1. Die Regulasies met betrekking tot die Nasionale Kurrikulumverklaring graad R–12, 2016 soos gepubliseer in Staatskoerant No. 40472 van 02 Desember 2016 en Omsendbrief 0028/2016, gedateer 30 Julie 2016, verklaar dat die finale datums waarop ouers en leerders vakveranderinge in graad 10–12 kan versoek, as volg is:

Graad Vakveranderinge toegelaat Aansoek van ouer/leerder Aksie deur skool
10 2 30 Junie 31 Julie op SOBIS
11 2 31 Maart 30 April op SOBIS
12 1 slegs in uitsonderlike gevalle 15 Desember van die graad 11-jaar 20 Januarie van die graad 12-jaar op SOBIS
12 Appèlle 31 Januarie 08 Februarie aan kringbestuurder

2. Prinsipale moet verseker dat alle graad 10-, 11- en 12-leerders reg geregistreer is vir die vakke wat hulle skryf en dat hulle besonderhede elke jaar op SOBIS teen 31 Januarie vasgelê is.

3. Die Wes-Kaap Onderwysdepartement (WKOD) het vasgestel dat sommige prinsipale steeds laat vakveranderinge- en/of regstellingsversoeke indien vir alle grade na die keerdatums en vir graad 12-leerders nadat die voorlopige skedules ontvang is.

4. Laat vakveranderinge- en/of regstellingsversoeke is dikwels 'n aanduiding dat skole of nie die beleid en die keerdatums streng toepas nie, of nie leerderbesonderhede konsekwent op SOBIS bywerk nie.

5. Nie-voldoening aan beleid of die verkeerde registrasie van leerderbesonderhede en vakke op SOBIS sal na die Hoofdirekteur: Assessering en Eksamens verwys word vir verdere ondersoek en moontlike dissiplinere optrede.

6. Wanneer 'n vakverandering vir 'n graad 11-leerder in Desember versoek word, moet prinsipale bewys lewer dat hulle met hulle toekomstige graad 12-ouers tussen November en 15 Desember van die graad 11-jaar vergader het en hulle die nodige terugvoering en raad oor die graad 11-uitslae gegee het sodat beide ouers en onderwysers ooreen kan kom oor alle vakveranderinge en dit elke jaar teen 15 Desember verwerk kan word.

7. Leerders kan vanaf graad 10 agt of meer as agt vakke neem. Leerders word nie toegelaat om vir bykomende vakke in graad 11 of 12 te registreer nie.

8. Skole wat appél wil aanteken teen enige daaropvolgende besluit van die Direkteur: Assesseringsbestuur oor 'n graad 12-vakverandering, moet dit elke jaar voor 28 Februarie doen. Geen appélle sal na daardie datum oorweeg word nie.

9. Verskaf asseblief die volgende wanneer daar teen 'n besluit geappelleer word:
9.1 'n Appél aan die Hoofdirekteur: Assessering en Eksamens wat deur die prinsipaal op die skool se briefhoof geformuleer is en waarin die rede(s) vir die vakveranderversoek(e) verduidelik word.
9.2 'n Brief van die onderwyser vir elke leerder en elke nuwe vak wat aangebied moet word en waarin die program wat gevolg gaan word, beskryf word om die leerders te help om daardie aspekte van die Kurrikulum en Assesseringsbeleidsverklaring van die nuwe vak(ke) wat in graad 10 en 11 gedek moes word, te dek.
9.3 'n Brief van die ouer(s)/voog(de) ter ondersteuning van die verandering(e).

10. Alle appélle moet gerig word aan die kringbestuurder, wat dit sal aanstuur na me. T Singh, Hoofdirekteur: Assessering en Eksamens. Die aansoek moet deur alle betrokke partye ingevul word en saam met alle versoekte dokumente gestuur word. Kyk Bylae A.

11. 'n Appél sal slegs oorweeg word as die vakveranderingsaansoek binne die tydraamwerke aangedui in punt 1 ingedien is en die aansoek vervolgens nie goedgekeur is nie.

12. Prinsipale word nie toegelaat om enige vakveranderinge vir hulle eie graad 12-leerders aan te bring nie en ook nie om leerders na die nuwe vakklas oor te skuif sonder die goedkeuring van die WKOD nie.

13. Skole word daaraan herinner dat die SOBIS-registrasiedata gebruik word om graad 12-leerders op die Integrated Examination Computer System (IECS) te registreer. Hierdie data word gebruik om die voorlopige skedules, finale skedules en toelatingsbriewe uit te druk. Dit is dus baie belangrik dat skole seker maak dat alle leerderdata reg op SOBIS vasgelê word.

14. Enige laat versoeke om vakveranderings of regstellings vir graad 10 en graad 11 moet aan die betrokke distriksassesserings- en eksamenkoordineerder gerig word.

15. Distriksbeamptes en prinsipale word vriendelik versoek om die inhoud van hierdie minuut onder die aandag van alle graad 9.12-onderwysers, ouers/voogde en leerders te bring.


GETEKEN: PAD BEETS
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2018:12:06

Bylae A: APpèlvorm – Graad 12-vakveranderinge  (grootte: 80 KB)