Die Wes-Kaapse Regering het Year Beyond, ‘n nuwe oorbruggingsprogram geloods wat geleenthede aan talentvolle jongmense bied om by te dra tot onderwysontwikkeling in die provinsie.

Die Premier, Helen Zille, en Ministers Debbie Schäfer (Onderwys) en Nomafrench Mbombo (Kultuursake en Sport) het die program op Woensdag 10 September 2014 bekendgestel, in samewerking met NRO’s wat in die onderwyssektor werk.

In 2015 sal vrywilligers help met buitemuurse aktiwiteite by 24 skole. Hulle sal veral fokus op die ondersteuning van taal-, wiskunde- en wetenskapontwikkeling deur middel van verskeie aktiwiteite, insluitende klubs wat fokus op spesifieke belangstellingsvelde.

Hulle sal ook deelneem aan ‘n leierskapopleidingsprogram wat deur die Frederick van Zylleierskapinstituut by die Universiteit Stellenbosch aangebied word, wat ‘n leierskapkwalifikasie insluit.

Indien u die fasiliteit het om met ouers van matrieks te kommunikeer, sal ons dit opreg waardeer indien u die aangehegte kennisgewing sal uitstuur. Die kennisgewing sluit aanlynskakels in wat u na verdere inligting sal neem. U kan toegang verkry tot hier inligting deur die Wes-Kaapse Regering se webtuiste te besoek by www.westerncape.gov.za/yearbeyond.

Vriendelike groete