1. |
Uitslae van die Nasionale Senior Sertifikaat-eksamen toon gereeld dat leerders met beperkte bevoegdheid in die verstaan en skryf van die taal van assessering onderpresteer in al hulle vakke. |
2. |
Engels en Afrikaans is tans die twee tale van leer en onderrig (TLO) op VOO-vlak in alle Suid-Afrikaanse skole. Vir die meerderheid van skole in hierdie provinsie is Engels die TLO. |
3. |
Dit is van deurslaggewende belang dat alle leerders genoegsame bevoegdheid verwerf in die taal van assessering, om dit te kan verstaan en doeltreffend te kan skryf en praat. Skole word dus versoek om die wisseling tussen tale in die klaskamer te verminder en maksimum blootstelling aan die taal van assessering te verseker. |
4. |
Onderwysers moet die onderrig van gepaste terminologie van inhoudsvakke in hulle beplanning en voorbereiding van lesse insluit. |
5. |
Daarbenewens moet leerders onderrig word om vrae in die taal van assessering te begryp en te beantwoord. Hulle moet onderrig word om te fokus op sleutelwoorde, soos dié wat in 'n instruksie voorkom, en dié wat die inligting wat verlang word, definieer en beperk. Dit moet in gedagte gehou word dat elke onderwyser ook 'n taalonderwyser is. |
6. |
Onderwysers word aangemoedig om 'n teksryke klaskameromgewing te skep om taalverwerwing te bevorder. Dit kan 'n woordemuur, gepaste muurkaarte asook 'n versameling boeke en artikels oor die vak wat onderrig word, insluit. Gepaste bronne is beskikbaar by Edulis (1ste Vloer, Middestad Wandelhal, Charl Malanstraat, Bellville, 7530). Bronne sluit DVD’s, boeke, CD’s en joernale in. |
7. |
Die Wes-Kaap Onderwysdepartement moedig alle skole aan om 'n skooltaalbeleid te implementeer wat die integrering van vakke en die onderrig van taal oor die kurrikulum heen bevorder. |
8. |
Bring asseblief die inhoud van hierdie minuut onder die aandag van alle onderwysers. |
GETEKEN: PP SATYO
WNDE ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2014:01:29
|
![](images/shim.gif) |