1. Die Nasionale Debatkompetisie vir skole word deur die Suid-Afrikaanse Agentskap vir die Bevordering van Wetenskap en Tegnologie (SAASTA) geborg. Die hoofdoelwitte van die debatkompetisie is om:

  • graad 9- tot 11-leerders 'n geleentheid te bied om hul vaardighede te ontwikkel met betrekking tot navorsing, kritiese denke, inligtingsgeletterdheid, spanwerk en om logiese en duidelike argumente te bied;
  • leerders aan te moedig om wetenskaplike kwessies wat in hul gemeenskappe, provinsiaal en nasionaal ervaar word, te ondersoek en te bespreek, en hoe wetenskap en tegnologie hierdie probleme kan oplos al dan nie;
  • wetenskaplike inligting aan hoerskoolleerders te versprei op 'n wyse wat beide prettig en interaktief is om sodoende belangstelling te stimuleer;
  • nasionale dialoog in wetenskap, ingenieurswese en tegnologie te vergemaklik; en
  • wetenskap-, ingenieurswese- en tegnologie-verwante loopbane onder leerders in Suid-Afrika te bevorder sodat hulle aangemoedig word om loopbane in hierdie velde na te streef.
2. Die kompetisie is oop vir alle leerders wat vakke neem wat verband hou met die wetenskappe in grade 9 tot 11 in alle sekondere skole/hoerskole aanbied.

3. Om vir hierdie kompetisie in te skryf, moet skole:

  • vyf leerders van graad 9 tot 11 identifiseer om 'n span te vorm om die skool in die debatkompetisie te verteenwoordig;
  • 'n mentor (opvoeder) identifiseer om die leerders af te rig;
  • 'n e-pos met die naam van die mentor (opvoeder), telefoonnommer en die naam van die skool stuur aan: lizelle@wwmedia.co.za of faks na: 021 979 5343 om 'n inskrywingsvorm (bylaag C) asook volledige inligting oor hierdie kompetisie (bylae A & B) te ontvang.
  • Die mentor moet saam met die leerders werk om hulle voor te berei om navorsing te doen en argumente oor die volgende onderwerp saam te stel:
    "Dink jy nanotegnologie moet gebruik word in die suiwering van besoedelde water?"
  • Daar sal van die leerders verwag word om een van die volgende formate te gebruik om hulle argumente te stel:

    Geskrewe opstel

    • Skryf 'n opstel van 400-450 woorde, getik in Arial 12-lettergrootte met 1.5-lynspasiering of in leesbare, handgeskrewe formaat.

    Stemopname en manuskrip

    • 4 minute in MP3-formaat, met 'n maksimum van 5 individuele stemme wat deel is van die span wat die toespraak lewer.
    • Die stemopname moet ook deur 'n manuskrip vergesel word, getik in Arial 12-lettergrootte met 1.5-lynspasiering of in leesbare, handgeskrewe formaat.

    Video-opname en manuskrip

    • 4 minute in MPEG- of MP4-formaat met 'n maksimum van 5 akteurs in die video-opname wat deel is van die span.
    • Die video-opname moet ook deur 'n manuskrip vergesel word, getik in Arial 12-lettergrootte met 1.5-lynspasiering of in leesbare, handgeskrewe formaat.
  • Die mentor moet die SAASTA Nasionale Debat vir skole se inskrywingsdekblad vir 2016 voltooi en die verklaring (bylaag B) teken en stempel. Die geskrewe opstel of stemopname of 'n video-opname en die dekblad moet gestuur word aan: debates@saasta.ac.za. Indien 'n skool probleme ondervind om groot leers via e-pos te stuur, kan die webblad: www.wetransfer.co.za gebruik word.
4. Vir enige verdere inligting, word skole aangeraai om die SAASTA-debatkompetisie vir skole se webtuiste te besoek by www.saasta.ac.za; of die inligting op die Facebook-blad - SAASTA Debates - na te gaan vir riglyne oor die video, opstelle en stemopnames, asook bykomende inligting oor navorsing in wetenskap.

5. Die sperdatum vir inskrywing is Saterdag, 20 Februarie 2016 om middernag.

6. Die geskrewe opstel, stemopname of video-opname sal beoordeel word deur 'n paneel eksterne beoordelaars wat deur SAASTA aangestel is. Die top tien skole sal per provinsie gekies word. Hierdie skole sal teen Woensdag, 30 Maart 2016 van die uitslag in kennis gestel word.

7. Die beste opstel van die top tien skole vir die provinsie sal 'n kontantprys van R6 000 ontvang, wat gebruik moet word om laboratoriumtoerusting, boeke of enigiets wat tot voordeel van die skool sal wees, aan te koop.

8. Die top tien geselekteerde skole in die provinsie sal 'n provinsiale werksessie op Saterdag, 16 April 2016 bywoon. Hierdie werksessie sal deur SAASTA in samewerking met World Wise Media aangebied word.

9. Op Saterdag, 21 Mei 2016 sal die top tien skole aan die provinsiale debatkompetisie deelneem waar die spanne teen mekaar sal meeding. Hierdie kompetisie word deur 'n provinsiale beoordelaarspaneel beoordeel.

10. Die skool wat die provinsiale top tien debatkompetisie wen, sal die provinsie by die nasionale eindronde op Donderdag, 06 Oktober 2016 verteenwoordig. Die eerste prys vir die nasionale wenners is 'n reis na Amerika.

11. In 2015 het The Settlers High School die provinsiale opstelkompetisie met 75% gewen. Die skool het 'n kontantprys van R6 000 ontvang.
Hoerskool De Kuilen het die eerste prys vir die provinsiale debatkompetisie gewen en het die provinsie op nasionale vlak verteenwoordig waar hulle die 3rde plek behaal het. Die Wes-Kaap Onderwysdepartement (WKOD) prys die mentors vir hul uitsonderlike werk om groter bewusmaking te skep onder leerders oor die wonderlike wereld van wetenskap. By die nasionale finale het elke mentor vir die provinsiale span 'n nuwe skootrekenaar as 'n geskenk vir hul moeite ontvang.

12. Dit is noodsaaklik om talent vir wetenskap in ons skole te erken, te koester en aan te moedig.

13. Die WKOD moedig dus skole aan om ywerige wetenskapleerders in grade 9 tot 11 vir die 2016 Nasionale Debatkompetisie vir Skole in te skryf.

14. Prinsipale word vriendelik versoek om die inhoud van hierdie minuut onder die aandag van alle betrokke personeellede te bring.


GETEKEN: PAD BEETS
WNDE ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2016:01:19

"Bylae A"  (grootte: 145 KB)
"Bylae B"  (grootte: 178 KB)
"Bylae C"  (grootte: 106 KB)