| 1. |
Die Wes-Kaap Onderwysdepartement (WKOD) sal wiskundestelle verskaf aan gekeurde skole in Fase 3 van die Geletterdheid- en Gesyferdheidintervensie. Aflewering sal plaasvind tussen 20 Oktober en 20 November 2014. |
| 2. |
Die lys van skole wat hierdie stelle sal ontvang, is aangeheg. |
| 3. |
In hierdie skole sal elke onderwyser of klaskamer van graad 1 tot 6 van 'n wiskundestel voorsien word wat 'n verskeidenheid manipulatiewe bevat wat geskik is vir Wiskundeonderrig. |
| 4. |
Elke besending wat afgelewer word, moet onmiddellik deur die prinsipaal en personeel soos volg gekontroleer word: |
| 4.1 |
Kontroleer of die hoeveelhede wat per fase en graad afgelewer is ooreenstem met die hoeveelhede genoem op die afleweringsnota en op die inventaris wat saam met elke stel verskaf word. Indien daar tekorte of enige toerusting gebreek is, moet dit binne 48 uur skriftelik aan Hoofkantoor gerapporteer word. 'n Afskrif van hierdie verslag moet op lêer gehou word. |
| 4.3 |
Versuim om Hoofkantoor skriftelik binne die bepaalde tyd in kennis te stel, sal beteken dat die skool aanspreeklik sal wees om die situasie reg te stel. Die diensverskaffer het onderneem om enige tekorte of toerusting wat gebreek is, binne twee weke vandat hulle daarvan in kennis gestel is, reg te stel. |
| 5. |
Die aangehegte Bylae A en B bevat 'n lys van die inhoud van elke stel wat verskaf sal word vir die Grondslag- en Intermediêre Fases. |
| 6. |
Prinsipale en departementshoofde moet seker maak dat 'n inventaris gehou word van al die bronne wat deur die WKOD verskaf is, en dat 'n streng herwinningsbeleid gevolg word. |
| 7. |
'n Onderwysersgids is by elke stel ingesluit om die onderwyser te help met die doeltreffende gebruik van die manipulatiewe in die klaskamer. Onderwysdistriksbeamptes sal ook onderwysers ondersteun en lei in die gebruik van die manipulatiewe. Daar word verwag dat die stelle onbeskadig en in goeie toestand sal wees wanneer bystand verleen word. |
| 8. |
Onderwysers en leerders word aangemoedig om hulleself vertroud te maak met die inhoud van elke stel wat vir die Grondslag- en Intermediêre Fase verskaf is. |
| 9. |
Skole word versoek om seker te maak dat hierdie wiskundestelle met sorg gebruik en bestuur word aangesien geen stelle binne die volgende 5 jaar vervang sal word nie. Die herstel en vervanging van beskadigde komponente sal die verantwoordelikheid van die skool wees. |
| 10. |
Die benutting van die stel sal deur die hoof of departementshoof en distriksbeamptes gemonitor word. |
| 11. |
Prinsipale word vriendelik versoek om die inhoud van hierdie minuut onder die aandag van die skoolbestuurspan en die betrokke onderwysers te bring. |
GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2014:10:09
|
 |