1. Die Wes-Kaap Onderwysdepartement (WKOD) wil graag hiermee die beskikbaarheid van 66 buitengewone distrikgebaseerde Funza Lushaka-beurse aankondig vir die 2017-akademiese jaar vir graad 12-leerders wat van voorneme is om vir 'n formele onderwyskwalifikasie te studeer.

2. Die 2030 Nasionale Ontwikkelingsplan stel voor dat nuwe opvoeders na die professie gelok word en meld dat "bursary programmes for continuing professional development can improve the quality of teaching and help to attract and retain teachers".

3. Die nasionale Departement van Basiese Onderwys (DBO) se Funza Lushakabeursskema, voorsien hoe presterende leerders van 'n volkoste beurs wat klasgelde, verblyf met maaltye, 'n handboektoelaag, notas en laboratoriumgelde dek (waar van toepassing), sowel as 'n maandelikse toelae om basiese lewensuitgawes te dek.

4. Die Funza Lushaka-beursskema is 'n veeljarige program wat in 2007 van stapel gestuur is om onderrig as beroepskeuse in openbare skole vir bekwame en toegewyde Suid-Afrikaners te bevorder. Die program word plaaslik by vier hoeronderwysinstellings (HOI's) in die Wes-Kaap bestuur, nl., die Universiteit van die Wes-Kaap, Universiteit van Kaapstad, die Universiteit van Stellenbosch en die Kaapse Skiereiland Universiteit van Tegnologie

5. In 2012, het die DBO . distriksgebaseerde werwingsprogram bekendgestel met die fokus op leerders vanuit arm gemeenskappe om hulle te help om toegang tot die Funza Lushaka-beursskema te verkry. Die WKOD sal dus hierdie 66 buitengewone beurse slegs aan studente toeken wat bereid is om by skole in landelike gebiede onderrig te gee, met inagneming van die behoeftes van die landelike onderwysdistrikte.

6. Die toekenning van 'n Funza Lushaka-beurs is onderhewig aan die volgende voorwaardes:

  1. Die program sal studente finansier wat graag in die Grondslagfase wil spesialiseer (Graad 1 tot 3) of wat beplan om vir 'n BEd-graad te studeer, met spesialisering in Gasvryheidstudies, Ekonomie, Rekeningkunde, Verbruikerstudies, Wiskunde, Wetenskap en/of tegniese vakke.
  2. Die beurs word vir een akademiese jaar op 'n slag toegeken, en met bewys van akademiese sukses, kan dit jaarliks hernu word tot waar die ontvanger van die beurs as 'n opvoeder kwalifiseer.
  3. Daar sal van die beurshouer verwag word om jaarliks teen die einde van Oktober vir die volgende jaar heraansoek te doen.
  4. Na afloop van die studiekursus sal die beurshouer versoek word om by 'n skool in 'n landelike gebied vir 'n periode van een jaar vir elke jaar wat hulle die beurs ontvang het, onderrig te gee.
  5. 'n Afskrif van die aansoeker se graad 11-uitslae van 2015 moet saam met die aanvanklike aansoek ingedien word.
7. Voornemende aansoekers moet daarbenewens aansoek doen om toelating, en moet aan die toelatingsvereistes van die verskeie hoer onderwysinrigtings (HOI"s), soos vermeld in paragraaf 4 hierbo, voldoen. Die beurse sal op meriete deur die keurkomitee by die WKOD-hoofkantoor in Kaapstad toegeken word. Die onderstaande minimum akademiese kriteria is van toepassing:

  1. 'n "Toelating tot Baccalaureusgraad studies", slaag op graad 12-vlak.
  2. Ten minste 'n Vlak 4 slaag, of ten minste 'n 60% slaag op standaardgraad of 'n 50% slaag op hoergraad op matriekvlak in die vak wat lei tot die prioriteitsarea/vak waarin die aansoeker in die BEd-kursus sal spesialiseer.
  3. Studente wat in die Grondslagfase wil spesialiseer, moet Wiskunde of Wiskundige Geletterdheid op graad 12-vlak slaag. 'n Vlak 4 of 60% slaag in standaardgraad of 50% in die hoergraad in die Huistaal word ook vereis
  4. Studente wat graag in die onderrig van tegnologievakke wil spesialiseer, insluitende Rekenaartoepassingstegnologie, en wat nie oor hierdie vakke op matriekvlak beskik nie, moet 'n slaagsyfer in Wiskunde of Wiskundige Geletterdheid hê.
8. Die sluitingsdatum vir aansoeke is 29 Julie 2016. Aansoekers moet aansoek doen deur die aangehegte aansoekvorm te voltooi, en alle voltooide aansoeke moet dan by die relevante distrikskantoor afgelewer word.

Die volgende amptenare van die WKOD-hoofkantoor kan gekontak word vir enige navrae oor hierdie saak:
9. Bring asseblief die inhoud van hierdie minuut onder die aandag van u skool se graad 12-leerders.


GETEKEN: PA VINJEVOLD
HOOF: ONDERWYS
DATUM: 2016:05:04

"Annexure A: Educator Bursary Application Form"  (grootte: 74 KB)
"Important notice"  (grootte: 59 KB)