblief na Bylae A (paragraaf 9) vir meer besonderhede oor die pryse.

6. Die onderwerpe met hul beskrywings en riglyne vir die toespraakkompetisie word in Bylae A (paragraaf 10) uiteengesit. Die onderwerpe is:

  • Werk wys met jou geld en wees KIEF!
  • Met 'n hupstootjie van my vriend, die finansiële beplanner ...
  • Ek verkies om my eie baas te wees.
7. Die rubriek wat by Bylae A ingesluit is, dien as 'n riglyn vir beoordeling en behoort oorweeg te word in die voorbereidingsproses en aanbieding van die toespraak.

8. Navrae oor die toespraakkompetisie moet aan die distrik se BHB-vakadviseurs gerig word.

9. Prinsipale word versoek om die inhoud van hierdie minuut onder die aandag van alle graad 11-onderwysers vir Rekeningkunde, Besigheidstudies en Ekonomie te bring.


GETEKEN: PAD BEETS
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2018:07:16

"Bylae A"  (grootte: 145 KB)