1. Hierdie minuut vervang Assesseringsbestuursminuut 0018/2015.

2. Hierby aangeheg is Nasionale Assesseringsomsendbrief No. 3 van 2015, soos ontvang van die Departement van Basiese Onderwys (DBO), rakende die puntaanpassings vir die Senior Fase.
2.1 Puntaanpassings vir Graad 7 tot 9 sal vir die volgende drie jaar geimplementeer word om te verseker dat geen leerder deur die bevorderingsvereistes vir hierdie grade sedert die implementering van die Kurrikulum- en Assesseringsbeleidsverklaring (KABV) in 2014 benadeel word nie.
2.2 Die volgende beginsels sal ten opsigte van die puntaanpassingsproses in 2015 van toepassing wees:
2.2.1 Die fokus van puntaanpassings sal op individuele vakke wees en nie op die algehele slaagsyfer van die skool in 'n graad nie.
2.2.2 Puntaanpassings sal net op 'n maksimum van drie vakke per leerder toegepas word.
2.2.3 Die aanpassings sal toegepas word op leerders wat 'n punt in 'n vak behaal wat binne 'n 7%-speling van die slaagvereistes is.
2.2.4 Puntaanpassings moet in die fundamentele vakke, nl. Huistaal, Eerste Addisionele Taal en Wiskunde geprioritiseer word.
2.3 Die persentasiespeling waarin leerders 'n aanpassing kan kry, sal elke opeenvolgende jaar van KABV-implementerings verminder. Die tabel hieronder dui die puntaanpassing aan wat vanaf 2015 van toepassing sal wees.

en verderand beyond
Jaar 2015 2016 2017
Maksimum aanpassingspersentasie (%) per vak 7% in 3 vakke 6% in 3 vakke 5% in 3 vakke 2% in Wiskunde of enige ander vak

3. Die Wes-Kaap Onderwysdepartement (WKOD) se rekordering- en rapporteringsprogram vir Graad 7 tot 9 sal aangepas word om die aanpassingsproses wat deur die DBO voorgestel is, te outomatiseer.
3.1 Die program sal outomaties die punte op die skedule aanpas indien 'n leerder vir 'n bevordering met aanpassing(s) kwalifiseer.
3.2 Alle leerders wie se punte aangepas is om bevorder te word, sal outomaties op die bevorderingskedule as "Promoted with adjustment" in die opmerkingskolom aangedui word.
3.3 Die program sal 'n aanpassingslys met alle leerders wie se punte aangepas is, outomaties genereer.
3.4 Die "Years in Phase progression"-keuse en immigrant-/doweskonsessie moet steeds met die hand soos voorheen gedoen word.

4. Skole wat nie die WKOD-rekordering- en rapporteringsprogram doen nie, moet die instruksies in DBO Omsendbrief No. 3 van 2015 volg.

5. Dit is belangrik dat alle leerders eenders en regverdig behandel word, dus moet skole eers die puntaanpassingsriglyne toepas vir alle leerders wat nie die minimum bevorderingsvereistes nagekom het nie voordat daardie leerders wat kwalifiseer as gevolg van jare in die fase bevorder word.

6. Skole moet 'n lys met alle puntaanpassings vir stawingsdoeleindes deur die distrik verskaf.

7. Prinsipale word vriendelik versoek om onderwysers en ouers oor die inhoud van hierdie minuut in kennis te stel.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2015:10:16

"National Assessment Circular No. 3 of 2015"  (grootte: 852 KB)