1. Soos u bewus is, sal die Departement van Basiese Onderwys (DBO) se Jaarlikse Nasionale Assesserings (JNA’s) in September 2013 uitgevoer word, en die Wes-Kaap Onderwysdepartement (WKOD) se Sistemiese Toetse in Oktober 2013. Die WKOD is verbind daartoe om opvoeders en leerders te ondersteun in die voorbereiding van hierdie toetse.
2. Die volgende voorbereidingstrategie word voorgestel vir hierdie toetse:
2.1 Opvoeders moet die voorbeeldtoetse vir beide die JNA’s en Sistemiese Toetse vanaf die WKOD se webtuiste aflaai, deur gebruik te maak van die prosedures wat hieronder uiteengesit is.

  http://wced.school.za/home/home.html
Klik op "Curriculum Development".
Dit sal jou na die Kurrikulum webtuiste neem.
Klik op "Quick Links".
Klik op "Preparing for systemic testing 2013".
Kies die vak uit die tabel. Daar is 'n keuse om te druk of te stoor.
OF
Hierdie voorbeelde kan ook op die SOBIS gevind word.
2.2 Opvoeders moet hulself vergewis van die verskillende toetsitems en puntetoekennings in die goedgekeurde memorandum.
2.3 Opvoeders moet verseker dat leerders die verskillende items oefen sodat hulle vertroud kan raak met die verskillende tipes vrae, en in staat is om onafhanklik te werk.
2.4 Skole kan ook soortgelyke toetse opstel wat gebaseer is op die tipes vrae wat in die voorbeelde gevind word. Vir sodanige toetse moet die klaskamer voorberei word soos vir die dag van die regte toets. Dit word ook aanbeveel dat opvoeders klasse ruil om die regte toetsomgewing na te boots. SBS-lede kan die prosedure monitor om maksimum effektiwiteit te verseker.
2.5 Opvoeders moet ouers inlig oor die toetse, en hulle aanmoedig om hulle kinders te ondersteun wanneer hulle items as huiswerk beoefen.

3. Die WKOD het verslae ontvang dat opvoeders hulle gereelde onderrigplan vir weke of dae laat vaar ter wille van die voorbereiding vir die JNA's of Sistemiese Toetse. Let asseblief daarop dat gereelde onderrig nie benadeel kan word deur die voorbereiding vir hierdie toetse nie. Onnodige stres moet ook nie op leerders geplaas word nie.

4. Prinsipale en kurrikulumadviseurs word vriendelik versoek om die inhoud van hierdie minuut onder die aandag van die betrokke opvoeders te bring.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2013:08:30