| 1. |
Ingesluit is die IRP 5- en/of IT 3(a)-sertifikate van die werknemers op u diensstaat vir die 2012-2013-belastingjaar. |
| 2. |
Die sertifikate moet oorhandig word aan die betrokke werknemers. Maak asseblief seker dat oorblywende sertifikate van werknemers, wat gedurende die 2012/2013 belastingjaar in u diens was, maar nie meer op u diensstaat verskyn nie, onmiddellik na hulle nuwe betaalpunt, woonadresse versend word, of aan hierdie kantoor teruggestuur word. |
| 3. |
Die meegaande kontrolestaat moet onmiddellik gesertifiseer en vir rekorddoeleindes gestuur word aan die volgende adres:
| |
Die Hoof: Onderwys
Belastingafdeling (7de vloer)
Wes-Kaap Onderwysdepartement
Privaatsak X9114
Kaapstad
8000 |
|
| 4. |
Die belastingafdeling word gewoonlik oorval met versoeke om die uitreik van duplikaat IRP 5-sertifikate, en dit is duidelik dat sommige werknemers nie die belangrikheid van die IRP 5-sertifikate besef nie. Dit plaas 'n onnodige administratiewe las op hierdie kantoor. Beklemtoon dit dus vir alle werknemers dat - |
| 4.1 |
hulle hulle IRP 5-sertifikate veilig moet bewaar; |
| 4.2 |
slegs 'n skriftelike versoek om 'n duplikaat IRP 5-sertifikaat aanvaar sal word; en |
| 4.3 |
met ingang van 1 Julie 2013 die heffing verhoog word na R60.00 per sertifikaat aangevra. |
| 5. |
Alle werknemers word versoek om seker te maak dat die belastingnommer op hulle sertifikate korrek is. Indien geen belastingnommer vertoon word nie en die werknemer 'n geregistreerde belastingbetaler is, moet hulle belastingnommers by hierdie kantoor (Belastingafdeling) ingedien word sodat hulle Persal-rekords paslik bygewerk kan word. 'n Afskrif van 'n belastingopgawe of 'n brief vanaf die Suid-Afrikaanse Inkomstediens (SAID) waarop die belastingnommer verskyn, moet voorgelê word as verifikasie. |
| 6. |
Die sperdatum vir alle belastingbetalers wat hul belastingopgawes per hand indien, is 30 September 2013 en vir diegene wat opgawes elektronies indien, is dit 22 November 2013. In gevalle waar uitstel verlang word, is dit die werknemer se verantwoordelikheid om sodanige uitstel van die SAID te versoek. |
| 7. |
Maak asseblief seker dat die inhoud van hierdie minuut onder die aandag van alle personeellede gebring word. |
GETEKEN: LJ ELY
ADJUNK-DIREKTEUR-GENERAAL: FINANSIES
DATUM: 2013:07:05
|
 |