1. Inleiding

Ingevolge artikel 40(1)(c) van die Wet op Openbare Finansiële Bestuur (Wet 1 van 1999) moet hierdie departement teen 31 Mei 2013 finansiële jaarstate voorlê aan die Ouditeur-generaal. Vir die 2012-2013 finansiële jaar wat eindig op 31 Maart 2013 is dit dus nodig om die departement se boeke voor 30 April 2013 af te sluit. Die beoogde afsluitingsdatum is 19 April 2013. Gedwonge sluiting sal deur die Nasionale Tesourie in werking gestel word as 'n departement sou nalaat om sy boeke betyds af te sluit. Om hierdie rede word 'n dringende beroep op alle partye gedoen om te let op die volgende reëlings om te verseker dat aan die vereistes voldoen word.


2. Betalings op BRS vir Maart 2013
2.1 Die Direktoraat: Bestuursrekeningkunde, in oorleg met die BRS Stelselskontroleur, bestuur tans die proses aangaande betalings op BRS vir die 2012-13 finansiële jaar.
2.2 Die betaaldatums teen die huidige finansiële jaar se begroting moet teen 28 Maart 2013 afgehandel wees (laaste BRS-datum vir Maart 2013), Betalings met 'n betaaldatum na 28 Maart 2013 sal geplaas word op die nuwe 2013-14 finansiële jaar. Dit moet ten alle koste vermy word. Dit word sterk aanbeveel dat die laaste betalings t.o.v. die 2012-13 finansiële jaar vir BRS en Logis vasgelê en goedgekeur word teen 25 Maart 2013.

3. Reis-en-verblyf-(R&V-) voorskotte en eise

R&V-voorskotte raak nie die afsluiting van die finansiële jaar nie, maar die normale BRS-betaaldatums sal steeds van toepassing wees. Aangesien R&V-uitgawes slegs teen bewilligde fondse belas word nadat die eis geprosesseer is, is dit belangrik dat alle uitstaande eise vir die 2012-13 finansiële jaar betyds geprosesseer moet word. Aangesien hierdie eise en voorskotte op PERSAL geprosesseer word, moet hulle teen nie later nie as 20 Maart 2013 ingedien word. Enige eise wat na daardie datum ingedien word, sal teen die 2013-14 finansiële jaar belas word. Indien 'n eis minder is as die voorskot, moet alle verskille teen 25 Maart 2013 terugbetaal wees.


4. Kwitansies (Distriktskantore en DFA)

Alle kantore verantwoordelik vir die uitreik van BRS-kwitansies moet seker maak dat kwitansies vir Maart 2013, ongeag die depositodatum, verreken word in die verrekenings-maand Maart (03) en dat alle hangende kwitansies op BRS toegewys is. Magtigers moet ook seker maak dat alle gekanselleerde kwitansies behoorlik gemagtig is.


5. Kleinkasuitgawe (Distrikte en DFA)

Alle kleinkasuitgawes tot op 28 Maart 2013 moet gedurende Maart 2013 verreken word.


6. Verrekeningsmaand Maart (03) (Distrikte, DFA en DLS)

Dit is noodsaaklik dat die korrekte posdatums te alle tye op BRS gebruik word, veral wanneer joernaalinskrywings t.o.v. regstellings vir die 2012-2013 finansiële jaar gedurende April 2013 vasgelê word. Alle magtigers moet ook seker maak dat joernale met inskrywings t.o.v. Maart 2013 betyds binne hulle werkvloei gemagtig word.


7. Uitstaande transaksies op BRS

Alle uitstaande transaksies met 'n status van open, reject, to be rejected, incompl, tobeact, tobeau en rejauth moet onderhou, gemagtig of gekanselleer word. 'n Uitstaande transaksieverslag per funksionele area (betalings, joernale, ens.) kan op BRS aangevra word by die verslagfunksie (Other Reports). Die verantwoordelike gebruikers kan van hierdie verslag geïdentifiseer word vir die doeleindes van die finalisering van die uitstaande transaksies. Alternatiewelik kan 'n Outstanding Transaction Enquiry-dialoog opgeroep word vir die uitstaande transaksies in die Creditor Management en Creditor Payment-funksionele areas. Die keerdatum vir die aansuiwering van uitstaande transaksies is 25 Maart 2013.


8. BRS-inskakelings en uitsonderings (DFA)

Die verantwoordelike beamptes moet seker maak dat alle bank- en Persal-inskakelingsuitsonderings voor die finale afsluiting uitgeklaar word. Die BRS-stelselkontroleur moet seker maak dat alle Persal-lopies ingeskakel het op BRS en dat die bank-inskakelings ook plaasgevind het.


9. Rekonsiliasies (DFA)

Die Bankweseafdeling moet seker maak dat alle dringende betalings (NAPS) vir die 2012-2013 finansiële jaar op BRS vasgelê is. 'n Bankrekonsiliasie moet saamgestel word vir Maart 2013 om die bankstaat te balanseer soos op 31 Maart 2013.


10. Bates-en-lasterekeninge (DFA)

Ten einde bates-en-lasterekeninge korrek in die finansiële state te verreken, is dit noodsaaklik dat die nodige stappe gedoen word om hierdie rekeninge uit te klaar om die korrekte balanse, bv. kredietbalanse op skuldrekeninge, te reflekteer. In gevalle waar debietbedrae nie ooreenkom met kredietbedrae (en vice versa) nie, moet hierdie debiete en krediete vir doeleindes van finansiële state apart gespesifiseer en verouder word deur die verantwoordelike beamptes. In hierdie verband moet die nodige ondersteuningsdokumentasie ook ingedien word. In die geval van beleggingsrekeninge vir spesiale fondse moet die balanse gerekonsilieer word vir doeleindes van die finale state.


11. Eise betaalbaar en eise verhaalbaar (DFA)

Ten opsigte van bedrae wat deur en aan ander departemente verskuldig is, is dit 'n vereiste dat sertifikate van bevestiging van uitstaande bedrae ingedien word vir ouditdoeleindes vir elke departement met wie die WKOD 'n transaksie aangegaan het. Die bevestigingsbriewe moet uitgestuur word onmiddellik na jaareinde (19 April 2013) en teruggestuur word teen nie later nie as 30 April 2013, om departemente in staat te stel om hierdie inligting aan die Provinsiale Staatsrekeningkundige Dienste voor te lê teen 15 Mei 2013 en die korrekte balanse in hulle finansiële state te reflekteer. Sien PT Omsendbrief 40 van 2008 van 26 September 2008 in hierdie verband.


12. Inkomsteoorbetalings (DFA)

Alle inkomste wat vir die 2012-13 finansiële jaar ontvang is, moet teen 31 Augustus 2013 toegewys en oorbetaal word aan die Provinsiale Inkomstefonds.


13. Persalverslae vereis vir die Finansiële Jaarstate

Die Hoofdirektoraat: Mensehulpbronne moet die voorgeskrewe Persalverslae oor voorwaardelike aanspreeklikheid en werknemersvoordeelvoorsiening op 31 Maart 2013 aanvra.


14. Afsluiting van die finansiële jaar (DFA)

Die afsluiting van die werkvloei vir die 2012-13 finansiële jaar eindigende 31 Maart 2013 sal plaasvind op 16 April 2013. Dit beteken dat slegs die Rekeningekontroleafdeling van die Direktoraat: Finansiële Rekeningkunde verdere regstellings (joernale) vir Maart 2013 voor die finale afsluiting op 19 April 2013 sal kan prosesseer. Alle BRS-gebruikers word versoek om seker te maak dat al die nodige regstellings voor 16 April 2013 gemagtig word. Die oudit se finale afsluiting sal plaasvind eers na die afhandeling van die oudit van die Departement se finansiële state deur die Kantoor van die Ouditeur-generaal.


15. Aanwasse : Rekord van goedere en dienste ontvang en nog nie gefaktureer nie, sowel as onbetaalde fakture soos op 31 Maart 2013

Met die oog op die verslaglewering oor Aanwasse, moet alle kantore hulle registers van alle fakture op hande en nog nie betaal nie, sowel as goedere en dienste ontvang en nog nie gefaktureer nie, soos op 31 Maart 2013 voorlê aan die Finansiële Kapasiteitsbouafdeling van die Direktoraat: Finansiële Rekeningkunde. In hierdie verband word u verwys na paragraaf 6 van Finansiëlerekeningkundeminuut 0004/2012.


16. U samewerking en voldoening aan die vereistes van hierdie minuut sal hoog op prys gestel word.


GETEKEN: L ELY
ADJUNK-DIREKTEUR-GENERAAL: FINANSIES
DATUM: 2013:03:19

"Public Finance Management Act"  (grootte: 487 KB)