1. Die Wes-Kaap Onderwysdepartement is verbind daartoe om te verseker dat die maksimum tyd vir onderrig en leer benut word. Dit is dus die verantwoordelikheid van elke skool om die onderrigtyd te beskerm en leer te ondersteun vir die volle 201 skooldae per jaar, in ooreenstemming met die Nasionale Leerderbywoningsbeleid.

2. Personeel van alle skole en distrikskantoorpersoneellede word versoek om op die volgende te let:
2.1 Dit is die verantwoordelikheid van elke skool om sy skoolprogram te beplan vir die tydperk tydens en na die eksamens tot op die laaste dag van die skoolkwartaal, en om alle leerders, ouers en distrikskantore ooreenkomstiglik in te lig.
2.2 Skole wat graad 4 tot 11 aanbied, word daaraan herinner dat geen eksamens voor 2 Junie 2014 en 17 November 2014 mag begin nie. Skole kan egter by die distriksdirekteur aansoek doen vir toestemming om praktiese eksamens in sekere vakke vroeër te laat begin.
2.3 Daar word van alle leerders verwag om gedurende die eksamentydperk vir 'n minimum van 5 ure by die skool te wees. Indien 'n skool dus om 08:00 begin, kan die skool nie die leerders vroeër as 13:00 verdaag nie. Met die reëling van die vroeër sluitingstyd, moet die veiligheid en vervoer van leerders in ag geneem word. Dit is dus belangrik dat ouers vooraf ingelig word sodat hulle in staat is om alternatiewe reëlings te maak.
2.4 Alle leerders word versoek om gedurende die eksamentydperk skool by te woon, met die uitsondering van Graad 12-leerders - wat geregtig is op 5 afdae vir studiedoeleindes voor die aanvang van die Nasionale Senior Sertifikaat-eksamen.
2.5 Skole mag nie leerders onder die indruk plaas dat dit elke leerder se eie keuse is om, sodra die eksamens vir die kwartaal geëindig het, of wanneer hulle nie eksamens of toetse skryf nie, skool toe te gaan of nie.
2.6 Daar word van alle onderwysers verwag om by die skool te wees vir die volle skooldag (35 uur per week) gedurende die eksamentydperk, ongeag of hulle toesighoudende pligte het, of nie.

3. Prinsipale word daaraan herinner dat hulle hulle eksamenrooster, ten minste vier weke voor die begin van die eksamens, aan die IBB-bestuurder moet voorlê. Onderwysdistriksbeamptes sal die implementering van hierdie direktiewe moniteer.

4. Prinsipale van skoolbeheerliggame word versoek om spesiale aandag te gee aan die opstel van hulle programme gedurende die eksamentydperk, sodat waardevolle tyd vir leer nie verlore sal gaan nie.


GETEKEN: J H LYNERS
ADJUNK-DIREKDIREK-GENERAAL: INRIGTINGSONTWIKKELING - EN KOÖRDINERING
DATUM: 2014:03:20