1. Agtergrond
1.1 Die Departement van Basiese Onderwys het die Konsepbeleid oor die Inkrementele Inleiding van Afrikatale (IIAT) uitgereik. Hierdie konsepbeleid sal in graad 1 in 2014 by geselekteerde skole in al die provinsies geloods word.
1.2 Die konsepbeleid het 3 doelwitte:

  • Om die gebruik van Afrikatale deur alle leerders in die skoolstelsel te bevorder en te versterk
  • Om bevoegdheid in en die gebruik van Afrikatale op Huistaalvlak te verbeter sodat leerders hulle Afrikahuistaal met bevoegdheid kan gebruik vir akademiese doeleindes as die taal van leer en onderrig
  • Om sosiale samehorigheid te bevorder
2. Implementering van die loodsprojek in die Wes-Kaap Onderwysdepartement (WKOD)
2.1 Die WKOD sal die IIAT-loodsprojek in 2014 in 10 tot 20 skole implementeer wat in die Metroonderwysdistrikte gelee is.
2.2 Die skole wat by die projek betrokke is sal Xhosa Eerste Addisionele Taal in graad 1 aanbied. Hulle sal dus skole wees wat tans die volgende taalopsies aanbied: Engels Huistaal en Afrikaans eerste Addisionele Taal OF Afrikaans Huistaal en Engels Eerste Addisionele Taal. Dus sal die Tweede Eerste Addisionele Taal wat aangebied word, Xhosa wees.
2.3 Die loodsprojek sal vir een jaar duur (Januarie tot Desember 2014) en sal alle graad 1-klasse en leerders in elk van die betrokke skole betrek. In September 2014, sal hierdie skole geraadpleeg word oor wat hulle uit die projek geleer het en gevra word wat hulle planne vir 2015 en daarna is.
2.4 Die volgende bronne sal beskikbaar gestel word in 2014 aan al die skole wat betrokke is:

  • Die Departement van Basiese Onderwys sal EAT Xhosa-leerderwerkboeke voorsien.
  • Die WKOD sal rondreisende onderwysers aan hierdie skole voorsien. Kontrakposte sal binnekort in 'n spesiale vakaturelys geadverteer word.
2.5 Skole wat graag in aanmerking wil kom vir die loodsprojek, moet, in konsultasie met hulle skoolbeheerliggaam (SBL) en distrikskantoor, die aangehegte Bylae A-vorm voltooi en aan die WKOD voorlê. Wanneer skole oorweeg of hulle moet aansoek doen, moet dit in gedagte gehou word dat daar implikasies sal wees wat betref die lengte van die skooldag en die rooster, bv. of skooltyd uitgebrei moet word en of die huidige tydtoekenning vir graad 1 (23 uur per week) gebruik moet word.
2.6 Die voltooide Bylae A-aansoekvorm moet per e-pos gestuur word aan Phumla.Satyo@westerncape.gov.za teen 18 September 2013. Skole sal ingelig word aangaande die uitkoms van hulle aansoek teen 10 Oktober 2013.
2.7 Indien 'n skool vir die projek aanvaar word, moet die ouers van nuwe graad 1-leerders wat vir 2014 toegelaat word, hiervan in kennis gestel word.

3. Verdere navrae kan gerig word aan mev PP Satyo, waarnemende Hoofdirekteur: Kurrikulumontwikkeling, by e-posadres Phumla.Satyo@westerncape.gov.za of by telefoonnommer 021 467 2622.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2013:09:06

Bylae A: Aansoek wat oorweeg moet word vir die WKOD-loodsprojek in 2014 oor die Inkrementele Invoer van Afrikatale
(grootte: 55 KB)