1. Die Wes-Kaap Onderwysdepartement (WKOD) nooi Wiskunde-onderwysers vir graad R tot graad 9 uit om of as aanbieders of as deelnemers die Wiskunde-oplossingskonferensie by te woon.

2. Doel

Die doel van hierdie Wiskunde-konferensie is om voorbeelde te voorsien van maniere waarop Wiskunde effektief onderrig kan word.

3. Datum, tyd en lokaal

Die konferensie sal plaasvind op Maandag, 30 Junie 2014, vanaf 08:00 tot 15:00 en op Dinsdag, 01 Julie 2014, vanaf 08:00 tot 13:00 by die Kaapse Onderwys-en-leierskapinstituut, Nooiensfonteinweg, Kuilsrivier.

4. Inligting vir aanbieders
4.1 Aanbieders wat geinteresseerd is om 'n Wiskundeles, 'n referaat oor Wiskunde-onderrig of 'n "beste klaskamerpraktyk"-werkswinkel by die konferensie aan te bied, moet deur die volgende gelei word:

  • Die les of referaat of "Hoe ek onderrig"-werkswinkel moet gebaseer wees op die nasionale Kurrikulum- en Assesseringsbeleidsverklaring (KABV) Graad R tot 12.

  • Die les moet 'n aspek van die Wiskunde-sillabus vir 'n bepaalde graad onderrig.

  • Deelnemers aan die konferensie moet by die les of werkswinkel betrek word.

  • Duur: 60 minute. Laat 5 - 10 minute toe vir groepbespreking of vrae.

  • Lokale sal draagbare tafels en stoele, 'n dataprojektor, 'n oorhoofse projektor, 'n witbord en staande blaaibord met papier he.

  • Alle werkvelle vir die konferensie sal bymekaargesit en in boekvorm uitgedruk word. Dit beteken dat aanbieders nie addisionele afskrifte van gedrukte materiaal hoef te bring nie, tensy van deelnemers verwag word om bladsye of werkblaaie te sny of te vou.

  • Indien moontlik moet alle gedrukte materiaal getik en op 'n laserdrukker gedruk word. Die WKOD sal die materiaal dupliseer.
4.2 Indien u geïnteresseerd is om 'n aanbieding te doen by die konferensie, voltooi asseblief die meegaande Bylae A en besorg dit terug aan mnr. K Scheepers by faksnommer 021 900 5175 / 086 613 5564 of e-posadres keith.scheepers@westerncape.gov.za teen 30 April 2014.

5. Inligting vir deelnemers
5.1 Onderwysers wat die konferensie wil bywoon word versoek om hulle besonderhede op die skoollys in Bylae B in te vul.
5.2 Die voltooide Bylae B moet terugbesorg word aan mnr. K Scheepers by e-posadres keith.scheepers@westerncape.gov.za of Gaynore Matthews by e-posadres gmatthew@westerncape.gov.za of faksnommer 021 900 5175 / 086 614 5564, teen Vrydag, 09 Mei 2014.
5.3 Registrasie sal sluit sodra die eerste 300 deelnemers geregistreer het.
5.4 Die konferensieprogram sal groot groep paneelbesprekings en parallelle sessies wat deur die deelnemers aangebied word, insluit. Skole wat vir die konferensie registreer sal teen 13 Junie 2014 besonderhede van die konferensieprogram ontvang.

6. Logistieke sake
6.1 Deelnemers of aanbieders uit die landelike onderwysdistrikte wat meer as 120 km retoer aflê, kan op Sondag, 29 Junie en Maandag, 30 Junie 2014 in die Kaapse Onderwys-en-leierskapinstituut se koshuis oornag.
6.2 Akkommodasiekoste by die KOLI-hostelle sal deur die WKOD gedek word.
6.3 Reiskoste sal nie deur die WKOD gedek word nie.

7. Die WKOD vertrou dat hierdie konferensie 'n verrykende ervaring sal wees vir alle Wiskunde-onderwysers wat dit bywoon.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2014:04:08

Bylae A: Vorm vir aanbieders  (grootte: 16 KB)
Bylae B: Lys van deelnemers  (grootte: 24 KB)