| 1. | ‘n Beroepsbewustheidsweek is beplan vir 7 tot 11 Oktober 2013 om die vermoë van leerders te versterk om ingeligte besluite te neem oor hulle toekomstige beroepe. Dit is ‘n geleentheid vir Lewensoriënteringonderwysers om die "Wêreld van Werk"-afdeling van hulle sillabus te voltooi. |
| 2. | Die teikengroep is Senior Fase-leerders. |
| 3. | Die doel van die Beroepsbewustheidsweek is om leerders in graad 7 tot 9 bewus te maak van die belangrikheid om die korrekte vakke in graad 10 te kies. Gedurende hierdie week word skole aangemoedig om te fokus op aktiwiteite wat leerders sal lei om ingeligte besluite oor hulle toekomstige beroepe te maak. |
| 4. | Lewensoriënteringonderwysers word aangemoedig om aktiwiteite vir hierdie week te beplan wat sal fokus op die wêreld van werk. Waar moontlik, sal take wat aan leerders gedurende die loop van die jaar gegee is, in hierdie week ‘n hoogtepunt bereik. |
| 5. | Graad 7
Graad 7-leerders kan fokus op ‘n weeklange projek wat kan lei tot ‘n aktiwiteit waartydens aangetrek word om ‘n beroep voor te stel. Dit beteken dat leerders skool toe sal kom, aangetrek in klere wat hulle toekomstige beroep voorstel. Hierdie aktiwiteit moet gedurende Lewensoriënteringperiodes plaasvind. Sien Bylae A vir nog idees. |
| 6. | Graad 8
Graad 8-leerders moet fokus op beroepsaktiwiteite wat hulle in staat sal stel om hulle eie sterktes, talente, beperkings en vermoëns in spesifieke vakke te herken. Sien Bylae A vir nog idees. |
| 7. | Graad 9
Graad 9-leerders kan deelneem aan ‘n oefening oor beroepsvoorligting deur die PACE Career Exploratory Questionnaire te gebruik. Dit kan gevind word op die PACE Career webtuiste www.gostudy.co.za Die vraelys moet gesien word as deel van die proses om graad 9-leerders voor te berei om die regte vakke vir graad 10 te kies. Sien Bylae B vir riglyne oor hoe om die vraelys te voltooi. Die vraelys is ontwerp deur die PACE beroepsentrum vir die doel om die beroepsvolwassenheid van leerders te versnel. Resultate wat uit hierdie selfverkenningsberoepsoefening verkry word, het ‘n aansienlike toename in die beroepsvolwassenheidsvlakke van deelnemers aangedui. Let daarop dat geselekteerde skole hierdie selfverkenningsvraelys, sowel as beroepsleidingsbrosjures sal ontvang. Lewensoriënteringonderwysers word versoek om die vraelys deur graad 9-leerders te laat voltooi en om van die beroepsleidingsbrosjures gebruik te maak as hulle ouers adviseer oor vakkeuses vir graad 10 met die oog op toekomstige beroepe. |
| 8. | Vir verdere inligting oor hierdie saak, kontak asseblief mnr J. Sitzer, Senior Kurrikulum-beplanner: Lewensoriëntering AOO, by e-posadres Joey.Sitzer@westerncape.gov.za of telefoonnommer 021 467 2199. |
| 9. | Prinsipale word versoek om die inhoud van hierdie minuut onder die aandag van alle betrokke onderwysers te bring. |
GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2013:09:02
