1. Die Wes-Kaapse Provinsiale Tesourie, in samewerking met Nedbank en die Wes-Kaap Onderwysdepartement (WKOD), nooi hiermee skole uit om vir die 2018/2019 Wes-Kaapse Beurskompetisie, 'n opstelkompetisie, in te skryf.

2. Die beurskompetisie bied graad 11-leerders in die Wes-Kaap, wat 'n kombinasie van Ekonomie, Wiskunde en Rekeningkunde as vakke neem, die geleentheid om beurse te bekom en hulle op verskeie maniere aan te moedig om hul studies in hierdie velde by 'n universiteit voort te sit.

3. Hoogstens twaalf beurse, insluitend 'n kontantprys vir finansiele bystand tydens hul graad 12-jaar, sal toegeken word aan leerders wat beoog om 'n graad in Ekonomie (bv. BCom (Ekonomie)), Rekeningkunde (bv. B.Rek., B.Compt.) Handel (bv. B.Bus.Sc.) of Wiskunde aan 'n Wes-Kaapse universiteit te verwerf.

4. Die beurse is vir graad 11-leerders wat in ten minste twee van die volgende vakke uitblink (minimum van 60%), Ekonomie, Wiskunde en Rekeningkunde, en in 2020 om toelating tot 'n universiteit kwalifiseer. Deelnemers moet Suid-Afrikaanse burgers wees wat in die Wes-Kaap woonagtig is en oor 'n goeie gesproke en geskrewe taalvermoe in Engels beskik.

5. Pryse vir die onderwysers van die leerders wat wen:

  • 'n Kontantprys vir die onderwyser van elk van die leerders wat eerste, tweede en derde plek behaal.
  • Kontantpryse vir die onderwysers van elk van die ander leerders aan wie beurse toegeken word.
6. Prinsipale sal gevra word om die name van die betrokke onderwysers te verskaf.

7. Die beurskompetisie is daarop gemik om:

  • entoesiasme vir Ekonomie, Wiskunde, Rekeningkunde en loopbaangeleenthede te bevorder;
  • kennis en vaardighede in Ekonomie, Wiskunde en Rekeningkunde te bevorder;
  • probleemoplossings- en analitiese vaardighede te ontwikkel;
  • leerders aan navorsingsmetodes en opstelskryfvaardighede bloot te stel;
  • leerders van toegang tot en skakeling met die werkswereld te voorsien;
  • bewustheid van sosio-ekonomiese kwessies in Suid-Afrika te kweek;
  • toekomstige leiers in die velde van Ekonomie, Wiskunde en Rekeningkunde te ontwikkel; en
  • voortreflikheid aan te moedig en te beloon.
8. Die tydraamwerk vir hierdie beurskompetisie is van Maart 2018 tot Maart 2019.

9. Raadpleeg asseblief die volgende Bylae dokumente:

  • Bylaag A :Belangrike addisionele inligting
  • Bylaag B :Opstelonderwerp (in engels verskaf) met aangehegte nasienrubriek
  • Bylaag C :Inskrywingsvorm
  • Bylaag D :Riglyne vir die skryf van goeie opstelle
10. Skole behoort belowende leerders te kies om aan die kompetisie deel te neem. Hulle sal versoek word om 'n opstel van ongeveer 2 200 woorde te skryf. Die res van die graad 11-ekonomieklas kan 'n opstel van hoogstens 600 woorde oor dieselfde onderwerp skryf, wat deel sal vorm van die navorsingsprojek vir Skoolgebaseerde Assessering.

11. 'n Span onderwysers by die skool sal die assesseringsrubriek wat verskaf word, gebruik om die twee toppresteerders te kies wat aan die minimumvereistes van 60% (opstel en mondelinge voordrag gekombineerd) voldoen om na die volgende rondte van die kompetisie te vorder. Die opstelle en punteblaaie van die twee toppresteerders en van al die ander leerders wat meer as 60% behaal het, moet teen nie later nie as 07 September 2018 by die distrikskantoor vir beoordeling op distriksvlak ingedien word.

12. 'n Beoordelingspaneel in elke distrik sal die kwalifiserende opstelle van skole beoordeel en die finaliste kies. Die tien beste opstelle per distrik sal deur hierdie paneel gekies en teen 21 September 2018 na die provinsiale vlak gestuur word.

13. Die ses en twintig (26) beste opstelle sal deur die finale keuringspaneel gekies word. Hierdie keuringspaneel bestaan uit verteenwoordigers van Nedbank, die Provinsiale Tesourie en die WKOD.

14. Hoogstens ses en twintig (26) finaliste sal genooi word om die finale keuringsproses in Kaapstad in Maart/April 2019 by te woon - op 'n Vrydagmiddag en Saterdagoggend. Daar sal van hulle verwag word om 'n mondelinge voordrag oor hulle navorsingbevindinge te lewer en vrae te beantwoord wat deur die keuringskomitee gestel sal word. Die Ekonomieonderwysers van die finaliste sal genooi word om hulle te vergesel. Die lede van die distrikpaneel sal genooi word om die toekenningseremonie op die Saterdagaand by te woon.

15. Navrae oor die skryf en nasien van opstelle moet aan die distrik se kurrikulumadviseur vir Ekonomie gerig word.

16. Prinsipale word versoek om die inhoud van hierdie minuut onder die aandag van alle graad 11-onderwysers vir Ekonomie, Wiskunde, Rekeningkunde, Engels en Lewensorientering te bring.


GETEKEN: PAD BEETS
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2018:05:08

Bylaag A: Belangrike addisionele inligting  (grootte: 30 KB)
Bylaag B: "Essay topic"  (grootte: 97 KB)
Bylaag C: "Entry form"  (grootte: 109 KB)
Bylaag D: "Guidelines"  (grootte: 104 KB)