| 1. |
Die Wes-Kaapse Provinsiale Tesourie, in samewerking met Nedbank en die Wes-Kaap Onderwysdepartement (WKOD) nooi hiermee skole uit om in te skryf vir die 2015 Wes-Kaapse Beurskompetisie, 'n opstelkompetisie. |
| 2. |
Die Beurskompetisie bied aan graad 11-leerders in die provinsie, wat 'n kombinasie van Ekonomie, Wiskunde en Rekeningkunde as vakke neem, die geleentheid om beurse en ander aansporingsbedrae te bekom ten einde verder op hierdie rigtings aan 'n universiteit te studeer. |
| 3. |
'n Maksimum van twaalf beurse, sowel as 'n kontantprys as finansiële bystand tydens hulle graad 12-jaar sal toegeken word aan leerders wat beoog om 'n graad in Ekonomie (bv. BCom. [Ekonomie], Rekeningkunde (bv. BRek., BCompt), Handel (bv. B Handelswetenskap) of Wiskunde by 'n Wes-Kaapse universiteit te volg. |
| 4. |
Die beurse is vir graad 11-leerders wat uitblink in ten minste twee van die vakke, Ekonomie, Wiskunde en Rekeningkunde (minimumvlak van 60%), en wat kwalifiseer vir toelating tot 'n universiteit in 2017. Deelnemers moet Suid-Afrikaanse burgers wees wat in die Wes-Kaap woon en oor 'n goeie mondelinge en skriftelike taalvermoë in Engels beskik. |
| 5. |
Pryse vir onderwysers van die leerders wat wen:
- 'n Skootrekenaar/kontantprys vir die onderwyser van elk van die leerders wat 1ste, 2de en 3de geplaas is.
- 'n Kontantprys van R5 000 aan die onderwyser van elk van die ander leerders aan wie beurse toegeken is.
Skoolhoofde sal gevra word om die name van die betrokke onderwysers te verskaf.
|
| 6. |
Die beurskompetisie beoog om:
- entoesiasme vir Ekonomie, Wiskunde en Rekeningkunde en vir loopbaan-geleenthede te bevorder;
- kennis en vaardighede in Ekonomie, Wiskunde en Rekeningkunde te bevorder;
- probleemoplossing- en analitiese vaardighede te ontwikkel;
- leerders blootstelling te gee aan navorsingsmetodes en opstelskryfvaardighede;
- leerders te voorsien van toegang tot en skakeling met die werkwereld;
- bewustheid van sosio-ekonomiese kwessies in SA te wek;
- uitnemendheid aan te moedig en te beloon; en
- toekomstige leiers op die gebied van die Ekonomie, Wiskunde en Rekeningkunde te ontwikkel.
|
| 7. |
Die tydraamwerk vir hierdie beurskompetisie is van Maart 2015 tot Maart 2016. |
| 8. |
Verwys na die aangehegte Bylae B vir die opstelonderwerp (slegs in Engels voorsien).
|
| 9. |
Verwys na die aanhangsels vir die volgende:
- Die inskrywingsvorm;
- Die assesseringsrubriek wat deur onderwysers gebruik sal word om opstelle te assesseer; en
- Riglyne vir die skryf van goeie opstelle.
|
| 10. |
Skole moet belowende leerders kies om deel te neem aan die kompetisie. Hulle sal 'n opstel van ongeveer 2 200 woorde moet skryf. Die res van die graad 11-Ekonomieklas kan 'n opstel van hoogstens 600 woorde oor dieselfde onderwerp skryf. |
| 11. |
'n Span onderwysers by die skool sal die assesseringsrubriek wat verskaf is, gebruik om die drie toppresteerders te kies wat voldoen aan die minimum vereistes van 70% (opstel en mondelinge aanbiedings gekombineer) om deur te gaan na die volgende ronde van die kompetisie. Die opstelle en punteblaaie van die drie toppresteerders en van al die ander leerders wat meer as 70% behaal het, moet voorgele word aan die onderwysdistrikskantoor vir assessering op vlak 2 (distriksvlak) teen nie later nie as 27 Oktober 2015. |
| 12. |
'n Assesseringspaneel in elke onderwysdistrik sal die kwalifiserende opstelle van skole assesseer en die finaliste kies. Die 10 beste opstelle per distrik sal gekies word deur hierdie paneel en deurgestuur word na die finale vlak (provinsiale vlak) teen 20 November 2015. |
| 13. |
Die twintig beste opstelle sal gekies word deur die finale keuringspaneel, bestaande uit verteenwoordigers van Nedbank, die Provinsiale Tesourie en die WKOD. |
| 14. |
'n Maksimum van vyftien finaliste sal genooi word na die finale keuringsproses in Kaapstad in Maart 2015 - op 'n Vrydagmiddag of Saterdag net na die Provinsiale Begrotingstoespraak. Hulle sal 'n mondelinge aanbieding moet doen oor hulle navorsingsbevindinge en vrae van die keuringspaneel moet beantwoord. Die Ekonomie-onderwysers van die finaliste sal genooi word om hulle te vergesel. Die lede van die onderwysdistrikspaneel sal genooi word na die toekenningseremonie daardie Saterdagaand. |
| 15. |
Raadpleeg asseblief Bylae A vir gedetailleerde inligting oor vereistes om deel te neem, inskrywingsdokumente, tydraamwerke en beoordelingskriteria. |
| 16. |
Navrae oor die skryf en nasien van die opstelle moet gerig word aan die Ekonomie-kurrikulumadviseurs in die onderwysdistrikte. |
| 17. |
Prinsipale word versoek om die inhoud van hierdie minuut onder die aandag van alle graad 11 Ekonomie-, Wiskunde-, Rekeningkunde- en Lewensoriënteringonderwysers te bring. |
GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2015:02:23
|
 |