1. Die Algemene Assesseringstaak (AAT) vir Lewensorientering (LO) sal, soos uiteengesit in Assesseringsbestuursminuut: 0008/2018, op 03 September 2018 geskryf word.

2. Nasienriglynbesprekings van AAT vir LO
2.1 Distrikte se nasienriglynbesprekingsvergaderings sal vanaf 11 tot 13 September 2018 plaasvind. Skole sal die finale nasienriglyne by hul distrik se nasienryiglynbesprekingsvergadering ontvang.
2.2 Dit is verpligtend vir ten minste een Lewensorienteringonderwyser van elke skool om die nasienriglynbespreking by te woon.
2.3 Antwoordstelle mag slegs na afloop van die distrik se nasienriglynbesprekingsvergadering uit die instapkluis gehaal word.

3. Nasien en interne moderering van AAT vir LO
3.1 Die nasien van die AAT vir LO moet onder toesig van die prinsipaal by die skool uitgevoer word, met 'n senior onderwyser of departementshoof wat as die interne moderator optree.
3.2 Die nasienproses by skole begin op 14 September 2018 en moet teen 21 September 2018 afgehandel wees.
3.3 Waar daar meer as een onderwyser is wat LO by 'n skool onderrig, moet prinsipale seker maak dat onderwysers nie die antwoordstelle van hul eie leerders nasien nie.
3.4 Ten minste tien persent van die nagesiende antwoordstelle moet deur 'n senior onderwyser of departementshoof gemodereer word.

4. Provinsiale en distriksmoderering van leerders se antwoorde
4.1 Die vakadviseur vir LO moet 'n paar antwoordstelle van geselekteerde skole modereer. Hierdie moderering sal vanaf 25 tot 28 September 2018 plaasvind.
4.2 Provinsiale moderering van die AAT vir LO sal vanaf 01 tot 03 Oktober 2018 plaasvind.

5. Leerders wat op 03 September 2018 afwesig is
5.1 'n Korrekte rekord moet gehou word van alle leerders wat nie die AAT vir LO op 03 September 2018 skryf nie.
5.2 Leerders wat weens 'n geldige rede nie die AAT vir LO op 03 September 2018 skryf nie, sal toegelaat word om die aanvullende AAT vir LO wat vir 10 Oktober 2018 vanaf 09:00 tot 11:00 geskeduleer is, te skryf.
5.3 "Geldige redes" in hierdie konteks, sluit die volgende in:

  1. siekte, gestaaf deur 'n geldige mediese sertifikaat wat deur 'n geregistreerde mediese praktisyn uitgereik is;
  2. humanitêre redes, wat die afsterwe van 'n naaste familielid insluit, en deur 'n afskrif van die doodsertifikaat ondersteun word;
  3. verskyning van die leerder in 'n hofverhoor, wat deur skriftelike bewys gestaaf moet word;
  4. enige ander rede wat die hoof van die assesseringsliggaam of sy of haar verteenwoordiger as geldig mag aanvaar.
5.4 Die bewysstukke wat met enige van die bogenoemde geldige redes verband hou, moet op lêer by die skool gehou word en, op versoek, aan Hoofkantoor of die distrik beskikbaar gestel word.

6. Administrasie van die aanvullende AAT vir LO
6.1 Prinsipale word vriendelik versoek om die nodige reëlings vir die afneem van hierdie assessering te tref, en toe te sien dat hul skool al die voorwaardes en reëls ten opsigte van die Nasionale Senior Sertifikaat (NSS)-eksamen nakom.
6.2 Vraestelle vir die aanvullende AAT vir LO sal slegs aan skole voorsien word wat op 03 September 2018 aangedui het dat leerders afwesig is. Aanvullende vraestelle sal op of voor 10 Oktober 2018 aan skole voorsien word.
6.3 Enige navrae oor die skryf van die aanvullende AAT vir LO moet gerig word aan mnr Christiaan Klopper by e-pos Christiaan.Klopper@westerncape.gov.za of per telefoon by 021 467 2407.
6.4 Distrikskantore sal nasienriglyne vir die aanvullende AAT vir LO aan skole voorsien. Die distrikskantore sal ook seker maak dat die nasien van die aanvullende vraestelle intern by skole, asook ekstern by die betrokke distrikskantore, nagesien word.
6.5 Leerders wat nie die AAT vir LO of die aanvullende AAT vir LO in 2018 skryf nie, sal 'n onvolledige uitslag vir Lewensorientering ontvang. Hierdie leerders sal die vak, asook die skoolgebaseerde assessering (SGA) en die AAT vir LO moet herhaal.

7. Bring asseblief hierdie inligting onder die aandag van alle Lewensoriënteringonderwysers en -leerders vir graad 12.


GETEKEN: PAD BEETS
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2018:08:31