1. Die Nasionale Natuurwetenskapolimpiade is 'n projek wat deur die Suid-Afrikaanse Agentskap vir die Bevordering van Wetenskap en Tegnologie (SAABWT) geborg is. Die Olimpiade beoog om:

  • 'n belangstelling in wetenskap onder leerders te skep en om hulle aan te moedig om wetenskap in die VOO-fase te studeer;
  • die beste Natuurwetenskapleerders nasionaal te identifiseer;
  • Natuurwetenskap-opvoeders te ondersteun en hul klaskamerpraktyk te verbeter; en
  • talent onder Natuurwetenskapleerders te identifiseer.
2. Die Olimpiade is 'n stimulerende aktiwiteit wat van deelnemers verwag om kritiese denke, probleemoplossingsvaardighede, innovasie en kreatiwiteit te toon. Dit word deur die Wes-Kaap Onderwysdepartement (WKOD) se strategie vir Wiskunde en Natuur- en Fisiese Wetenskap ondersteun. Daar kan indrukwekkende pryse deur die toppresteerders in die Olimpiade gewen word.

3. In 2015 het 30 320 leerders van graad 4 tot 6 en 63 281 leerders van graad 7 tot 9 die Olimpiade in die Wes-Kaap geskryf. Die gemiddelde provinsiale prestasie was 39,7% vir graad 4 en 6 en 40,5% vir graad 7 tot 9. Die volgende pryse is aan Wes-Kaapse wenners in die nasionale kategorie toegeken:

Uitslae van 2015 Natuurwetenskapolimpiade

NAAM VAN SKOOL LEERDER SE VOORLETTERS EN VAN GRAAD TOEKENNINGS NASIONALE POSISIE % PRYS
Laerskool Sweet Valley D Junor (61%) 4 Topleerder graad 4 & 5 1 61 Tablet
Star-kollege A Abdullah (78%) 6 Top drie algehele nasionale wenners: graad 4-6 1 78 Tablet
Laerskool Grove SH Hofmeister (77%) 6 Top drie algehele nasionale wenners: graad 4-6 2 77 Tablet
Parklands-kollege RS Sparg (70%) 7 Topleerder graad 7 & 8 1 70 Tablet
Parklands-kollege FS Smuts (77%) 9 Top drie algehele nasionale wenners: graad 7-9 1 77 Tablet (3G)
NASIONALE TOPPRESTERENDE SKOLE
Rondebosch Seuns-voorbereiding-skool 63,67% graad 4-6 1 63,67 Geskenkbewys ter waarde van R6 000,00 vir laboratorium-toerusting

4. Die WKOD wil graag in 2016 die deelname van leerders uit voorheen benadeelde skole verhoog. Befondsing sal beskikbaar wees om leerderinskrywings te borg. Die Olimpiade is ook vir alle leerders in Wiskunde-, Wetenskap- en Tegnologie- (WWT) skole verpligtend. Befondsing sal ook vir hulle inskrywings beskikbaar gestel word. Al hierdie skole moet hul leerders se inskrywings nie later nie as 15:00 op Vrydag, 26 Februarie 2016 direk na Suanne Rampou stuur. Skole kan hul inskrywings inskandeer en na Suanne.Rampou@westerncape.gov.za e-pos of na 086 205 1450 faks.

5. Die deelnemersfooi vir die Olimpiade is R10,00 per leerder. Die gelde moet direk in die SAABWT-bankrekening gedeponeer word. Die bankbesonderhede word op die inskrywingsvorm verskaf. Daar is geen beperking op die getal leerders wat ingeskryf mag word nie.

6. Die Olimpiade is 'n veelkeuse-eksamen wat slegs in Engels aangebied word. Dit is in twee kategoriee verdeel, nl. Intermediere Fase en Senior Fase. Dit sal van 09:00 - 12:00 op Donderdag, 05 Mei 2016 geskryf word. Die sluitingsdatum vir registrasie is Maandag, 29 Februarie 2016.

7. Talentvolle leerders soos hierbo moet erken en aangemoedig word in ons skole. Die WKOD moedig skole aan om belowende wetenskapleerders in graad 4 tot 9 vir die 2016 Natuurwetenskapolimpiade in te skryf.

8. Skole word versoek om die integriteit van die Olimpiade deur sorgvuldige opsienersdiens te handhaaf. 'n Onreelmatigheid sal 'n skool outomaties van die Olimpiade diskwalifiseer.

9. Skole word versoek om die aangehegte registrasievorms (Bylae A en B) te voltooi en te onderteken en na die naaste distrikskantoor of wetenskapsentrum wat in Bylae C gelys is terug te stuur. Alle voltooide registrasievorms moet die verskeie distrikskantore en/of wetenskapsentrums teen nie later nie as 14:00 op Dinsdag, 23 Februarie 2016 bereik.


GETEKEN: PAD BEETS
WNDE ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2016:01:19

Bylae A - B: "Entry forms"  (grootte: 292 KB)
Bylae C: "Natural Science Olympiad Administration 2016"  (grootte: 43 KB)