1. Seksualiteitsonderrig is 'n hoogs sensitiewe onderwerp in die Senior Fase. Dit word in die kurrikulum vir beide Lewensorientering en Natuurwetenskappe behandel. 'n Paar ouers het hul kommer teenoor die Wes-Kaap Onderwysdepartement (WKOD) uitgespreek oor die seksualiteitsonderrigprogram, veral omdat dit in graad 7 aangebied word. 'n Aantal onderwysers het ook aangedui dat hulle nie die vrymoedigheid het om die onderwerp te onderrig nie.

2. Die WKOD beskou hierdie bekommernisse in 'n baie ernstige lig en is daartoe verbind om die vrese van onderwysers, ouers en die algemene publiek aan te spreek. Die WKOD het 'n vennootskap met die Universiteit van Kaapstad se Departement Verloskunde aangegaan om 'n onderwyseropleidingskursus te ontwikkel om onderwysers te help om seksualiteitsonderrig op 'n verantwoordelike manier en medies korrek, te onderrig.

3. Die WKOD het met 'n proses begin om Senior Fase vakadviseurs en leieronderwysers vir Lewensorientering en Natuurwetenskappe deur kundiges op die gebied op te lei in die "Benadering tot Seksualiteitsonderrig".

4. Die vakadviseurs en leieronderwysers sal na verwagting al die Lewensorientering- en Natuurwetenskappe-onderwysers in hul kring in die tweede kwartaal oplei.

5. Alle skole sal die volgende ondersteuningsmateriaal vir graad 7 tot 9 ontvang, ter voorbereiding van die opleiding, ontvang.
5.1 Leerders in graad 7 tot 9 sal boekmerke in Engels en Afrikaans met kern boodskappe oor seksuele gesondheid, asook nuttige kontaknommers, ontvang. Die boekmerke is in beide Engels en Afrikaans geskryf.
5.2 Leerders in graad 7 tot 9 sal werkboeke ontvang wat die onderwerpe in die KABV-kurrikulum vir Lewensoriëntering en Natuurwetenskappe dek. Die leerders moet die werkboeke onder toesig gebruik. Dit kan individueel of in groepe voltooi word nadat die onderwerp behandel is.

6. 'n Diensverskaffer sal die boekmerke en leerderwerkboeke vanaf middel Maart 2015 by skole aflewer.

7. Departementshoofde/vakhoofde moet verseker dat hierdie hulpbronne veilig by die skool gestoor word totdat die Lewensoriëntering- en Natuurwetenskappe-onderwysers hul opleiding deur die distrik voltooi het.

8. Die betrokke departementshoofde en vakhoofde vir hierdie twee vakke moet die gebruik van die leerderwerkboeke en die verspreiding van die boekmerke monitor.

9. Die departementshoofde/vakhoofde word aangemoedig om die nodige ondersteuning aan die onderwysers te bied.

10. Distriksbeamptes sal ook ondersteuning bied tydens klustersessies en klaskamer ondersteuningsbesoeke.

11. Die WKOD is vol vertroue dat hierdie hulpbronne onderwysers se selfvertroue sal bou om onderrig in die vakinhoud aan te bied en jong volwassenes te help om verantwoordelike besluite oor hul liggame en hul eie lewens te neem.

12. Skole word aangemoedig om hierdie hulpbronne ten volle te gebruik en terugvoering aan me Suanne Rampou by Suanne.Rampou@westerncape.gov.za te gee.

13. Prinsipale word versoek om hierdie kennisgewing onder die aandag van alle betrokke onderwysers te bring.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2015:03:24