1. IMfunalwazi i-South African Mathematics Challenge inika lithuba elihle lokuphuhlisa izakhono zabafundi bemathematika abakumaBakala 4 - 7. Le mfunalwazi ibisakwaziwa ngaphambili njenge-AMESA Mathematics Challenge yaye ixhaswa ngemali yi-South African Mathematics Foundation (SAMF) noSASOL. Injongo yayo kukuphucula umgangatho wokufundisa nokufunda imathematika ngokunika abafundi besikolo esiyiprayimari yesigaba sabadala amaqhina kwizibalo amakasonjululwe nanika umdla kwinqanaba lebakala labo.

2. Injongo yeMfunalwazi:

  • kukwenza abafundi bayithande imathematika;
  • kukukhuthaza iindlela zokusombulula amaqhina ekufundeni imathematika;
  • kukukhuthaza uluvo lokuba umsebenzi wemathematika ungaphezu kokubala nje;
  • kukugxininisa ukubaluleka kokufunda xa usenza umsebenzi wemathematika;
  • kukusasaza izinto zokufunda ezenza igalelo kumsebenzi wemathematika onentsingiselo eklasini; kunye
  • nokunika ootitshala isixhobo sokufumana unobangela weengxaki ukuze babe nokuqaphela ezo zinto zibhida abafundi bangakwazi kuqonda.
3. Le Mfunalwazi ayilulo ukhuphiswano, koko imalunga nokuthatha inxaxheba nangona abanye abafundi benokuyifumana imibuzo ingumngeni ekuqaleni. Kukho iindlela ezimbini zokuthatha inxaxheba: abafundi abanobuchule kunabanye banokukhetha ukuthatha inxaxheba ngabodwa (ngabanye), lo gama abanye benokukhetha ukusebenza ngababini (izibini). Imibuzo kwimfunalwazi yenziwe ngohlobo lokuba iphuhlise ukuqonda, ukusebenzisa ulwazi kwiimeko ezintsha, unxibelelwano nokucinga ngokubanzi ngemathematika.

4. Ukomeleza indlela izikolo eziqhuba ngayo kwiMathematika, iSebe iWCED likhuthaza izikolo ukuba zithathe inxaxheba kwi-2014 Mathematics Challenge.

5. IMfunalwazi i-2014 Mathematics Challenge inoMjikelo wokuQala (First Round) (12 –16 Meyi) noMjikelo wokuGqibela (Final Round) (30 Julayi, ngethuba leVeki yeSayensi kuZwelonke (National Science Week), ekukho amaphepha emibuzo ahlukeneyo amaBakala 4, 5, 6 no-7 asetwe yikomiti. Iphepha ngalinye liyiyure enye ubude yaye linemibuzo ekhethisayo (multiple choice questions) eyi-25.

6. UMjikelo wokuQala ubhalelwa esikolweni yaye kulindeleke ukuba izikolo zenze iikopi zamaphepha emibuzo ukulungiselela abafundi bazo. Ngokususela kwiinjongo nobunjani bemfunalwazi, ziyakhuthazwa izikolo ukuba zibavumele bonke abafundi bathathe inxaxheba kuMjikelo wokuQala. Ootitshala baya kuzimakisha iimpendulo ngokwabo ngememo abayinikwe yi-SAMF. Okanye iklasi inokuzimakisha ngokwayo ngethuba leseshoni yeengxoxo zeklasi. Amaphepha emibuzo aya kuhanjiswa kuphela ngokuthunyelwa nge-imeyili ngabaququzeleli beengingqi bencediswa ngabacebisi bezifundo.

7. UMjikelo wokuGqibela ngowabafundi abafumene i-60% okanye ngaphezulu kuMjikelo wokuQala. Ubhalelwa kwindawo enokufikeleka kuye wonke umfundi kwimimandla eyahlukeneyo (iqela lezikolo ezisondeleleneyo ngokwendawo ezikuyo). KuMjikelo wokuGqibela abafundi bayasebenzisana baze baxoxe omnye nomnye ngemathematika. Luxanduva lwabaququzeleli bemimandla ukudyuplikheyitha amaphepha emibuzo nokuququzelela uMjikelo wokuGqibela wemimandla yabo.

8. Ukuqaphela impumelelo yabafundi kule Mfunalwazi, abafundi banikwa amabhaso ezi Zatifikethi zoKuphumelela zilandelayo: Bonke abafundi abafumene u-80% nangaphezulu kuMjikelo wokuGqibela bafumana iSatifikethi seGolide (Gold Certificate), abo bafumene u-60%-80% ibe seseSilvere (Silver Certificate) ukuze abo bafumene ngaphezu kwe-50%-60% bafumane esoBhedu (Bronze Certificate). Abafumene eseGolide baya kufumana ivawutsha.

9. Ukuthatha inxaxheba kuMjikelo wokuQala kumahala kubo bonke abafundi. Intlawulo yokungenela imfunalwazi kuMjikelo wokuGqibela yi-R10 umfundi ngamnye, ukwenzela ukuhlawula iindleko zomququzeleli wengingqi. Ziyakhuthazwa izikolo ukuba ziyihlawule le mali yokungenela imfunalwazi zihlawulele abafundi bazo.

10. Izikolo ezinomdla mazibhalisele le Mfunalwazi ngqo kubacebisi besifundo semathematika abaya kuququzelela okuqhubeka kwisithili ngasinye. (Makufundwe isiHlomelo A ukufumana iinkcukacha zoqhagamshelwano.

11. Kucelwa nifunde isiHlomelo B esinamagama abaququzeleli besekethe nezikolo eziya kusingatha iMfunalwazi yoMjikelo wokuGqibela.

12. Ukufumana ingcaciso engaphezulu kwakunye namaphepha emibuzo neememo, zexesha langaphambili, ngena ku: http://www.amesa.org.za/Challenge/Links.htm uye ku-"South African Mathematics Challenge Homepage – AMESA".

13. Ziyacelwa iinqununu ukuba zazise okukule ngcaciso imfutshane bonke ootitshala bemathematika ukuze bakuthathele ingqalelo.


ISAYINWE: NGU-BK SCHREUDER
USEKELA MLAWULI-JIKELELE WOLAWULO LWEKHARITYHULAM NOVAVANYO
UMHLA: 2014:03:19

IsiHlomelo A: IINKCUKACHA ZOQHAGAMSHELWANO ZABACEBISI BEZIFUNDO  (ubukhulu: 33 KB)
IsiHlomelo B: IINKCUKACHA ZOQHAGAMSHELWANO ZABAQUQUZELELI BESEKETHE NEZIKOLO EZISINGATHA OKU
(ubukhulu: 35 KB)