1. Die prosedure vir die aanstelling van inrigtingsgebaseerde amptenare in 'n waarnemende hoedanigheid tot 'n vakante en befondse hoër pos, en inligting oor die betaling van 'n waarnemende toelae in sodanige gevalle, is gekommunikeer in Omsendbriewe 0103/2002, 142/2003 en 10/2010. Hierdie minuut vul die bepalings van die vorige omsendbriewe aan.

2. Die volgende prosedures, soos per die bepalings van Hoofstuk 1, Deel VII, paragraaf B5 van die Staatsdiensregulasies van 2001, SDKBR-resolusie 9 van 2001, en SDKBR Resolusie 1 van 2002, op die betaling van waarnemende toelaes, moet nagekom word wanneer inrigtingsgebaseerde amptenare genomineer word om aangestel te word in 'n waarnemende hoedanigheid in vakante befondse hoër poste.

  1. Slegs 'n permanente werknemer wat deur die WKOD aangestel is, mag in 'n hoër vakante befondse pos in 'n waarnemende hoedanigheid aangestel word.

  2. Die periode van aanstelling moet ononderbroke, en langer as ses (6) weke wees, maar nie meer as twaalf (12) maande nie.

  3. Die hoof van die komponent moet die werknemer skriftelik in kennis stel van sy of haar aanstelling in die hoër vakante befondse pos, in 'n waarnemende hoedanigheid, en die werknemer moet die aanstelling skriftelik aanvaar of weier.

  4. 'n Waarnemende toelae sal betaal word, mits die pos vakant en befonds is. (Geen waarnemingstoelae sal aan personeel betaal word wat in die pos waarneem omdat die permanente bekleër met verlof is nie).

  5. 'n Waarnemende toelae is die verskil tussen die werknemer se huidige salariskerf en die aanvangsalaris van die hoër vakante befondse pos.

  6. Indien 'n werknemer op 'n salariskerf (insluitende 'n persoonlike kerf) is wat hoër is as die aanvangsalariskerf van die hoër befondse vakante pos waarin hy of sy aangestel is, sal die waarnemingstoelae die verskil wees tussen die huidige salariskerf en die volgende hoër salariskerf, van toepassing op die hoër vakante pos, op voorwaarde dat daar 'n verskil is. Indien die hoër befondse vakante pos 'n senior bestuursdienspos is, sal die verskil tussen die huidige salariskerf en 60% van die inklusiewe buigsame vergoedingspakket betaalbaar wees, met dien verstande dat daar 'n verskil is.

  7. Die waarnemende toelae is niepensioendraend.

  8. Die waarnemende toelae sal maandeliks betaal word, met dien verstande dat die eerste betaling, in die maand wat volg, plaasvind na die voltooiing van die ses weke soos na verwys in paragraaf 2(b) hierbo.
3. Die nominasie proses:

  1. Die hoof van die komponent moet die nominasie maak.

  2. Die Direkteur moet bevestig dat die nominasie aan voorskrifte voldoen, en verseker dat al die korrekte dokumentasie ontvang is voor die aanbeveling, en voor die aansoek aan die Direkteur: Mensehulpbronbestuur gestuur word.
4. Die aangehegte aansoekvorm vir 'n waarnemende toelae moet aan die Direkteur: Mensehulpbronbestuur voorgelê word, vir sy of haar goedkeuring van die betaling van 'n waarnemende toelae. 'n Volledig geskrewe motivering moet gevalle vergesel wat afwyk van enige van die voorskrifte.

5. Alle waarnemende aanstellings is onderhewig aan die goedkeuring van die Hoofdirekteur: Mensehulpbronbestuur. Elke poging moet aangewend word om goedkeuring te verkry voor die die aanvang van 'n waarnemende aanstelling.

6. Werknemers moet daarop let dat hulle waarnemende aanstelling hulle nie 'n reg tot, of wettige verwagting van permanente aanstelling binne die pos gee sodra die pos geadverteer is nie.

7. Bring asseblief die inhoud van hierdie minuut onder die aandag van alle werknemers.


GETEKEN: PA VINJEVOLD
HOOF: ONDERWYS
DATUM: 2013:04:26

Nominasie vir 'n waarnemende aanstelling met 'n finansiële implikasie  (grootte: 100 KB)