| 1. |
Die vyfde jaarlikse Nasionale Skole Skynhofkompetisie vir senior leerders (graad 10 - 11) in Suid-Afrika sal tussen Junie en Augustus 2015 plaasvind. Hierdie kompetisie voorsien 'n unieke geleentheid vir leerders om hulle navorsings-, skryf- en voorspraakvaardighede te ontwikkel soos hulle poog om die grondwetlike kwessies onder die knie te kry wat ons land tans in die gesig staar. |
| 2. |
Die Skynhof sal aangebied word met die aktiewe deelname van regsfakulteite van verskeie universiteite, die regering (spesifiek die Departement van Justisie en Grondwetlike Ontwikkeling en die Departement van Basiese Onderwys), georganiseerde regsprofessie, howe en die media. Die Universiteite van Pretoria, Venda, Kaapstad en Wes-Kaap sal verwantwoordelikheid neem vir die voorbereiding van leerders. |
| 3. |
Die taalmedium van hierdie geleentheid sal Engels wees, maar deelnemers sal toegelaat word om enige amptelike tale in die finale rondte te gebruik. Alle sekondêre skole in Suid-Afrika word uitgenooi om in te skryf, en 'n maksimum van vyf spanne per skool kan registreer. Elke span sal uit twee leerders bestaan. 'n Fiktiewe (of "hipotetiese") probleem wat 'n grondwetlike kwessie(s) insluit, sal opgestel word. Die eerste rondte sal in geskrewe vorm wees. Daar sal van leerders verwag word om twee kort opstelle te skryf, wat die opponerende kante van die saak, soos gebaseer in die wet van die Republiek van Suid-Afrika, op 'n oortuigende wyse uiteensit. Ten einde alle spanne 'n regverdige geleentheid in die kompetisie te bied, sal materiaal oor die Suid-Afrikaanse Grondwet op die internet beskikbaar gestel word en skole sal op versoek 'n harde kopie ontvang. |
| 4. |
Nege spanne van elk van die nege provinsies sal gekies word om twee leerders en 'n opvoeder na die provinsiale mondelinge rondtes te stuur, wat in Mei en Junie 2015 in die provinsies sal plaasvind. |
| 5. |
Die Wes-Kaap Onderwysdepartement (WKOD) sal verantwoordelikheid neem vir die provinsiale mondeling. Dit sal in Junie 2015 in die Kaapstad Landdroshof plaasvind. Die vier beste spanne van die Wes-Kaap sal dan genooi word om aan die nasionale mondelinge rondtes deel te neem met spanne van die ander agt provinsies waar hulle teen mekaar sal argumenteer om die nasionale wenners te bepaal. Die nasionale rondtes sal by die Konstitusionele Hof in Johannesburg plaasvind. |
| 6. |
Dit is vir die WKOD aangenaam om aan te kondig dat 'n leerder van die Distrik Overberg, wat in die nasionale finale in 2014 deelgeneem het, genomineer is om die programdirekteur vir die Nasionale Onderwysertoekennings in Pretoria te wees. |
| 7. |
Die WKOD nooi hiermee alle skole uit om aan hierdie opwindende kompetisie deel te neem. Voltooi asseblief die aangehegte registrasievorms en stuur dit aan die Skoolverrykingskoördineerder teen 15 April 2015 via e-pos of pos dit aan Dennis.Pillay@westerncape.gov.za. Voltooi asseblief 'n aparte registrasievorm vir elke span. |
| 8. |
Skole wat registreer sal bygestaan word deur kundiges in die veld wat werkswinkels en begeleiding sal bied. Uitstaande deelnemers sal 'n aantal pryse ontvang wat die eerste jaar van regstudie by enige Suid-Afrikaanse universitet ondersteun waar hulle toelating verkry. Vir verdere inligting oor die Skynhof, sien www.up.ac.za/law of kontak u skoolverrykingskoördineerder (besonderhede aangeheg). |
| 9. |
Bring asseblief hierdie minuut onder die aandag van alle Lewensoriëntering-onderwysers vir graad 10. |
GETEKEN: J H LYNERS
ADJUNK-DIREKDIREK-GENERAAL: INRIGTINGSONTWIKKELING - EN KOÖRDINERING
DATUM: 2015:03:11
|
 |