1. Die Wes-Kaap Onderwysdepartement (WKOD) maak voorsiening vir die vervoer van leerders wat 5 kilometer of meer vanaf hulle naaste geskikte gewone openbare skool woon. Leerders wat geen toegang tot openbare vervoer in landelike gebiede het nie, geniet voorkeur. Die totale aantal leerders wat vervoer word, word deur die beskikbare begroting bepaal.

2. Om die administrasie van leerdervervoerskemas te verbeter, sal die WKOD . verbeterde geoutomatiseerde stelsel bekendstel om die name van die leerders te bevestig wat tans gemagtig is om op WKOD-befondsde leerdervervoerroetes in gewone openbare skole vervoer te word.

3. Daar word van skole verwag om op die Sentrale Onderwysbestuursinligtingstelsel (SOBIS) aan te dui watter graad R- tot 12-leerders tans van die WKOD-befondsde leerdervervoer gebruik maak. Dit sluit in skole waar die funksie van die verkryging van leerdervervoer na die skool afgewentel het en waar fondse om die diens te administreer, deur die WKOD aan die skool oorgedra word.

4. Daar word van skole verwag om tussen 18 en 26 April 2016 toegang tot die SOBIS te verkry en die instruksies op die aanlyn prosedurehandleiding te volg en aan te dui watter leerders tans gemagtig is om vervoer te word. Skole moet die volgende stappe doen om toegang tot die aanlyn SOBIS-handleiding te verkry:

  • Gaan na die kiesbladsy.
  • Beweeg die merkergids na die "Administration"-hofie ("Learner Transport Scheme" sal dan op die lys verskyn).
  • Beweeg die merkergids na die "Learner Transport Scheme"-opsie ("LTS guide" sal dan op die lys verskyn).
  • Klik op "LTS guide".
5. Prinsipale moet seker maak dat slegs leerders wat volgens die bestaande leerdervervoerbeleid van die WKOD (Omsendbrief 0028/2015) kwalifiseer, aangedui word.

6. Waar skole meer as een roete het, moet voorsorg getref word dat die leerders by die korrekte roete en optelpunt geplaas word.

7. Skole sal slegs in staat wees om die goedgekeurde maksimum aantal leerders (insluitende graad R) per leerdervervoerroete vas te lê. Aansoek om addisionele leerders moet op die voorgeskrewe aansoekvorm via die relevante distrikskantoor gedoen word.

8. Die vaslegging van die leerdervervoerbesonderhede moet teen Dinsdag, 26 April 2016 voltooi word.

9. Dit is verpligtend vir alle skole met leerdervervoerskemas wat deur die WKOD befonds word, om die vereiste inligting op die SOBIS vas te lê.

10. Slegs leerders wat deur die skool in die outomatiseringsproses gesertifiseer is, mag voorkeur geniet uit die WKOD se leerdervervoerskemas. Skole en distrikskantore sal in staat wees om die goedgekeurde leerders van elke roete op die SOBIS te besigtig sodra die leerders suksesvol vasgelê is.

11. Voorsiening is gemaak om die WKOD-062-vorm (name van goedgekeurde leerders wat vervoer moet word) vanaf die SOBIS te druk. Verdere besonderhede oor hoe om die SOBIS-gegenereerde WKOD-062-vorm te gebruik, sal mettertyd gekommunikeer word.

12. Die prinsipaal word versoek om die leerdervervoerbesonderhede op die SOBIS af te teken.

13. Die volgende persone kan gekontak word om met die vaslegging van die leerdervoerbesonderhede op die SOBIS te help:

Siviwe Mdelo
Rhonell de Vries
Keith Lackay		 tel. no. 021 467 2084
tel. no. 021 467 2136
tel. no. 021 467 2327

14. Gedurende die tydperk van 14 tot 18 Maart 2016 sal die outomatiseringsproses by geïdentifiseerde skole geloods word. Hierdie skole sal direk gekontak word vir deelname aan die loodsprojek.


GETEKEN: JH LYNERS
ADJUNK-DIREKTEUR-GENERAAL: INRIGTINGSONTWIKKELING EN –KOöRDINERING
DATUM: 2016:03:11