1. Die Wes-Kaap Onderwysdepartement (WKOD) kondig graag die beskikbaarheid aan van 66 buitengewone Funza Lushaka-beurse vir die 2016 akademiese jaar vir graad 12-leerders wat van voorneme is om 'n formele onderwyskwalifikasie te verwerf.

2. Die 2030 Nasionale Ontwikkelingsplan beveel aan dat nuwe onderwysers gewerf word en noem dat "beursprogramme vir voortgesette professionele ontwikkeling die gehalte van onderrig kan verbeter, en kan help om onderwysers te betrek en te behou".

3. Die nasionale Departement van Basiese Onderwys (DBO) het 'n beursprogram genaamd die Funza Lushaka-beursprogram, wat hoogpresterende individue van volledig betaalde beurse voorsien wat klasgelde, akkommodasie met maaltye, 'n handboektoelaag, notas en laboratoriumgelde (waar van toepassing) dek, asook 'n maandelikse toelaag om basiese lewensuitgawes te dek.

4. Die Funza Lushaka-beursprogram is 'n multi-jaarprogram wat in 2007 van stapel gestuur is om onderwys in openbare skole as . loopbaan van keuse vir bekwame en toegewyde Suid-Afrikaners te bevorder. Die program loop plaaslik by drie (3) hoeronderwysinstellings (HOIfs) in die Wes-Kaap, nl. die Universiteit van Wes-Kaapland, die Universiteit van Stellenbosch en die Kaapse Skiereiland Universiteit van Tegnologie.

5. In 2012, het die DBO 'n distriksgebaseerde werwingsprogram bekendgestel met die fokus op leerders vanaf arm gemeenskappe (Kwintel 1 - 3) om hulle te help om toegang tot die Funza Lushaka-beurse te verkry. Die WKOD, sal dus hierdie 66 buitengewone beurse slegs toeken aan studente wat bereid is om by skole in landelike gebiede te onderrig, met inagneming van die behoeftes van hul landelike onderwysdistrikte.

6. Die toekenning van 'n beurs is onderhewig aan die volgende voorwaardes:

  1. Die program sal studente finansier wat graag in die Grondslagfase wil spesialiseer (graad 1 - 3) of wat beplan om vir 'n B.Ed-graad te studeer, en spesialiseer in Wiskunde en/of Wetenskap.
  2. Die beurs word vir een akademiese jaar op 'n slag toegeken, en met bewys van akademiese sukses, kan dit elke jaar hernu word totdat die ontvanger van die beurs as 'n onderwyser kwalifiseer.
  3. Daar sal van die beurshouer verwag word om teen die einde van Oktober van elke jaar vir die volgende jaar heraansoek te doen.
  4. Na afloop van die studiekursus sal die beurshouer versoek word om by 'n skool in 'n landelike gebied vir 'n tydperk van een jaar vir elke jaar wat die beurs ontvang is, skool te hou.
  5. 'n Afskrif van die aansoeker se graad 11-uitslae van 2014 moet saam met die aanvanklike aansoek voorgele word.
7. Voornemende aansoekers moet aansoek doen vir toelating, en aan die toelatingsvereistes van die onderskeie HOI's soos vermeld in paragraaf 4 voldoen. Die beurse sal op meriete deur die keuringskomitee by die WKOD se Hoofkantoor in Kaapstad volgens die volgende minimum akademiese maatstawwe toegeken word:

  1. 'n slaagpunt op graad 12-vlak vir "toelating tot Baccalaureus-graadstudies".
  2. Ten minste 'n Vlak 4-slaagpunt (50% slaagpunt) in die vak waarin die aansoeker in die B.Ed-kursus sal spesialiseer.
  3. Studente wat in die Grondslagfase wil spesialiseer, moet 'n slaagpunt in Wiskunde of Wiskundige Geletterdheid op graad 12 vlak behaal. Voorts word 'n Vlak 5-slaagpunt (60% slaagpunt) in Huistaal vereis.
8. Die sluitingsdatum vir die aansoeke is 26 Junie 2015. Aansoekers moet aansoek doen deur die aangehegte aansoekvorm te voltooi en alle voltooide aansoeke moet by hul skool se onderwysdistrikskantoor afgelewer word.

9. Vir enige navrae, moet asseblief nie huiwer om een van die volgende beamptes by die WKOD se Hoofkantoor te kontak nie:

  • Me Malorato Mpiti tel. 021 467 2155
  • Mnr Lusapho Ndzongo by tel. 021 467 2190
10. Bring asseblief die inhoud van hierdie minuut onder die aandag van u skool se graad 12-leerders.


GETEKEN: PA VINJEVOLD
HOOF: ONDERWYS
DATUM: 2015:05:27

"Bursary application form"  (grootte: 80 KB)