1. Die jaarlikse sistemiese assesserings op nasionale en provinsiale vlak, sal in die derde kwartaal van 2014 plaasvind. Die Jaarlikse Nasionale Assesserings (JNA's) sal plaasvind vanaf 16-19 September 2014 en die Wes-Kaap Onderwysdepartement (WKOD) se sistemiese toetse, vanaf 14-28 Oktober 2014. Die hoofdoel van hierdie toetse is om die prestasievlak van leerders in Taal en Wiskunde in Graad 1-6 en 9, te bepaal.

2. Die toenemende aantal openbare vakansiedae in die tweede kwartaal en die negatiewe impak wat die verlies van kontaktyd op onderrig en leer kon hê, is 'n groot bron van kommer vir die WKOD. Alle pogings moet aangewend word om hierdie probleem teen te werk. Skole word dus versoek om hulle leerders behoorlik voor te berei vir die naderende nasionale en provinsiale assesserings.

3. In hierdie verband moet onderwysers verseker dat die sleutelkonsepte in Taal en Wiskunde,ter voorbereiding vir die naderende toetse, volledig gedek en gekonsolideer word.

4. Ter voorbereiding vir die sistemiese toetse moet onderrig en konsolidasie van sleutelkonsepte tydens onderrigtyd asook deur aanvullende onderrig gedoen word.

5. Leerders moet hulself vertroud maak met verskeie vrae wat op verskillende kognitiewe vlakke gemik is en hulle moet weet hoe om op elkeen te reageer.

6. 'n Profielvorm wat as Bylae A gemerk is, met sleutelkonsepte wat in Taal en Wiskunde onderrig moet word, is by hierdie minuut aangeheg.

7. Daarbenewens kan voorbeelde van die JNA-toetsitems ook op die WKOD se webwerf gevind word. Nuwe voorbeelde vir graad 9 kan in die lêer gevind word wat Annual National Assessment 2014 gemerk is. Items vir graad 1-6 en 9 verskyn in die lêer wat Annual National Assessment 2013 gemerk is.

8. Toegang kan soos volg verkry word:

  • Tik in http://wced.school.za/home/home.html en kliek op "Curriculum Development";
  • kliek op "Assessment Management – GET Assessment";
  • Kliek op "Annual National Assessment"; en
  • Verkry die lêers: Annual National Assessment 2014, Annual National Assessment 2013.
9. Die WKOD se voorbeelde kan ook op die SOBIS gevind word – verwys na Navorsingsminuut: 0003/2014.

10. Onderwysers word verder versoek om:

  • die voorbeelde met ander vakonderwysers in 'n personeelwerkswinkel te bemiddel.
  • die vraestelle te bestudeer en hulself vertroud te maak met die verskillende toets-items en die puntetoekenning van die memorandum.
  • die verskeie items te oefen om sodoende leerders in staat te stel om hulself vertroud te maak met die tipe vrae en om onafhanklik te werk.
  • leerders te ondersteun met die lees en interpretasie van toetsitems/instruksies, die puntetoekenning en hoe om die antwoorde te benader.
  • leerders aan te moedig om netjies en leesbaar te werk.
  • Skole kan 'n skyntoets (mock-test) opstel. Gedurende hierdie oefening:

    1. moet die klaskamer, soos vir 'n regte toets, voorberei word;
    2. moet leerders individueel, met 'n toets voor hulle, werk;
    3. word dit aanbeveel dat onderwysers klasse ruil om die regte toetsomgewing na te boots; en
    4. kan die Skoolbestuurspan (SBS)-lede as monitors van die proses optree om maksimum doeltreffendheid te verseker.
11. Let asseblief daarop dat voorgesette onderrigplanne van onderwysers nie onregverdiglik deur hierdie voorbereidings, benadeel moet word nie. Daar moet dus 'n balans gehandhaaf word tussen onderrig en oefening, en maak ook seker dat leerders nie onder onnodige spanning geplaas word nie.

12. Skole word versoek om ouers in te lig oor die sistemiese assesserings en hulle aan te moedig om hulle kinders tydens die oefening van hierdie items as huiswerk, te ondersteun.

13. Prinsipale en vakadviseurs word versoek om die inhoud van hierdie minuut onder die aandag van alle betrokke onderwysers te bring.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2014:07:30

Bylae A: Tale  (grootte: 56 KB)
Bylae A: Wiskunde  (grootte: 39 KB)