1. Die Wes-Kaap Onderwysdepartement (WKOD) het een Skeppende Kunste-stel aan elke openbare en spesiale skool afgelewer. Dit is tussen 18 en 28 Februarie 2013 afgelewer.

2. Elke Skeppende Kunste-stel bevat die volgende onderwysondersteuningsmateriale om die onderrig van Skeppende Kunste te verbeter:
2.1 Tekenavontuur Onderwysersgids en DVD
2.2 Musiek Intermediêre Fase Onderwysersgids en twee CD’s
2.3 Drama vir Almal Onderwysersgids en DVD
2.4 Dans vir Almal Onderwysersgids en DVD

3. Die lesaktiwiteite wat in die onderwysersgidse beskryf word, word gedemonstreer deur middel van DVD’s en CD’s wat daarmee saamgaan. Hierdie demonstrasies sal alle onderwysers help om Dans, Drama, Musiek en Visuele Kunste in graad 4 tot 6 meer doeltreffend te onderrig. Die lesse is gebaseer op die NKV graad R tot 12 Lewensvaardighede se Kurrikulum- en Assesseringsbeleidsverklaring.

4. Onderwysers word aangemoedig om hulself te vergewis van die inhoud van elke onderwysersgids, DVD en CD.

5. Lewensvaardighede Kurrikulumadviseurs in die Intermediêre Fase sal onderwysers help om die inhoud van die stelle te benut.

6. Skole word versoek om 'n inventaris te hou van die materiale en om seker te maak dat die Skeppende Kunste-stelle met sorg gebruik en bestuur word. Vir enige addisionele bestellings of vervangings, skakel asseblief Edumedia by telefoonnommer 021 689 9536.

7. Prinsipale word vriendelik versoek om die inhoud van hierdie minuut onder die aandag van die skoolbestuur en die betrokke onderwysers te bring.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2013:03:14