| 1. |
Iinqununu noosihlalo bamabhunga olawulo ezikolo (ii-SGB) baye baziswa kwiSetyhula 0010
ka-2013, yomhla we-4 Februwari 2013, ngofakelo lwezilungiso kwi-National Norms and Standards for School Funding (NNSSF) ngokumalunga nokuxhaswa ngemali kwemibutho eyaziwayo yee-SGB. Ezi zilungiso zapapashwa kwiGazethi kaRhulumente No. 35617 yowe-27 Agasti 2012 zaza zaqalisa ukusebenza nge-1 Apreli 2013. |
| 2. |
Kumhlathi 3.3 wesetyhula ekhankanywe apha ngasentla, iSebe leMfundo leNtshona Koloni (iSebe iWCED) livakalise ukuba linenjongo yokwenza inkqubo esebenza ngekhompyutha yamalungu ee-SGB yokuba kufakwe iinkcukacha zobulungu bawo. Loo nkqubo seyifakiwe ngoku yaye izikolo zinako ukufikelela kuyo kwi-CEMIS. |
| 3. |
Ngokomhlathi 145 B (a) we-NNSSF, i-SGB iya kufanela ukufumana intlawulo yomrhumo yobulungu bayo ukuba ilulungu lombutho we-SGB ongena kuwo ngokuzithandela othe wavunywa yiNtloko yeSebe leMfundo. Kucelwa niqaphele ukuba mine imibutho yee-SGB ongena kuyo ngokuzithandela eyenze isicelo kwiSebe iWCED ukwenzela ukuvunywa ngokusesikweni, kodwa kuphela yile mibutho mibini ilandelayo eye yavunywa ukuza kuthi ga ngoku:
- The Governing Body Foundation
- The Federation of School Governing Bodies of South Africa
Izicelo zeminye imibutho emibini zazingazaliswanga ngokupheleleyo yaye ziya kuqwalaselwa kwakuba kufunyenwe ingcaciso esalindelweyo.
|
| 4. |
Ziyacelwa ii-SGB ezingene kwimibutho yee-SGB ekhankanywe apha ngasentla ukuba zifake yonke ingcaciso engobulungu bombutho wazo we-SGB, okanye iinguqulelo ezenzekayo kubulungu bawo, kwi-CEMIS zingadlulanga iintsuku eziyi-14 zokufumana le ngcaciso imfutshane. Kule ngcaciso imfutshane kuqhotyoshelwe incwadana yokusetyenziswa (user’s manual), enika amanyathelo amakalandelwe xa kufakwa iinkcukacha zobulungu bawo. Ziyakhunjuzwa izikolo ukuba zinokungena kuphela kumbutho omnye qwaba we-SGB ongena kuwo ngokuzithandela. |
| 5. |
lSebe iWCED liya kuyihlawula imirhumo ekhutshwa kumbutho we-SGB nokuba kusezikolweni okanye kukwimibutho yee-SGB. Isebe liza kulungisa ingxelo engezikolo eziphantsi kweSiqendu 20 no-21 esele ziyihlawule imirhumo yobulungu bazo kwimibutho yee-SGB evunyiweyo lize lilungiselele ukuzibuyisela ezo ntlawulo ngokomhlathi 145 B(c) we-NNSSF. |
| 6. |
Njengoko kutshiwo kwisetyhula ekhankanywe apha ngentla, intlawulo yomrhumo wobulungu kumbutho we-SGB ayisayi kuthetha ukuba kuya kuhlawulwa yonke imali yomrhumo wonyaka ngokupheleleyo kwaye kungayi kugqithwa kumrhumo opheleleyo. |
| 7. |
Kucelwa wazise okukule ingcaciso imfutshane bonke abachaphazelekayo ukuze bakuthathele ingqalelo. |
ISAYINWE: NGU-J H LYNERS
USEKELA MLAWULI-JIKELELE WOPHUHLISO NOQUQUZELELO LWAMAZIKO
UMHLA: 2013:09:20
|
 |